Aduya6
Kefaree Lee Diyiŋ Nombia Keyɛɛman
1Me bu, nyi n sem n dɔɔ wɔle,nyi n sem ŋɔɔle ŋolo kom nawɔɔ man nɛ,2na keŋ n be yako nɛ te nyɔɔ neŋ kɔta,te n nɔɔman nombia te kyaŋ neŋ.3Me bu, yɛɛ kei na n ka mo lɛɛ n wose,n be nyiŋ gyoo n dɔɔ nyiŋmaa man na,gyu ɔ gyaŋ na n ke yɔkɔse n wose,na n ke yase sia doo n dɔɔ ŋon teeree.4Na doo dosoroŋ ya,te na deŋeli koraŋ gba ya.5Lɛo n wose ŋgba mena keŋ ŋaa ne lɛo ɔ wose lee ɔkpaŋ nyiŋmaa man,ŋgba mena keŋ gyeebu ne lɛo ɔ wose lee kɔta nyɔɔre nyiŋmaa man nɛ.6Nyaŋ kebɔŋalete, gyu kamelee gyaŋ,kɛɛ ɔ gbɛɛneŋ na n ka gyeŋ nyansa.7Ɔ be dana siamante ya,ɔ be dana ŋon ɔ ne kɛɛ ɔ dɔɔ yaa ŋon ɔ ne di ɔ dɔɔ ya.8Mɔna ɔ na see ɔ weenɛɛ dugbututɛɛ,te ɔ ne yilaa ɔ weenɛɛ ka kekɛrɛɛtɛɛ.9Kebɔŋalete, nyaŋ ke doo kelii debaŋ woŋti?Debaŋ woŋti yaa nyaŋ ke foŋ lee n dosoroŋ man?10Dosoroŋ kyomii, kedeŋeli kyomii,nyiŋmaase kamo do yoolaase man fɛɛfo kyomii na,11diyem gyae kaa futaa neŋ ŋgba ŋmɛɛlate nɛ,te wose kekyaŋ ŋgba dekpaŋkpasare ŋmɛɛlate nɛ.12Nombia gyaere na akpanyanyaŋte,ŋon ɔ na mo nɔɔse ala ala ta kila dii akɛrɛɛ.13Ɔ ne gyɔ ɔ sia kpabeekpabee,mo ɔ nawɔɔ fatee,te ɔ na mo ɔ nyimbia yɛɛ adao.14Adaote ŋon ɔ ne bake nombiakumɛɛ ɔ konɔɔ man,ɔ ne loo do balaŋ debaŋ kamasɛ.15Mena dɔɔ nombiikum gyae ke futaa e karatetee,baa munu e debokenaŋ man keŋ ɔ be nyiŋ kekyɔ ya.16Abɔɔ looro kyaa keŋ Degbeŋgyoo ne kɔle,nyetooro dana e duwaare.17Agaŋtaŋ sia,dekara laakem,nyiŋmaase ŋan na ko walaŋ ŋon ɔ nombia dei.18Konɔɔ keŋ ne bake akpanyanyaŋ nombia,nawɔɔ ŋan ŋɛɛ barase yɛɛ dukum.19Adansɛɛkumdiiri ŋon ɔ ne dii akɛrɛɛ,na walaŋ ŋon ɔ ne loo nombia do balaŋ donɔɔ man.Kefaare Lee Ayimɛɛ Kamo Wuu Wose Man
20Me bu, di n kya mmaraase dɔɔ,te na bɛɛ n naa kawola ya.21Mo ŋa do nya nyeempɔ man debaŋ kamasɛ,mo ŋa kpaŋna n nyiŋmaa.22Nyi n dɔŋ na ŋe gyae ka wola neŋ gbɛɛ,nyi n doo na ŋe gyae ke kɛɛ n dɔɔ,nyi n fom na ŋe gyae ke kolosina neŋ.23Nawolo nyi mmaraa kei yɛɛ kanea ke,kawola kei yɛɛ keŋmaŋee ke,kedesina na nombia kawola,yɛna nyeedoŋ gbɛɛ.24Na ka lese neŋ lee n dɔɔ wɛɛle nyiŋmaa man,lee alo ohuhoo nɔɔwoya gyoŋ nyiŋan man.25Na yele ɔ kyeo ke gyɔ neŋ loo n konɔɔ man,yaa waa mo ɔ sia kyaŋ neŋ ya.26Nawolo nyi baa tale mo bodobodo duguŋ nyiŋ futooli alo,mɔna ŋolo wɛɛle waa tale wɔlɛɛ neŋ na n kpene kamasɛ.27Ŋolo waa tale lese boalaŋ gyakaa ɔ yoo dɔɔ,keŋ nyi ɔ kegbase be nyakee yee?28Ŋolo waa tale ta boalaŋ na nyewalaŋ dɔɔ,keŋ ɔ nawɔɔ be nyakee yee?29Mena te baale ŋon ɔ ne gyae ɔ dɔɔ wɛɛle nɛ doo,ŋolo be kyaa keŋ ɔ tina alo ŋonaŋ na bɔɔ wɔŋ ɔ deŋele ya.30Nyi tanam na ko ŋmɛɛlate te ɔ ŋmɛɛle weenɛɛ di nɛ,ŋolo bɛɛ do e desɛŋ ya.31Mɔ nyi akpaa be kyaŋ e na, waa tɔ ka kom betabonyetooro,waa mo ɔ dekpaŋalaŋ man abɔɔ pou yɔɔ tɔ kom.32Mɔna baale ŋon ɔ mo ayimɛɛ wuu ɔ wose yɛɛ diyiŋte e,ŋon ɔ yɛɛ mena na ɔ ne wɔlɛɛ ɔ wose.33Ketuku na desɛŋ te waa nyiŋ,te ɔ desɛŋ kenaŋ be gyae ka lee ɔ dɔɔ korakora ya.34Nawolo nyi nuŋkurili ne yele alo ŋon baale na gyeŋ baŋ nideli,waa tɔ neŋ ka kom keŋ ɔ be wii n waraŋase ya.35Ɔ be gyae waa sɛɛ lɛɛ ayefaare kamasɛ ya,nyi ba yoo fa e abɔɔ burum koraŋ na, ɔ be gyae waa lɛɛ ya.The Seed Company