1Pwen Yesu isapahas tehe hu Parisiy hukanhilong tehe yiy, iro sumuluwani hu ndramat soyon iya, iramwaitini Yohanes,2pe ndrokonan para aliy, Yesu kinsumuluwani hu ndramat pwi, hapeko ara ndramiran hu.3Pwen itali kol namandran hape Yutiya pe imui iya kol namandran hape Kaliliyy paiwe yi.4Pe andre kiya yau kol namandran hape Samariya pe kiya.5Pwen isa kol ngawan hakol iro Samariya, hupohowe ngalan Sikar, pe Sikar ara ita pakeh pwan hambut mepo Yakop kiniykiy kinna ata norun Yosep.6Pe ndrikou sih ata Yakop, ara iro aliy, pwen Yesu ara sangin ipaliyas iya tokuyan, pe iyampwan ngilse ndrikou ara. Pe paramwandrai, ara iho tehe ndrokolo lang.7Pe iro mwonen pihi Samariya hamou isa para kisa kau ndran, pwen Yesu ipwai iya kili yiy ipa, “Ilahiy para ahang yo hape ndran, ndre pwi?”8(Pe ndramiran hu ara hu kanna kol ngawan para hu kayasou anandrinai.)9Pwen pihi Samariya, ara ipwai iya kili yiy ipa, “Wou ndramira Yutah hamou, pe yo ara pihi Samariya, paratapeh pe ata sok yo iya ndran para nayin?” (Yihu para Yutah, ara hukonho susuye kiyapolo hu para Samariya, ara pwi.)10Pwen Yesu isomwi pihin ara ipa, “Kapa tanam yukyuk ta Ngindrai, pe kapa apahasani sehe ndramat iripo sok wou para nakiyin ndran, pwen asok yiy pe andre kihang wou ndran para taleh.”11Pwen pihin ara ipwai iya kili yiy ipa, “Namandran, hapesah para akau ndran kiya aliy, ara pwi, pe ndrikou, ara iya mbulun iya. Pe andre awiri ndran para taleh kinto-kinto ara, ara andre kiyau aleheh?12Wou ahohin iya, iyata tumbu yowu Yakop, yiy mepo iyki ndrikou aro isa kili yowu, pe yiy mbukenan iyin iyau aliy, pe norun hu kamai pe iyasura hu kan tan para hanghang, ara huyin iyau aliy i.”13Pe Yesu isomwi yiy ipa, “Hu ndramat masih hu kayin ndran iye, ara andre koyuhu kiro sapak manau,14hapeko kapa ndramat hamou kiyin ndran mepo nakuikiy kiya kili yiy, ara andre koyun kinsapak pwi. Pe ndran mepo nakuhang yiy, ara andre kirayah tehe ndran hakah iro suw kili yiy para taleh mepo andre kinto-kinto.”15Pwen pihin ara ipwai iya kili yiy ipa, “Namandran, ahang yo ndran ara, pwen andre koyu kinsapak pwi, pwen andre kunsa aripo para kusa kau ndran paiwe pwi yi.”16Pwen Yesu ipwai iya kili yiy ipa, “Aya pe aya yoh nambuyum pe amui asa.”17Pwen pihin ara ipwai ipa, “Yo ara nambuyu pwi yoh.” Pwen Yesu ipwai iya kili yiy ipa, “Apwai ndrokonan, tehe wou, ara nambuyum pwi.18Ndrokonan para aliy, nambuyum hu mayimou, pe ndramat mahapo ata sura yiy, ara nambuyum pwi yi. Pe tesah apwai mahapo, ara ndrokonan masih.”19Pwen pihin ara ipwai ipa, “Namandran, upahasaniy tehe wou ara poropet hamou.20Pe tumbu yowu hu, ara hu ngara katotohun kiro ngondron iye, hapeko wawu Yutah, ara wawu pa ndrohonoku totohun tawawu, ara ita Yerusalem.”21Pwen Yesu ipwai ngawan ipa, “Nam, apwotisingi lohongam kisa kili yo, lang itapo isa, ara andre akantohun kinna kili Tamarou kiro ngondron iye ndre kiro Yerusalem, ara pwi.22Pe wawu para Samariya, ara tana wawu tesah wawu tora totohun iya aliy, ara pwi. Pe yowu, ara yowu totohun iya tesah yowu pahasaniy. Sopwat tahu ndramat, ara andre kiyau kili hu Yutah.23Hapeko lang itapo isa, ara mahapo kinsa, tehe hu ndramat andre katohun kiya kili Tamarou kiya mwoiwahu pe kultuw ndrokonan. Pe yihu ndramat para totohun tora, ara Tamarou ita ten hu.24Ngindrai ara yiy mwomwoyou, pwen hu mepo nakatotohun kiya kili yiy, kiyapolo pwoke ta Mwoiwan Haiyan pe kultuw ndrokonan ta Ngindrai.”25Pwen pihin ara ipa, “Upahasani Messayahara, (mepo hupohowe yiy Kristus), ara andre kisa. Pe kapa kiro mwonen kisa, andre kiratiyani melit masih kisa kili yowu.”26Pwen Yesu iwong ngawan iya kili yiy ipa, “Yo, ara yiy mepo iripo wong isa kili wou ara.”
Hu ndramira Yesu humui husa kili yiy
27Pwen indrou pwi ko, ndramiran hu husa pe mwoiwa hu ihin tehe iro wong iyapolo pihin hamou. Hapeko hamou tahu kinsok yiy, kipa, “Wou anamili tesah? Pe paratapeh atawong iya kili pihin ara?”28Pwen pihin ara itali kulawai tan kinto, pe imui iya kol ngawan pe iya pwai iya kili hu ndramat ipa,29“Akasa, pe akasa nime ndramat hamou mepo itiyani melit masih kunmbusiy. Matisan aro ara Messayah.”30Pwen hutali kol ngawan ara pe huya para hu kaya nime yiy.31Pe iro mwonen ara, ara ndramiran hu huro rakekeyani yiy hupa, “Ndramat para hinonou, anamnam hape na.”32Hapeko Yesu ipwai iya kili hu ipa, “Yo, ara ma anandrino para kuyan mepo wawu kanpahasaniy pwi.”33Pwen ndramiran hu, ara huro panguluwaniy mwalingahu hupa, “Matisan hamou kinsa hang yiy anandrinai.”34Pwen Yesu ipa, “Anandrino, ara para kumbusi namiliwa Ngindrai, yiy mepo ipwandrisa yo usa para kumbusi mbulyan kiyahapwen.35Pe paya nongan sahin ta tumbu wawuhu ngara hu kapa, ‘Walah mahaahiu mapu, pwen anandrinai andre kimman.’ Hapeko upwai isa kili wawu, mara wawu kileu pe akanime hu piyang! Hu kanimman pwen para akapo.36Pe ndramat para poya anandrinai, ara kinwiri sowan, pe mahapo kinpo anandrinai para taleh mepo andre kinto-kinto. Pwen ndramat mepo andre kipo anandrinai imman, pe ndramat mepo ihisiy, ara hilu malmou kene andre hilu kapwes kaharong.37Pwayan kinpwai pwen kinpa, ‘Hamou para hasiyan pe hamou para poyan,’ ara ndrokonan.38Pe yo upwandrisa wawu para wawu kayapo tesah wawu kanhasiy pwi. Hu hayah hu kanmbusi mbuliyahu, pe wawu po hiyan iyau mbulen pwokeyan tahu mepo hu kanmbusiy pwen.”
Hu ndramira Samariya soyon hupwotisingi lohongahu
39Pwen hu para Samariya soyon huro kol ngawan ara, ara huhilingi titiye ta pihin ara, pe hupwotisingi lohongahu iya kili Yesu. Paratesah, pihin ara, ipa, “Ipohowe melit masih kunmbusiy pwen.”40Pwen iro mownen hu para Samariya husa kili Yesu pe hurakekeyani yiy para kiro sura hu, pwen iro sura hu lang maluwoh.41Paratesah, iya nongna Yesu kopu, pwen hu ndramat soyon hupwotisingi lohongahu.42Pwen hupwai iya kili pihin ara hupa, “Yowu kanpwotisingi lohonga yowu kinna tesah anpwai ara ko pwi, mahapo yowu mbukena yowu kanhilingiy, pe yowu pahasaniy tehe ndramat aro, ara Ndramat para Sopwat hu ndramat para kol pwan.”
Yesu isop noru ndramat iya mu iyata hu ndramat para pahun ata king
43Lang maluwoh isayau, pwen Yesu itali Samariya pe iya Kaliliyy.44(Pe Yesu mbukenan kinpwai pwen tehe poropet hamou kiro ndrohokolon imwonen, ara andre hu kanhaiyani yiy pwi.)45Pwen iro mwonen iyarayah iya Kaliliyy, hu ndramira Kaliliyy hurawulohani yiy. Paratesah, hu kannimei pwen sehe melit kinmbusiy iro Yerusalem tandrohonga lang ngara kasoulani lenge Pasopa pe para katotohun. Pe yihu, ara huro aliy i.46Pwen Yesu iya kol ngawan Kana ita Kaliliyy porosih i, mepo mamu ipaiwani ndran irayah wain. Pe ndramat hamou iyamu iyata hu ndramat para pahun ata king iro kol ngawan Kapernawum, ara norun kamai imwa iro aliy.47Pe iro mwonen ihilong tehe Yesu kinna rayah kinna Kaliliyy iyau Yutiya, pwen iya kili Yesu pe irakekeyani Yesu para kisa pe kisopwoyani norun kamai mepo pakeh nakimat.48Pwen Yesu ipwai iya kili yiy ipa, “Konan wawu kanime ndraikiya kaipisa pwoke, pe kinima pwoke, hapeko andre wawu kanpwotisingi lohongai wawu pwi.”49Pwen ndramat iyamu iyata hu ndramat para pahun ara ipa, “Namandran, ma noru kinmat mapu, asa pwan.”50Pwen Yesu ipwai iya kili yiy ipa, “Ayau, norum ara andre kiro mwalen.” Ndramat ara ipwotisingi nongna Yesu pe iyau.51Pe ihondron sai, pe hu ndramat para poya mbulyan, ara huya pohonani yiy iya sura nongan hiyan tehe norun, ara mwalen.52Pwen tama mbunah isok hu tehe iho sehe paramwandrai imwonen pe mbunah ara ingoh, pe hupa, “Pihe piyahon, pe paramwandrai iya iho sih, pwen mwamwa itali yiy.”53Pwen tama mbunah ara iyirowei tehe iro mwonen paramwandrai ara, Yesu ipwai iyatan tehe, “Norum andre kiro mwalen.” Pwen yiy pe hu ndrai sih mwanye atan, ara hu pwotisingi lohongahu.54Pwen aro, ara ndraikiya pwoke Yesu imbusiy porolusap tandrohonga itali Yutiya pe iya Kaliliyy.