Read Luka 1

Luka1nrz_nar

¹Lovia kaumu Teofilo e. Kau doutamo viloamaiai dava umauta 'ani depulu davata deleleta,²kau kataua makavanai vinaula kanania makata ai deikaia mai deilolo vaia davata vitaitata de'oumai.³Lau vaka makavana umaunai emakavalai depulu luvata boutai akavu kave'i. Inoku alalovaia enama'ina 'ounai oni emu malele ka balelea.⁴Kanaua 'ounai oi boikabasi komolo dava devaikabasimu luvata 'eva umauta.

Anelu Sakalia E'ouiaNakuna Ioane Bepupulu.

⁵'Eloda Iuda eloviala melalanai kabukabu kauna ka ua'i vana Sakalia, Abia ena iduvu kauna, adana Elisabeta 'eva Alona ena pulu ai easi ateatena.⁶Ia laluana 'eva vinaula komolo kauta Dilava vailanai, Lovia namana ena talavatu mai vaidiba de'ima kave'i, si'avana sia ka devavaia.⁷Beia ia laluana 'eva nakuta asi'i 'olana Elisabeta 'eva e'opa'opa mai laluana 'eva 'ani demotu.⁸Sakalia ena iduvu kauta eta vinaula melalanai, ia eta'u kabukabu vinaulata evavai Dilava vailanai.⁹Kabukabu kauta eta koakoa daitai, punipuniai ia deabia isi Lovia namana ena lo'e kabukabuna laloanai bedododo mulamula bonana mediana be'abua.¹⁰I'abuna melalana edaia koanai, meamea kauta boutai mulimuliai deakubou demeamea.¹¹Lovia namana ena anelu ka Sakalia kevanai evailaasi mulamula bonana mediana i'abuna valana avekenai idibana duasi elava.¹²Sakalia anelu eikaia koanai, nuana ebata maivaka emakau si'asi'a.¹³Beia anelu ia e'ouia ediaka, “Sakalia e, sia bomakau. Emu meamea 'uluna 'eva Dilava 'ani eika, oni adamu Elisabeta 'eva nakumu moluanena ka bevapulua, inoku oni ia vana bo'aea Ioane.¹⁴Lalomu 'eva benanama, mai bolalonama si'asi'a, kau mato vaka ena puluai belalonama.¹⁵'Olana Lovia namana vailanai ia 'eva namana be'ao, vine 'o mulamula pasisita sia be'inu, maivaka sinana bo'anai asido'o bepupulu laloanai Idume Kabukabunai bevovonu.¹⁶Ia betata'u Isalaela kauta doutamo vaika bevalalota 'udai Lovia namana eta Dilava kevana beda'ala.¹⁷Be'ana'ia Lovia namana vailanai Elia idumena mai ena siavu vitaitanai, kama mai naku nuata bevaka'onamota, mai lele sia de'ika kauta komolo kauta eta aoneka dalanai bevada'ata, kau beva'oluta Lovia namana ena.”¹⁸Sakalia anelu elavuaia ediaka, “Kanania 'eva a baikabasi kave'i koma? Lau 'eva 'ani amotu mai ada'u vaka 'ani emotu.”¹⁹Anelu ena luva 'evamuea ediaka, “Lau 'eva Kabiela, Dilava vailanai alalava, esini'u vali nama'ina kanania abia a'asi kevamu bavaikamasimu.²⁰Vali'u oni 'eva malamu besi'avana mai sia boluvaluva beda'amo dava katania eta pulu melalana bedaia. 'Olana e'u luva melala kanaua'i bemomo'ai luvana 'eva sia ovamomo'aia 'ounai.”²¹Kau 'eva Sakalia de'ima vunua maivaka nuata debavunu 'olana lo'e kabukabuna laloanai emia dau'a.²²Ia ela'asi koanai, beluluva 'eva sia edaia. Kanaua 'ounai deikabasi ia 'eva lo'e kabukabuna laloanai dava ka eikaia. Koakoa mo imanai evavai beia sia eluvaluva.²³Ena vinaula melalana evaolea koanai, ia emue eda'a ena luma.²⁴Kanaua mulinai ia adana Elisabeta esivabu inoku vuia ima luma laloanai mo emia.²⁵Eluva ediaka, “Kanania 'eva Lovia namana ena ula koana keva'uai, kau viloatai e'u malalai beabia tau.”

Anelu Malia E'ouia Iesu Bevapulua.

²⁶Elisabeta vuiana kalakoi laloanai Dilava eta'u anelu ka vana Kabiela esinia eda'a Kalilea laloanai vanua ka vana Nasaletai.²⁷Vato ka ua'i deluva'ana'i vaia kau ka beadavala, vana Iosepa Davida ena pulu ai easi, vato kanaua vana 'eva Malia.²⁸Anelu eda'a kevana e'ouia ediaka, “Lalomu benanama. Oni 'eva eula venimu vaika. Lovia namana 'eva oni kevamuai.”²⁹Luva kanaua Malia nuana evabavunua, mai elalovai lalovai vanama'ina kanaua anina 'eva dava.³⁰Beia anelu ia e'ouia ediaka, “Malia e, sia bomakau, Dilava ena ula 'ani oabia.³¹Oni 'eva bosivabu inoku melo moluanena ka bovapulua, inoku vana bo'aea Iesu.³²Ia 'eva beakai vaika mai be'aea Akai vaika Kauna Nakuna, Dilava Lovia namana betata'u 'ava'avana Davida ena lovia bevenia.³³Mai ia Iakobo ena iduvu beloviala keinikeini, ena lovia vanuana 'eva sia bepupua.”³⁴Malia anelu e'ouia ediaka, “Lau kau ka sia aikabasia. Kanania 'eva a bepulu koma?”³⁵Anelu enu'ovi ediaka, “Idume Kabukabuna be'ovu oni akamuai, mai Akai vaika Kauna ena siavuai beva'elu'elumu. Kanaua 'ounai Kabukabu Kauna bepupulu vana be'aea Dilava Nakuna.³⁶Oni kadi'a'amu Elisabeta ena motu motuai 'eva melo ka beabia, mai dediaka ia 'eva e'opa'opa beia ia 'eva vali'u vuiana 'ani kalakoi.³⁷Dilava enai 'eva sia dava ka epasisi.”³⁸Malia enu'ovi ediaka, “Lau 'eva Lovia namana ena da'alaabi ateate'u. Emu luva vitaitana keva'uai epulu.” Inoku anelu Malia evikania.

Malia Eda'a Elisabeta Kevana.

³⁹Melala kanaua'i Malia eva'olu inoku emolau eda'a vanua ka lolo ai Iudea kanobatanai.⁴⁰Ia Sakalia ena lumai edodo inoku Elisabeta evanama'inala.⁴¹Elisabeta Malia ena vanama'ina 'uluna eika koanai, bo'ana laloanai melo e'iuvai 'iuvai, mai Idume Kabukabuna Elisabeta nuana evavonua.⁴²Inoku eluva 'unu'unu ediaka, “'A'ate boutai viloatai oni 'eva evanama'inamu, melo bovapulua melona vaka evanama'inala.⁴³E'u nama'ina 'eva dava e'u Lovia namana sinana easi keva'u!⁴⁴Emu vanama'ina 'uluna a'ika koanai, komolonai melo bo'a'u laloanai mailalonamana e'iuvai'iuvai.⁴⁵'Ani evanama'inamu 'olana ovamomo'ai Lovia namana ena luva eluvaia kevamuai 'eva bemomo'ai.”

Malia Ena Lalonama Masina.

⁴⁶Malia ediaka,“Lau nua'u Lovia namana evanama'inala.⁴⁷Mai idume'u vaka e'u vamauliDilavana enai elalonama,⁴⁸'olana ena ulalu mai da'alaabiateate'u elalo'u une 'ounai.Vali'u melala kanania'i beda'aulu boutai nama'i'u be'oua,⁴⁹'olana siavu Dilavanadava namata e'uai evavai.Ia vana 'eva ekabukabu,⁵⁰ulu ka beda'a ulu kaena vilalo 'evaeveveni kau'olana de'aku kauta etai.⁵¹Ia imana siavunai enakula'ila evala'asia,apa kauta kataua etalalovai si'avataielo'ota siusiu.⁵²Ia eta'u lovia kauta kula'ilataeta lovia imia'autai eva'ovuta,mai ulalu kauta evaeleta'au.⁵³Vikolo deakuta kautadava nama'itai bo'ata evakubu,inoku lavo kauta 'evaimata 'avaeataesinita tau.⁵⁴Ena luva 'ana'i elaloia uneinoku ena da'alaabi iduvunaIsalaela kauta eduluta.⁵⁵Keketa kevatai ena vilaloeluva 'ana'i vaia davana 'evaevala'asia Abela'amomai 'ava'avana kevataibemia keinikeini.”⁵⁶Malia Elisabeta ita demia vuia koi boina inoku emue eda'a ena vanua.

Elisabeta Nakuna Ioane Evapulua.

⁵⁷Elisabeta ena mauli bonina edaia koanai nakuna moluanena evapulua.⁵⁸Lovia namana ena vilalo nama vaikana enai evala'asia 'eva kevanai demia kauta mai kadi'a'ana vali deika ita delalonama vaia ka'ona.⁵⁹Melala ivakalavaninai 'eva boutai deasi melo ivana do'una, mai kamana Sakalia vanai be'aea.⁶⁰Beia sinana eko'isi ediaka, “Asi'i, ia vana eka'aea Ioane.”⁶¹Boutai de'ouia dediaka, “Kadi'a'amu sia ka vana kanaua boina.”⁶²Makata devailu kamana kevanai melo va dava be'aea.⁶³Sakalia lelelele bika'ana elavuai lavuai vaia, akanai kanania eleleia koma, “Vana 'eva Ioane,” deikaia koanai boutai detabu lovo si'asi'a.⁶⁴Komolonai nutuna eluvuia, malana ekomolo eluva luva 'udai, Dilava evanama'inala.⁶⁵Kevatai demia kauta boutai demakau si'asi'a, mai Iudea lolo vanuana boutai vali kanania deluvaia odaoda.⁶⁶Vali deika kauta nuatai delalovai lalovai dediaka, “Melo kanania a boinai be'ao.” 'Olana Dilava imana 'eva ia akanai.

Sakalia Ena Enolea Luvana.

⁶⁷Melo kamana Sakalia Idume kabukabuna nuana evavonua, inoku enolea luvana eluvaia ediaka,⁶⁸“Lovia namana Isalaela etaDilava ekavanama'inala,'olana ia 'ani easi ena kauetavata 'udai.⁶⁹Ivamaulita kauna kula'ilanaevako'isia ita etaena da'alaabi kaunaDavida ena iduvuai.⁷⁰'Ani siako melalanaiena luva enolea kabukabutanututai deluvaia boina.⁷¹Eta 'ou kauta maiulata sia de'ula kauta boutaiimatai bevamaulita.⁷²Ena vilalo kubuta bevaikatamai ena luva 'ana'i kabukabuna'eva elalovai 'inia.⁷³Kubuta Abela'amo kevanaiena luva'ana'i eluvavaia ita daitai:⁷⁴Eta 'ou kauta imataibevamaulita,sia ekamakau enavinaula ekavavaia⁷⁵eta mia melalata boutai laloataiia vailanai kabukabuaimai komoloai ekamia.⁷⁶“Mai naku'u e,oni 'eva be'aemuakai vaika kaunaena enolea kaumu.'Olana oni bo'ana'iaLovia namana vailanaiena dala bovavaia kave'i,⁷⁷ena kau vamauli luvanabovaikabasita etasi'avana be'oukao koanai.⁷⁸Ita eta Dilava ena vilalo dainai.Melala ele'au 'ailalana vutuvutuaibe'ovu be'asi kevata,⁷⁹ba va'ava'anai maivabuto'oai demimiakauta akatai bekakala,aeta be'ima bevada'ata nua'eludalanai bevada'ata dodo.”⁸⁰Ioane e'aida'aida mai idumeai ekula'ila. Ia kano'akunai emia eda'amo ia Isalaela kau mato kevatai evailaasi.