1Iro mwonen lang toyoh, kowase yesou sih, ara irayah iro kol ngawan Kana iro nondriya kol namandran hape Kaliliyy. Pe tina Yesu, ara iro ariya yi.2Pe Yesu iyapolo ndramiran hu, ara hupwanos hu para hukaya kowase yesou ara yi.3Pe iro mwonen wain ihipwen, pwen tina Yesu ipwai iya kili Yesu ipa, “Wain tahu masih, ara kinhipwen.”4Pwen Yesu isomwiy ipa, “Nam, ara handra melit ata talu pwi? Lenge ara mapu kinsa.”5Pwen tinan ipwai iya kili hu ndramat para poya mbulen ipa, “Sehe melit kipwai, ara akambusiy opu.”6Pe hu kulawai namandran manohin para ndran hupalte iyau pat, ara huro pakeh. Kulawai tora, ara ngara ndran kihou aliy pe hu Yutah ngara hu kanu kiya aliy kiho ndruwa kultuwayi kowase hu. Pe kulawai sahin-sahin, ara ilahi lita sangat songui pe yimah.7Yesu ipwai iya kili hu ndramat para poya mbulen ipa, “Akamwani hu kulawai kiya ndran”; pwen humwani hu kulawai masih husa pep topwei.8Pwen ipwai iya kili hu ipa, “Akatilingi hape pe akawiriy kiya kili ndramat para sokoyouanandrina yon.” Pwen humbusiy tehen aliy.9Pwen ndramat para sokoyou anandrinai para kowas, ara ihingorowe kana ndran mepo irayah wain ara, pe kinyirowe hape aleheh iyau aliy isa, ara pwi. Hapeko ndramirat para poya mbulen mepo humwaniy opu, ara hupahasaniy. Pwen ndramat para sokoyou, ara iyoh ndramat mepo nakiyesou ara iya pwakin,10pe ipa, “Hu ndramat masih ngara hu kataingani wain hiyan kisa kimu, pe kiro mwonen hu ndramat masih kanyin pe hu kanpep, pwen iyamulan hu ngara kawiri wain kenen iho pwan kisa. Hapeko wain hiyan masih, ara wou akaituwei iro, ipoo isa matnen mahapo.”11Yesu imangsani ndraikiya pwoke imu. Imangsaniy ara iro kol ngawan Kana ita kol namandran hape Kaliliyy. Yiy ipwaingani pwoke namandran atan, pe ndramiran hu, ara hu pwotisingi lohonga hu iya kili yiy.12Pwen iyamulan, Yesu ilai iya pwan kol ngawan Kapernawum iyapolo tinan pe nalin hu, pe iyapolo ndramiran hu. Pwen huya huro aliy lang masahayeh opu.
Yesu irasses hu ndramat huya mawen yumwa totohun namandran
13Pe pakeh lenge Pasopatahu Yutah nakirayah, pwen Yesu ara iya paingan Yerusalem.14Pwen iya nondriya kowa yumwa totohun namandran pe inimei tehe hu ndramat huro popehei iya hu mbulmwakau, pe hu sipsip, pe hu pai, pe hayah tahu, ara huro mipwan keyau pe huro sulye singayai.15Pwen pe iriyi hu malkei, irayah meyehamou pe irasses hu ndramat masih iyapolo hu sipsip pe hu mbulmwakau. Pe irasumbuwani hu sombule pat tahu ndramat mepo huro sulye singayai, pe irambuhuyani hu keyau tahu.16Pwen ipwai iya kili hu ndramat mepo huro popehei iya hu pai, ara ipa, “Akawiri melit masih iye kiya mawen! Wawu mbuna akambusi yumwa totohun namandran ta Tomo kirayah tehe ndroho pehei.”17Pe ndramiran hu, ara hu lohonganiy tehe pwayan kinpwai toro: “Namiliwai para suwem, ara ipwalngani yo.”18Pwen hu pohon para Yutah husok yiy hupa, “Sehe ndraikiya pwoke andre apwainganiy kisa kili yowu, tehe wou ara pwoke nopwaran ita kili wou, para ambusi hu melit aro?”19Pe Yesu isomwi hu ipa, “Akaloiwani yumwa totohun namandran aripo, pe andre kiho nondriya lang maroyoh opu, andre kupwiliy paiwe yi.”20Pe hu Yutah hu somwiy hupa, “Hayou haangui pe anoh hupwuli yumwa totohun namandran aripo, pe wou apa andre lang maroyoh opu apwuliy paiwe, ndre?”21Hapeko yumwa totohun namandran iro wong iya aliy, ara nombuwen mbukenan.22Pe iyamulan para isatine kimat, pwen ndramiran hu, ara hu lohongani sehe melit kinpwai pwen. Pwen hu pwotisingi lohonga hu iya Nongan Haiyan, pe hu nongan mepo Yesu kinpwai.23Pe iro mwonen iro Yerusalem, ara hu ndramat soyon hunime hu ndraikiya kaipisa pwoke iro mbusiy, pwen hu pwotisingi lohonga hu iya ngalan. Pe imbusi hu ndraikiya kaipisa pwoke, ara isa rahihini lenge Pasopa para Yon Para Ndrinanohun Mepo Yis Aliy Pwi,24Hapeko Yesu ara kiniyki lohongan kinna kili hu pwi, paratesah, kinpahas kinna ta hu ndramat masih kene.25Pe yiy kinpahasani tesah ita ndriya hu, pwen pe kinamili hamou ndramat kitiyani ndramat hamou pwi kiya kili yiy.