LUTA4
Boazi aobala Luta
1Boazi ahaki o moiho mo inanga , mpe akihaki. Mweloli moliki na mbila penda na Elimɛlɛkɛ, oiko oebiaki nde Luta na boili nde alekaki aiko. Boazi aomobeya: «Yaka, kiha anɛ.» Moto oiko aɔtɛli mpe aokihi.2Na boiko, Boazi aobeya mele liomu o iyɔngɔ inka bingambi bi inanga mpe aobahangela bɔnɛ: «Bokiha anɛ». Ohilaki balɔkɔ nokiha,3Boazi aohangela mweloli bɔnɛ: «Oeba mbɔ Naomi aima o ehe ɛ nɛnɛ e Moaba. Mpe atɛkɛ lia iliki Elimɛlɛkɛ, moto ohangi na iho.4Mi, nambwane nakwebie lobo loiko mpe nakwɛnie mbɔ ohombe lia liko o boho bonka bingambi mpe na bato bankina bale anɛ. Kaki ondi nwelola ibula iwɛ, elolaka, kaki mpamba, onzebie, na itina o mbiha ɛ wɛ, ele nko mi oho noiyelola.» Moeloli aohanga bɔnɛ: «Mi, naimenya nohomba lia.»5Boazi aisiaki nohanga bɔnɛ: «Boina bopwa wɛ lia o makata manka Naomi, nko boina boiko ongopwa mpe Luta mohi Moaba, noyala mwali ɔ wɛ olongi ibula liko i lia iyale nko o bokundu bonka bome ondande owa .»6Mweloli aomoisenyele ndɛmbo: «Kaki loya boiko, naoboya, noyala nko nopita lokutu lo mi mɔmɛnɛ. Wɛ elolaka ibula i mi, na itina tingɔhɔ nwelola.»7O bilaka bileka, o Isalaele, kaki bato bayatɛkɛlɛ na mpe nwakola yomba, moto ɔmɔ aoyoumonya bikoto o makaka ma nande mpe aobipa onka moto onkina. Lɔlɔkɔ lwɛnia mbɔ ihomba iohila8Na itina ilɔkɔ, o elaka ehangelaki mweloli moiko mbɔ Boazi ahombe itia, atungolaki ekoto e nande mpe amopaki ɛlɔkɔ.9Boiko, Boazi aohangela bingambi mpe bato bankuma baliki aiko: «Inyo boya menonga lɛlɔ nwɛnɛ lolenge lwelola mi ibula o makata manka Naomi lokutu lonkuma lonka Elimɛlɛkɛ na bana ba nande ba mele, Kilioni na Maloni.10Nko aiko, naopwa mpe Luta mohi Moaba, ngainto o etuka enka Maloni noyala mwali omi, olongi lina inka mowi itɔlwame o ibula i nande noyala nkɔndwama onka bahikɔlɔ banande mpe na moloi mo ehe. Lɛlɔ boya menonga.»11Bingambi na bato bankuma baliki aiko baoyoisenye bɔnɛ: «Oho, toya menonga. Tika Nkolo atwakwele ngainto ɔtwa o itumba i wɛ; ayale lo Laele na Lea babotaki bokundu bo Isalaele! Tika ibati i wɛ ipule o iyongɔ i bokundu bonka Epalata mpe lina i wɛ iume o Bɛtɛlɛmɛ enkuma!12Tika Nkolo akopuliele ibotwa i wɛ na ɛlɛngɛ eiko e ngainto mpe bokundu bɔ wɛ boyale lo bonka Pɛlɛsɛ , ngana o mwele onka Yuda na Tamala!»Boazi aopwa Luta o molongo; mabotameno manka Ɔbɛdɛ, monkana onka Dawidi
13Na boiko, Boazi apwaki Luta mwali o nande mpe baputanaki. Nkolo amokelelaki ngɔlu, aobata liemi mpe aobota ngana o mwele.14Mpe bainto ba Bɛtɛlɛmɛ bahangelaki Naomi bɔnɛ: «Tika Nkolo aumiame! Nde okela mbɔ ekobotwamene lɛlɔ mweloli. Tika lina inka monkana ɔ wɛ iebane o Isalaele!15Angwenza bɔmɔi bɔ wɛ mpe angokobatela o bongambi bɔwɛ. Bokilo bɔwɛ bo ngainto ale na motuya o maiho ma wɛ nopenda bana ba mele nsambo, na itina akolanga mpe aokobotela monkana o mwele.»16Na boiko, Naomi aopwa ngana mpe aɔmɔlɛlɛ , o mbiha aomobongola.17Bainto bakihaki na balɔkɔ bɛlɛbɛlɛ baotepela mbɔ: «Naomi aobota ngana o mwele!» Mpe bamotikaki lina Ɔbɛdi. Boiko, Ɔbɛdi abotaki Yese, ihe enka Dawidi.Maina manka ba nke banka Dawidi
18Lenda monkɔndu monka Dawidi nyaima onka Pɛlɛsɛ: Pɛlɛsɛ abotaki Esilɔni,19Esilɔni abotaki Lama, Lama abotaki Aminadaba,20Aminadaba abotaki Nasɔni, Nasɔni abotaki Salama,21Salama abotaki Boazi, Boazi abotaki Ɔbɛdi,22Ɔbɛdi abotaki Yese mpe Yese abotaki Dawidi.The Seed Company