1Pwen unime puk hapai maiye kantatuluwi nongan hira maltoh para aliy kene, ara iro niman mot ta yiy mepo iro mipwan ndrohonoku pwanpwan ta king, pe puk maiye ara, ara kanmburiy kinna andrtipai kinna hu mbura kunan manandrtoyoh.2Pe unime angelou hamou pwokeyan iwayeh iya mbulukoyun namandran iya ipa, “Hiyeh kultuwayin mwayih pe ilahiy para kitipe puk maiye pe kirapele hu mbura kunan mepo kanmburiy ara?”3Hapeko kinlahi hamou ita kol paingan yang, ndre iripo kol pwan, ndre mbulu pwan, ara kilahi kirehe puk maiye ndre kinimnim kiya nondriyan, ara pwi.4Pwen urang memesun, paratesah, hamou ara kultuwayin mwayih pwi, para kilahi kitipe puk maiye ara pe kinimnim kiya nondriyan, ara pwi.5Pwen hamou ta hu pohon lungui pe haamou, ara ipwai isa kili yo ipa, “Ahatih! Animei, Layon para kamaye Yutah, mepo yiy iyau ndraye King Tepit, ara kintamwaitini pahun, pe andre kitepe puk maiye mepo kanmburiy kinna hu mbura kunan manandrtoyoh ara.”6Pwen unime Noru Sipsip hamou, mwensen tehe kantingundrun pwen, ara iro tine ndrokolo ndrohonoku pwanpwan ta king, pe hu kan mwalen mahaamou iyapolo hu pohon lungui pe haamou, ara hurakayani yiy. Pe ndrosuwan ara manandrtoyoh, pe maran ara manandrtoyoh mepo mwoiwa Ngindrai manandrtimou, mepo Ngindrai ngara kipwandrisa hu kaya nondriya kol pwan masih.7Noru Sipsip isa pe iwiri puk maiye iro nimnan mot kili yiy mepo irompwan ndrohonoku pwanpwan ta king.8Pe iro mwonen kinwiriy, hu kan mwalen mahaamou iyapolo hu pohon lungui pe haamou, ara hu tukuruhu huya pwan mbulmara Noru Sipsip. Hamou-hamou tahu ara kitasih-sih iro kili yiy, pe huro mbultuwe hu pwelekei mbusiy iyau kolt mepo yukyuk ngonohon layin ipep iro aliy, para hu ndramira Ngindrai katotohun.9Pe hupowaliy iya waliy handra howen hupa,“Kultuwayim mwayih pe alahi awiri puk maiyepe arapele hu mbura kunan mepo kanmburiy,paratesah, kantingundrum,pe iyau ndreyem opu, arakonihi hu ndramat hu mui husa kili Ngindraihu ndramat para kamai hawum-hawum, pe nongna kol handra-handra, pe hu ndramat pe kol namandran masih.10Pe anmbusi hu para hukarayah hu king pe andre hu karayah pwandrendres ta Ngindrai torou tehe hu pris. Pe andre hu koro nimnim kata hu ndramat para kol pwan.”11Pwen unimnim iya pe uhilingi mbulukoyu hu angelou soyon iya, ndromwoyahu, ara pwesih pe pwesih. Hu angelou ara, ara hu rakayani ndrohonoku pwanpwan ta king, iyasura hu kan mwalen, pe hu pohon lungui pe haamou.12Pe hu powaliy namandran iya, iyau mbulukoyu hu hupa,“Noru Sipsip mepo kultuwayin mwayih pe kanitingundrun,ara iwiri pwoke iho hin, pe melit masih lahayan, pe lohongai waison pe pwoke,pe haiye, pe kahari ngalam, pe pwesai.”13Pwen uhilingi hu kan masih para kol paingan yang, pe para kol pwan, para mbulu pwan, pe para ndrita ndras, pe melit masih para aliy, ara hupowaliy hupa,“Iya kili yiy mepo ita mipwan ndrohonoku pwanpwan ta king, pe iya kili Noru Sipsip,ara pwesai pe haiye pe kahari ngalan, pe pwoke ara atam, pe andre kinto pe kinto!”14Pe hu kan mwalen mahaamou ara hupa, “Ndrokonan,” Pwen hu pohon lungui pe haamou, ara hu tukuruhu pe hu totohun iya kili Ngindrai pe Noru Sipsip.