1Naku'u ma'adi e, lau kanania alelea evavasi kele'emui 'eva oi si'avana sia ka oi bovavaia 'ounai. Beia mo kau ka si'avana evavaia koanai ita iduluta kauna ka 'eva emimia Kamana be'oua ita daitai, ia 'eva komolo kauna Iesu Keliso.2Ia sibona ena mauli eveni vaka'ona davanai eao eta si'avana i'ou kaota daitai, sia ita sibota mo daitai ia kau boutai eta si'avana daitai.3Ita Dilava e'outa talavatuta luvata kada'a vaita koanai eka ikabasi ita 'eva Dilava kaikabasia.4Kau ka bemadiaka, “Lau Dilava aikabasia,” beia Dilava ena talavatu sia eda'avaita koanai, kau kanaua 'eva dede kauna, ia nuanai Dilava ena luva umauna 'eva sia emimia.5Kau ka Dilava ena luva eda'avaita kauna 'eva Dilava elalo'au venia umauna. Kanaua'i ekaikabasi kave'i ita 'eva Dilava nuanai.6Kau ka ediaka ia Dilava enai emimia kauna 'eva Iesu emauli vaia maulina vitaitanai bemauli.
Talavatu Luvana Makamakana.
7E'u kau ma'adi e, talavatu luvana kanania alelea evavasi 'eva sia makamakana, ia talavatu luvana 'ana'ina 'ani makavanai oi oabia laloanai oi oabivenia, talavatu luvana kanania 'eva 'ana'ina 'ani oi oika luvana.8Beia talavatu luvana kanania 'eva makamakana, anina umauna 'eva Keliso mai oi kevamuiai 'ani ekaikala, 'olana vabuto'o 'eva 'ani etaule, ia 'ailala umauna 'ani ekakala.9Kau ka bediaka ia 'eva 'ailala laloanai emimia, beia bo'akalana ulana sia e'ula kauna ia 'eva vali'u vabuto'o laloanai emimia do'o.10Kau ka bo'akalana elalo'au venia 'eva 'ailala laloanai emimia, inoku kele'enai si'avana asi'i, sia kau ka bevava'evaia.11Ia kau ka bo'akalana ulana sia e'ula kauna 'eva vabuto'o laloanai emimia mai vabuto'o laloanai edada'a. Vabuto'o eta'u ia makana 'ani e'alavuta 'ounai, a eda'ala 'eva sia eikabasi.12Naku'u ma'adi e,alele venimui 'olana 'evaemui si'avana Keliso vanai'ani i'ou kaota.13Kamamai kaumui e,alele venimui 'olana 'evaoi kau kanaua makavanaiemia easi mo vali'u kauna'ani oi oikabasia.Kau 'alu'alumui e,alele venimui 'olana 'evaoi kau si'avana vaika'ani oi ova'ekoa.14Naku'u e,alele venimui 'olana 'evaoi Kamata oi oikabasia.Kamamai kaumui e,alele venimui 'olana 'evaoi kau kanaua makavanaiemia easi mo vali'u kauna'ani oi oikabasia.Kau 'alu'alumui e,alele venimui 'olana 'evaoi okula'ila Dilava ena luvanuamuiai emimia 'ounaikau si'avana vaika'ani oi ova'ekoa.15Kanobata mai laloanai demimia davata boutai sia oi bolalo'au venita, beia kau ka kanobata elalo'au venia koanai, ia 'eva Kamata ena lalo'au 'eva sia ia nuanai.16'Olana kanobata laloana davata boutai 'eva kauani ena ula vaika davata bevavai, maka ena ula vaika davata be'ika, mai lovia davata beapavaita, kataua boita boutai 'eva Kamata kevanai sia de'asi ia kanobata enai de'asi.17Kanobata mai laloana iula venia davata boutai 'ani detaule palu, ia Dilava ena ula vinaulana devavaia kauta 'eva bemauli keinikeini.
Keliso Ena 'Ou Kauna.
18Naku'u e, kanobata bepupua melalana 'eva 'ani ele'au. Vali 'ani oi oika Keliso ena 'ou kauna e'asi, mai vali'u Keliso ena 'ou kauta doutamo 'eva 'ani devaila. Kanaua 'ounai ita kaikabasi melala to'ona 'eva 'ani ele'au.19Kau kataua kevatai dela'asi beia ia 'eva sia ita banota umauta. Bema ita banota koanai, ita ia ita kamamia ka'ona. Beia ia eta da'a ovoai evala'asia kave'i ia 'eva sia ita banota.20Beia oi 'eva Kabukabu kauna Keliso eta'u Idume Kabukabuna eveni davana 'ani oi oabia nuamuiai, kanaua 'ounai oi boumuiai 'eva Dilava ena luva umauna oi oikabasia.21Lau oi sia alele venimui 'olana oi Dilava ena luva umauna sia oi oikabasia 'ounai, ia oi 'eva Dilava ena luva umauna 'ani oi oikabasia. Inoku oi 'ani oi oikabasi dede 'eva Dilava ena luva umauna enai sia e'asi.22Dede kauna 'eva dai? Ia ediaka Iesu 'eva sia Keliso. Kau kanaua boina 'eva Keliso ena 'ou kauna, ia 'eva Kamana mai Nakuna ita e'outa avuavu.23Kau ka Kau Nakuna e'oua avuavu kauna ia enai 'eva Kamana asi'i. Kau ka Kau Nakuna evamomo'aia kauna 'eva Kamana vaka ia kevanai.24Makavanai luva oi oika luvana 'eva nuamuiai bemimia. Oi oika luvana kanaua oi boda'a vaia koanai, oi 'eva Nakuna laloanai mai Kamana laloanai oi bomimia.25Kanania 'eva Keliso sibona eluva 'ana'i vaia ita eta, mauli keinikeini bevenita.26Alele venimui eta ula belebamui kauta kataua luvata aluluva.27Ia oi 'eva Keliso eta'u Idume Kabukabuna evenimui nuamuiai emimia, kanaua 'ounai sia kau ka bevaikabasimui beia 'ani edaia. 'Olana Idume Kabukabuna 'eva dava boutai evaikabasimui, ena vaikabasi 'eva umauta, ia sia ededede. Idume Kabukabuna evaikabasimui vitaitanai melala boutai Keliso laloanai oi bomimia.28Naku'u ma'adi e, vali'u Keliso laloanai oi bomimia, 'olana ia ena mue 'udai melalanai ita 'eva ekakula'ila maivaka sia ekamalalai ia vailanai.29Oi oikabasi Keliso 'eva komolo kauna koanai, oi boikabasi kave'i kau kataua komolo vinaulata devavai kauta boutai 'eva Dilava nakuna.