रोमन15
1ताहां आपू जें मजबुत होय, निस्ती आपाआ एतीज सोय नाहां पालीइली, पोन जें नोबले होय तियांआं बी वोजू आखलीत लागीइलु होय.2आपामेऱ्योअ हारेक जोओं जागेवालाआं विश्वास वादुहूं जोवे कोत तियाहा खुस मिकुहूं जोवे.3काहाके ख्रिस्ते बी सोताआ जिवोहो खुस ने कोअयो, पोने जेहें कोइत वसन कोहे के: “ताआ निंदा कोअनाराआं निंदा मापोअ आवित पोड़्यी.”4वसनोमेहें जेत्ती बी गोठी पेलुज रोत लेखाअयिही ते आपाआ शिक्शणोअ काजे लेखाअयिही; काहाके तिया वाईं आपुहूं आशा आन प्रोत्साहन जोड़ेहे जेहलेहे आपू धिर खेटित वाट बी जोवेतेहे.5धिर आन शांती आपनारु देव प्रभु ईसु ख्रिस्ताआ परमाणे तुमुहूं आखे मिलीत एक मोन रोहा एहेलोहो वरदान आपुहूं जोवे.6तो याआ काजे, काहाके आपाआ प्रभु ईसु ख्रिस्ताआ आब्हू जो देव होय, तियाआ तुमू आखे मिलीत एक मोन आन एका आवाजोम स्तुती कोअहूं जोवे.7जेहें कोइत ख्रिस्ते तुमुहूं देवोअ महिमाआं काजे स्विकार कोअयेहे, तेहेंज कोइत तुमू बी एकमेकाहा स्विकार कोआ.8तिहींवाईं आंय तुमुहूं कोहो के, जों आथवसन वेगाआ डायहांहां आप्योतो तों पुरो कोइलोअ काजे देव इमानदार होय याआ खोरु पुरावू देखाड़ीइलू काजे ख्रिस्त खतना ओवला माअहोंअ सेवक बोण्यू.9आन बिगर यहुदी माहें बी देवोअ दयाआ काजे स्तुती कोअहूं जोवे; जेहलोहो वसन बी कोहे,“बिगर यहुदी माअहूंम आंय ताआ स्तुती कोअहीं;आन ताआ नावोअ भजन गाविहीं.”10आन फाशोअ कोहे,“ए बिगर यहुदी माअहों, तुमू देवोअ माअहोंअरी खुसी कोआ!”11तिहीं रोत कोहे,“आखा देसो-देसोअ माअहूं! तुमू आखे प्रभुउ स्तुती कोआ;आखी जातीइ माअहूं, तियाआ स्तुती कोआ!”12आन फाशुउ यशया कोहे,“इसायोअ पारवाड़ीइ एक मुल उगेआन तो देसो-देसोअ माअहूं पोअ राज कोइलोअ काजे उबू रोय;बिगर यहुदी माहें तियापोअ आशा मिके.”13आशा आपनारु देव तुमाआं विश्वास वाईं तुमाम आखी जातीइ खुसी आन होक पोइ देअहूं जोवे. मोन्ज्ये पवित्र आत्माआं सेक्ती वाअहीं तुमाआं आशा वादती जाअहूं जोवे.14माआं पाव्हीइला! माहूं मुंदू होय के तुमू हाजी इश्शा वाअहीं पोआत, आन आखी जातीइ ज्ञानो वाईं पोआत होय आन तुमू एकमेकाहा सिकाड़ीत सेकतेहे.15तेबी आंय तुमुहूं ओर कोइत आपीइलो काजे हिम्मत कोइत ओं पत्र लेख्योहो. काहाके ओं सान्सो माहूं देवोप रोत जोड़्योहो.16तों एताआ वाखरी के तिहीं वाईं आंय ईसु ख्रिस्ताआ सेवक ओत कोइत बिगर यहुदी माअहोंअ कोअता देवोअ हाजी बातमी कोअलोअ सेवा पुंजारा होस कोइत सेको; मोन्ज्ये बिगर यहुदी माअहें एक पवित्र आत्मा वाअहीं सोको कोअल्यो अर्पण कोत मान्य ओवुहूं जोवे.17तिहींज वाईं मी कोअल्यी देवोअ बाप्तिमेऱ्यीइ सेवाआ काजे आंय ख्रिस्त ईसु वाईं वोडाय कोइत सेकोहो.18काहाके जे गोठी बिहीरा माहुंहूं कोय तेहें काजे ख्रिस्ते माआं जिवनोम रोत कोअयिही तियींहीं सोड़ीत बिहीरी कोड्लीज गोठी शब्दावाअहीं नेत कामोवाअहीं कोअलोअ माहूं हिम्मत नाहां आवती.19समत्कार आन वोडा-वोडा कामोअ सेक्तीवाईं, देवोअ पवित्र आत्माआं सेक्तीवाईं येरुसालेम होयरोअ आसेपासे रोत ते इल्लुरिकुम जाआं मी ख्रिस्ताआ हाजी बातमी परसार कोअयी.20पोन माआं उद्देश कायम ओज होय के, जिहीं जिहीं ख्रिस्ताआ नाव नाहांजी मुंदू, तिहींज हाजी बातमीइ परसार कोओ; काहाके बिहीरे बांदल्या पायापोअ माहूं कोअ नाहां बांदीइलोअ.21पोन लेख्योहो तेहेंज कोइत ओवुहूं जोवे,“जियांआं जागे तियाआ बातमी नाहांजी पोती तेंज देखे,आन जें उनाअयेज नाहां तें समजे.”22यीज गोठी वाअहीं माहूं तुमाआं जागे आवीइलो जास्ती वारी रुकाअहूं पोड़्यो;23पोन ओमे या भागोमेहें माआं काम सेलाअयोहो; आन डाहटे वोरह्ये ओत गोये आंय तुमाअ जागे आवीइलो सेकलात रोयुहू.24ताहां आंय स्पेन जाहीं तेहलुज तुमाअ वोग वोलिहीं, काहाके या प्रवासोम आंय तुमुहूं मिलीत खुस ओत जाहीं एहेलिही आशा कोअहो, आन तिहीं रोत तुमू माहूं जारिक आगाड़ी जाआं पोताड़ी देजा.25पोन ओमे ताहरुउ आंय देवोअ माअहोंअ सेवा कोइलोअ काजे येरुसालेम जाहो;26काहाके मकिदुनिया आन अखायावाली मंडड़ीइ माअहुंहूं ओंज गोम्यो के तें येरुसालेमवाला देवोअ माअहों मेऱ्याआ गरब्योंअ काजे वाजिहीं फालू कोइत मदत मोकलीत सेके.27तियांआं ओं निर्णय हाजोज होये, पोन एक पाल्ल्ये तें तियांआं कर्जदार बी होय, काहाके जर बिगर यहुदी माहें यहुदी माअहोंप रोत आत्मिक सेवाआ लाभ लेतेहे, ताहां यां बी यहुदी माअहोंहों शारीरिक सेवामेहें मदत कोअहूं जोवे.28तियाहा कोत आंय ओं काम पुरो कोइत लेहीं आन जो फालू टोलवाय तो लेत मोकली देहींन ताहरुउ तुमाआं जागे रोत स्पेन वाट लागिहीं.29आन माहूं मुंदू होय के, आंय जर तुमाअ जागे आविहीं ताहां ख्रिस्ताआ पुरु आशिर्वाद लेतुज आविहीं.30पाव्हीइला, आपाअ प्रभु ईसु ख्रिस्त आन पवित्र आत्माआं मेर ओर कोआड़ीत आंय तुमुहूं विनंती कोअहो के, माआं काजे देवोहो प्रार्थना कोइलोमेहें माहूं साथ देते रोवा.31मोन्ज्ये यहुदीयावाला बिगर विश्वासी माअहूं रोत आंय वासाइत रोंव आन येरुसालेमोम माआं सेवा देवोअ माअहोंहों मान्य ओवुहूं जोवे.32मोन्ज्ये आंय देवोअ इश्शामेहें खुसी वाईं तुमाआं जागे आविहीं आन तुमुहूं मिलीत माहूं बी आराम जोड़े.33शांती आपनारु देव तुमा आखाअरी रोअहूं जोवे. आमेन!
The Word for the World International