Nsango Ndɔti nga bɔkɛtɛki Malako15
Yesu o boho bonka Pilato
1Na ntei e mpendu, bankanga ba banɛnɛ banka Nyambe bakokanaki mputa na bingambi bi Bayuda, balaki ba mokeko mpe Moloi mo mɔnɛnɛ monkuma. Baoyondola Yesu, baomotombi mpe baomohembola onka Pilato.2Pilato amoubola: «Wɛ ole nkumu enka Bayuda?» Yesu aomobekwela bɔnɛ: «Nko nga botepela wɛ .»3Bankanga ba banɛnɛ bamɔhɛngɛki na mbo boike.4Pilato asiaki nomoubola: «Wɛ tombe na mbeko? Lenda liko inkuma likohɛngɛ balɔkɔ!»5Ya Yesu tabekola nsa mbekola, na boiko Pilato aemwaki.6O bilaka binkuma bi ntɛkɔ , ambɔbɛliake mobutami mɔmɔ, momboubolake balɔkɔ.7Nsande, oiko obeyamaki Balaba aliki o itumba i ikamba mputa na babomi baongolaki ɛkɔkɛlɛ.8Impinga i bato iohaka mpe iobanda noubola Pilato liobakelele nde bakabaka.9Pilato aobaisenyele: «Boondi nabɔbɛliele nkumu enka bayuda?»10Na itina aɛnɛki mbɔ, bankanga ba banɛnɛ bamohembwelaki Yesu na boili bwala.11Bankanga ba banɛnɛ bakamanyaki impinga mbɔ bababɛliele Balaba.12Pilato aisiaki nobaubola bɔnɛ: «Nakele ngamo na oiko obeya inyo nkumu enka Bayuda?»13Baomoisenyele ntotwa mbɔ: «Baka nde o ekulusu!»14Pilato aobaisenyele ndɛmbɔ: «Lo lobe lokela nde be?» Basiaki nototwa na nguya penda: «Baka nde o ekulusu!»15Pilato aondaki nobuloya impinga, na boiko ababɛlielaki Balaba; abahembwelaki Yesu o mbiha e nande nopa lotomo mbɔ bamokule mɔbɔtɔ mpe nobakema o ekulusu.Bamani baɔkɛngɔlɔ Yesu
16Bamani batombaki Yesu o moloi moliki o ipana inka mɔkɛndii mo etuka mpe babeyaki etuluku enkuma e bamani.17Bamɔlɔtiaki monkoto mo ngola mpe baomotika montolo mɔnsɛndɛ motongaki balɔkɔ o motu.18Mpe babandaki nomokulela nsaka: «Losako nkumu enka Bayuda!»19Bamokulaki o motu na mɔlɛlɛngɛ, bamotwaki nsɔi mpe bakihaki makulubɔngɔ nkukama o boho bonande.20O mbiha e balɔkɔ nomɔkɛngɔlɔ, baomotungola monkoto mo ngola mpe baomoisenyele bitobo binande. O mbiha baomɔbɛlia nomobaka o ekulusu.Yesu aobakema o ekulusu
21Baokamanya Simona e mohi Kulɛnɛ, ihe enka Alekisandele na Lupusi olekaki nyaima o itia mbɔ abebe ekulusu enka Yesu .22Mpe baomotombi o manda ebeyama Gologota elimbola «Lɔbɛkɛ lo motu».23Baondaki nomopa vinyo ehanganyamaki na mɔlɔ mobeyama mola, ya nde aokeboya.24Bamobakaki o ekulusu mpe baokapa bitobo binande, babikelaki bienzako nweba ekobata ɔmɔ na ɔmɔ .25Abakemaki o ekulusu o ola e ibwa e mpendu.26Itina i ikamba inande ikɛtɛmɛki bɔnɛ: «Nkumu enka Bayuda.»27Babakaki na bapunzi bape mputa na nde, ɔmɔ o lɔbɔkɔ lo nande lo lome, o nkina o lo lwali. [28Oiko ele nkokiami e Nkɛti liebia mbɔ: «Aliki o motango monka bapunzi .»]29Baleki bamonyakaki metu mpɛkia mpe ntepela mbɔ: «Ee! wɛ okitia itumba i Nyambe mpe oitonga o maina mahato ,30yabikiaka wɛ mɔmɛnɛ noyasulonya o ekulusu.»31Nko boiko mpe, bankanga ba banɛnɛ banka Nyambe mputa na balaki ba mokeko bamɔkɛngɛlɔki ntepela mbɔ: «Abikiaki bankina, apɔhe noyabikia nde mɔmɛnɛ!32Tika Kilito, nkumu enka Isalaele, asulwe aiko yoko o ekulusu! Kaki twɛnɛ boiko, aiko tomoimenya.» Babakemaki mputa nande mpe bamɔkɛngɔlɔki.Iwa inka Yesu
33Oiyaki boina o motu, moilima moliki o nse enkuma kii o ola e ihato.34Mpe o ola e ihato, Yesu atotwaki na nguya bɔnɛ: «Eloi, Eloi, lama sabakatani», nimbo mbɔ «Nyambe emi, Nyambe emi, onsabola itina be ?»35Omokaki baliki aiko baotepela bɔnɛ: «Langola bobeya nde Elia!»36Ɔmɔ apuhwaki ibango nolindia iyambu o vinyo e bokai mpe aikakiaki o nsɔngɛ e mɔlɛlɛngɛ, amopaki amine ntepela mbɔ: «Bolilaka, tolende na mpe Elia akoya nomosuloya mpiko !»37Ya Yesu atotwaki na nguya mpe akomaki moloko.38Mpe etobo ɛlɛlɛmɛki o etei enka Manda e Bulɛɛ na Manda ependa Bulɛɛ eatwaki biɛti bipe nyaima o liko kii o nse .39Nkumu enka bamani monkama atɛlɛmɛki o boho bo nande, ɔɛnɛki nde lolenge lokomaki nde moloko, atepelaki ndɛmbɔ: «Na hɔlɔ moto ɔnɛ aliki Ngana onka Nyambe!»40Eliki mpe na bainto balendaki iteta. O iyongo i balɔkɔ: Malia mohi Magadala, Malia ma nyango enka Zake e Ɛlɛngɛ na Yɔsɛ, na Salɔmɛ.41Bamoiyelaka mpe bamosalelaka o elaka eliki nde o Galilaya. Eliki mpe na bainto bankina baike baiyelaka na nde o Yelusalema.Yesu aokundama
42Oiyaki mpokwa, na itina eliki Bɔkɔlɔngɔni bo boina bo sabala .43Yosepa e mohi Alimatayo, aoyoye. Aliki ɔmɔ o Moloi mɔ mɔnɛnɛ mpe alilaki na nde Bonkumu bonka Nyambe. Aliki na ipeta nɔtwa onka pilato noubola bionge binka Yesu.44Pilato aemwaki nwamba mbɔ aohila nowa. Atindaki babeye nkumu enka bamani monkama mpe nomoubola na mpe ahilaki nowa kala.45Okaki nde o munya monka nkumu enka bamani mbɔ aokoma moloko, aopa epohe onka Yosepa nopwa molio.46O mbiha enka Yosepa nohomba nkamba , aosuloya Yesu o ekulusu, aomolinga na ɛlɔkɔ mpe aomokunda o iyita itimwamaki o ibɔkɔ i inɛnɛ mpe aibingitolaki ibɔkɔ inkina i inɛnɛ noilipa o munya monka iyita.47Malia mohi Magadala mpe Malia ma nyango enka Yɔsɛ balendaki manda ekundamaki nde.The Seed Company