प्रगटीकरण18
1याआ फासाड़ी आंय एका बिहीरा देवदुतोहो होरगामेहें रोत उतरीइत्लाहा देख्यू. तियाहा वोडू आधिकार जोड़्युतो; आन धरती तियाआ उजालावाअहीं पुरी सोमक्यी.2तिये वोडा आवाजोमेहें आअड़ीत कोइत कोयो, “तों खेकराअयो! वोडो बाबेल होयर खेकराअयो! तो हारेक जातीइ पुतोअ आत्माआं हाड्डू, आन हारेक खाराब आन एठा सिड़ाआ हाड्डू बोणित गोयो.3काहाके तियीइ सिनालाआ जास्ती नशावालू दाराक्शाआ रोहो आखा देशोवालां पिदुहू, धरतीइ राजाहां तियीइरी सिनालो कोअयोहो आन कोलीइ आखा वेपारी आखी बातीइ मोज्या कोइलाआ वस्तु वाअहीं कुन्बी बोणित गोयाहा.”4माहूं होरगामेहें एक बिहीरु आवाज एहें कोत्लाहा आंय उनाअयु,“माआं माअहूं, वोडा होयरोम रोत निहींत आवा,एहेलोहो ने ओवुहूं जोवे के, तुमू तियाआ पापोमेहें भागिदार ओवहा,आन तियाआ पिड़ाआ भागिदार बोणित जाहा.5काहाके तियाआ पापोअ टिग जुगोअ एतुहू उसू ओत गोयुहू,आन देवे तियाआ गुनाआं ओर कोअयीही.6तिये वोडे होयरे जेहेलोहो कोअयो, तुमू बी तियाअरी तेहेलोज कोआ,तियाआ खाराब कामोअ दुप्पट बोदलू आपा,आन तिये जो गिलास बिहीराआ काजे पोअयुहू,तियामेहें तियाआज काजे दुप्पट पोई द्या.7तिये जेती वोडाय कोअयी आन जेतीही मोज्यादान कोअयीही,तियाहा तेतुहू तारास आन पिड़ा आपा; तों तियाआ मोनोमेहें एहें कोहे,‘आंय राणीइ होस राजगादी पोअ बोठीही,आंय राणी बोणीत बोठीही,आंय रोंडोअ कायनाहां,आन केदिहीं विखु ने कोअनारी!’8तियाहा कोत तियीइ पिड़ा मोन्ज्ये मोत,दुख आन काल एकेज दिही आवीत पोड़े,आन तियीही आगीमेहें पेटाड़ी टाकीत देय,काहाके तियीइ न्यायनिवाड़ु कोअनारु प्रभु देव ताकतवालू होय.”9जाहां धरतीइ राजा, जियां बाबेलोअरी सिनालो आन मोज्यादान कोअयी, तों वोडो होयर पेटाइलाआ तुमाणू देख्यू, ताहराआ ते रोड़े आन विखु कोए.10ते तियाआ पिड़ाहा देखीत बित जाय आन एहें कोत सेटेज उबा रोये, “विखु! ताआ काजे विखु! ए वोडा होयर, सेक्तीवाला बाबेल होयर! ताहू ताब्बुड़ डोंड मिलीत गोयू.”11धरतीपोर्याआ आखा वेपारी तियाआ काजे रोड़े आन विखु कोए, काहाके कोडोज फाशोअ तियाआ माल वेसातु ने लेय.12होनाआ, सांदीइ, हिराआ, रुपाआ, आन मोवेमोवेज, जामण्ये, रेशमी साअके, रात्ला रंगोअ आंगड़े; हाजे गोंदाण्ये हारेक जातीइ हाजे लाकड़े; आथीइ दात, मोगले लाकड़े, इसत्लेए वस्तु, लोड़ो, संगमरमरोअ हारेक जातीइ बासन;13आन दालसिनी, मासालो, हाजी गुंदाअनारी आगरबत्ती, तेल, ऊद, दाराक्शाआ रोहो, जेयतुन साड़ोअ तेल, हाजू लोट, गोंवें, वासड़ीन-बोलोद, मेडेन बोकड़े, कोड़ा, गाडे, पावर, आन माअहुंउं जिव ओ तियांआं माल कोडो ने लेय.14तियाहा काजे वेपारी कोयो, “ओ वोडा होयर! ताहूं जों फल गोमतोतो, तों तारोत सेटे जातो रोयो, आक्खी होवादी आन खुसी आपनारी वस्तु आरवाइत गोयी. तु याहा फाशोअ ने देखीत सेकही!”15यीं वस्तुउ वेपारी, जे बाबेलोअ मोज्या कोइलाअ वस्तु वाअहीं कुन्बी ओत गोयाते, ते तियाआ पिड़ावाअहीं बित कोइत सेटेज उबा रोय, आन ते एहें कोत रोड़े आन विखु कोए.16“आरेरे! पाला, ओं वोडो होयर मोवोमोवोज, जामण्या, रात्ला रंगोअ आंगड़ो पोवीत ओतो, आन होनाआ, हिराआ आन सांदीइ गोवणा वाअहीं हिक्राइत ओतो.17तियीइ आखो मालधन एका तालोम उजड़ीत गोयो!” जाहाजीइ सालाड़नारा, जाहाजीम बोहनारे, जाहाजीइ देखबाल कोअनारे आन दोर्याअ वेपारी ए आक्खेज सेटेज उबे रोये,18आन तियाआ पेटाइलोअ तुमाणो देखीत कोइत जाअखीलीही जोरे कोने वोल्ये, “या वोडा होयरोअ बोराबरी कोडो कोइत सेके?”19ते तियांआं मुन्कापोअ तुलो टाकित कोइत, जाअखीलिही जोरे रोड़ते आन विखु कोअते जात एहें कोतेते, “ए केतीही दुखोअ गोठ होय! या वोडा होयरो पोअ! याआ मालधनो वाअहीं जाहाजीइ आखा मालिख कुन्बी बोणित गोया, ओं तालेकोज मेहें उजड़ीत गोयो.”20ए होरगा, ए देवोअ माअहों, आन सेवकोहों, आन भविश्यवक्ताहां, खुसी कोआ, काहाके देवे तियाआ विरुद्दामेहें तियांहां न्याय आप्युहू.21ताहरुउ एक ताकतेवालू देवदुत कोअटाआ वोडा पुड़ोअ होस एक वोडू डोण उसल्यू, तियाहा दोर्याम टाकी देदू आन कोयो, “वोडो होयर बाबेल एहेंज कोइत जुदी जोरे ओदरीत पोड़े आन फाशोअ तों केदिहीं ने देखाय.22तंबिवरो वाजीइलोअ, आन गितार्याहां, पावी आन तुरीइ वाजाड़नाराआ आवाज तामेहें फाशुउ केदिहीं ने होंबलाय; तामेहें धंदा कोअनारा वेपारी फाशाअ केदिहीं ने मिले; कोअटी दोइलोअ आवाज तुमामेहें याआ आगाड़ी फाशुउ केदिहीं ने होंबलाय.23दिवाआ उजालो तामेहें फाशोअ केदिहीं ने देखाय, आन वोर आन वोड़लीइ आवाज तामेहें फाशुउ केदिहीं ने होंबलाय, काहाके ताआ वेपारी धरतीपोअ वोडा पुडारी ओता, आन आखा देसोहों ताआ ठोगोअ ज्यादू वाअहीं भटकाड़्याहा!”24बाबेलोमेहें भविश्यवक्ताआ, आन देवोअ माअहुंउं आन तियां आखा माअहुंउं रक्त सापड़्यो, जियांहां धरतीपोअ माईंत टाक्येते.
The Word for the World International