रोमन13

1हारेक माहुंउं सारकाऱ्या आधिकार्‍योंअ आदेशोअ पालन कोअहूं जोवे, काहाके कोड्लूज आधिकार एहेलुहू कायनाहां जो देवोअहीं रोत ने ओय; आन जे आधिकारी होय, ते देवोअ ठरवीइल्या होय.2तियाहा काजे जो कोडो आधिकारोअ विरोद कोअहे; तो देवोअ योजनाआ विरोद कोअहे, आन विरोद कोअनाराहां डोंड जोड़े.3काहाके हाजो काम कोए ताहां आधिकार्‍योहों बिइलोअ गरज नाहां, पोन खाराब काम कोअनाराहा बिअहूं पोड़े; तिहीं वाईं जर ताहूं आधिकार्‍योंहों ने बिइलो ओय, ताहां हाजे कामे कोअ, आन ते ताआ वोडाय कोए;4काहाके ते ताआ हाजाआ कोअतेज देवोअ सेवक होय. पोन जर तू बाक्तो कोअही, ताहां ताहूं तियांहां बिअहूं पोड़े, काहाके तियांआं आथोमेऱ्येएं आथार्‍ये ते उदड़ीज नाहां लेत रोया; पोन जें बाक्‍ते कामे कोअतेहें तियांहां देवोअ खोतेए परमाणे शिक्शा कोइलोअ काजे मोकलीइल्या ते देवोअ सेवक होय.5तिहीं वाईं तुमू आधिकाऱ्योंअ आदेश मानुहूं जोवे– फक्त देवोअ शिक्शाआ वाखरी एतोज नाहां, पोन आपाआ दिमाक बी एज साक्शी आपेहे.
6तियाहा काजे तुमू कर बी आपा, काहाके आधिकारी जाहां तियांआं जाबाबदारी पुरी कोअताहा ताहां देवोअ काजे काम कोअताहा.7तिहीं वाईं जियांआं जो भाग आपीइलू होय तो आपा: करोवालाआ कर आपा; फालावालाआ फालू आपा; जे मानपानोअ जोगाहा ओय तियांहां मानपान आपा.
8एकमेकापोअ मेर कोइलाआ सोड़ी देत बिहीरी कोड्लीज गोठीमेहें तुमू कोडाआ कर्जाम मा बांदाअहा; काहाके जों बिहीरापोअ मेर कोअहे, तिये देवोअ कायदाआ पालन कोअयोहो.9मोन्ज्ये, “सिनालो मा कोअही, खुन मा कोअही, सोरी मा कोअही, लालस मा कोअही,” आन याहां सोड़ीत बिहीरा कोड्ला बी आदेश ओय ताहां, तियां आखाआ अर्थ या एका वसनोम जोड़ेहे, “तु सोतापोअ मेर कोअहे तेहेलीज ताआ जागेवालापोअ बी मेर कोअ.”10जर तु जागेवालापोअ मेर कोअतोय ताहां तियाआ किज ने बिगाड़ही; तियाहा काजे मेर कोइलोअ अर्थ मोन्ज्ये पुरा आदेशोअ पालन होय.
11वेल ओलखीत कोइत एहेंज कोआ, काहाके ओमे तुमाआं काजे निंदेम रोत जागीइलोअ वेल आवित लागीही; काहाके जेहेलाम रोत आपू विश्वास कोअयुतो, तोयोंअ रोत पाल्ल्ये ओमे आपाआ तारण जास्ती आहने होय.12रात सेकित गोयीही, आन दिही उगुहूं कोअहे; तियाहा काजे साला, आपू आंदाराआ कामे टाकी देत उजालाआ आथार्‍ये बांदीत लेते.13दिहे सालतेहे तेहेंज कोइत वारुहूं सालते, तुमू मस्तीम एलकाइलो के, पिदाड़ के सिनालो के, लुसड़ाय के, भान्गड़ नेत खोद्रायीम मा रोहा.14पोन प्रभु ईसु ख्रिस्ताआ हजरी वाईं टापाइत जावा, आन शरीरोअ इश्शा पुरी कोइलाआ विसार मा कोअहा.

The Word for the World International

https://app.library.bible/content/6cbf4027f9a13b9c