Nɔɔneŋ42
Ŋon ɔ doo yoogbeŋiri man nɛ kefane
1Mena keŋ ŋaa ne yase ɔ sia kɛo boo man loŋ nɛ,mena ke yaa ma woo ne kɛo nyaŋ me Wurubuarɛ.2Wurubuarɛ, ŋon ɔ yɛɛ nyeedoŋ Wurubuarɛ e nɛ loŋboaneŋ na ko ma woo.Woromɔ yaa maa gyu kena Wurubuarɛ siaman?3Me siasaraŋ ta bese me weenɛɛ,nelim na ka weese,na balaŋ ne bɔɔse maŋ debaŋ kamasɛ nyiaa,<<N Wurubuarɛ ŋon kyaa aleŋ?>>4Mɛɛ tɔɔse nombia kɛŋa pou,debaŋ keŋ mɛɛ gyoo ma wose man,na mena keŋ daa na balaŋ dikpii,ne tɛɛ gyu Wurubuarɛ dɛɛ nɛ.Daa na balaŋ burum na mo kenyaŋee nɔɔneŋ lese Wurubuarɛ yele,nɔɔkedi kpaakpaa man.5Ma woo, weera te n yala koyololo?Weera te n ne mutii me man?Mo n loo gyakaa Wurubuarɛ dɔɔ,nawolo nyi maa lese ɔ yele,nyi ŋon yɛna ma nyeelɛɛre na me Wurubuarɛ.6Ma woo ne mutii me man,mena dɔɔ maa tɔɔse neŋ,lee Yɔɔdan tɛɛle man,lee Hɛremon na Misare bulase dɔɔ.7Siiliŋ ne baake siiliŋ,lee loŋ keŋ ne gyɔɔ koro nɛ man,ke kakpela na loŋse pou,te wuu me dɔɔ.8Tɛɛ de naa na Degbeŋgyoo na lese ɔ kegyae wola maŋ,nelim na mee kpee ɔ nɔɔneŋ,na ma te fane fa Wurubuarɛ ŋon ɔ ne fa maŋ nyeedoŋ nɛ.9Me bɔɔse Wurubuarɛ, me kpanaŋ ŋon nyiaa,<<Weera te n wolee maŋ?Weera te me kɔlara na ŋere maŋ do,te me dɔŋ mee di waraŋsa?10Me ŋɔɔ ne nyii weeleŋ,lee me kɔlara kee kulu maŋ dɔɔ,debaŋ kamasɛ na bɛɛ bɔɔse maŋ nyiaa,<<N Wurubuarɛ ŋon kyaa aleŋ.>>11Ma woo, weera te n yala koyololo?Weera te n ne mutii me man?Mo n loo gyakaa Wurubuarɛ dɔɔ,nawolo nyi maa lese ɔ yele,nyi ŋon yɛna ma nyeelɛɛre na me Wurubuarɛ.The Seed Company