मत्तय3
1तियां दिहोमेहें बाप्तिस्मा आपनारु योहान यहुदीयाआ जंगलोमेहें आवित एहेलुहू परसार कोउ वोल्यू के,2“तुमाआं पापोहो सोड़ीत मोन फिरवा!” “काहाके होरगाआ राज आहने आवित लागोहो.”3ओ तोज होय, जियाअ बाप्तिमेहें यशया भविश्यवक्ते कोयोतो:“रानोमेहें एका बोंबलीइनाराआ आवाज आवेहे,‘प्रभुउ सड़क तियार कोआ;तियाआ वाट हुदी कोआ!’”4योहान उटड़ाआ रुंग्हाआ आंगड़े पोवित ओतू, आन तियाआ कंबरेमेहें सांबड़ाआ पोट्टू ओतू, तियाआ खाणो टिडे , आन रानोमेऱ्योअ मोद ओतो.5ताहरेए येरुसालेमोमेर्येए आन पुरा यहुदीया मेर्येए आन यारदेन खाडीइ आहने-पाहनेए बादा गांवोंमेहें रोनारे माअहें तियाआ जागे आये.6आन जिवज्योअ गुनां कबुल कोइत यारदेन खाडीमेहें तियाआ आथे बाप्तिस्मा लेदो.7जाहां फरिसी आन सादूकी यांमेर्याआ वारुज जोओंहों बाप्तिस्माआं काजे तियाआ वोगेहे आवत्लाहा देखीत तिये तियांहां कोयो, “ए हापोअ पिलां, देवोअ आवनारी खोते रोत नाहींइलोअ काजे तुमुहूं कोडे कोत देदो?8तुमू पापोअहें रोत फिरीत देवोअ वोगेहे सालताहा, एहेलोह जिवन सोताहा जिवीत देखाड़ा.9आन अब्राहाम आपाआ बाह्हू होय एहें कोत कोअलोअ विसार तुमू तुमाआं मोनोमेहें कोअहा मा; काहाके आंय तुमुहूं कोहो के, देव अब्राहामोअ काजे यां डोणोओं पोर्ये उब्जाड़ीत सेकेहे.10आन ओमेज रोत साड़ोअ थुड़ोमेहें कुवाड़ो मिक्योहो; एताआ वोतीइ के जों साड़ हाजो फल नाहां आपतो, तों साड़ वाडीत कोइत आगीमेहें टाकी देवाय.11आंय पाअयों वाअहीं तुमुहूं मोन फिरावीलाआ बाप्तिस्मा आपोहो, पोन जो माआं फासाड़ी आवनारु होय, तो माआं रोत बी जाअखु ताकतवान होय, आंय तियाआ खाहड़े तोइलोअ बी लायकीइ नाहां; तो तुमुहूं पवित्र आत्मा वाअहीं आन आगी वाअहीं बाप्तिस्मा आपे.12तियाआ आथोमेहें हुप होय, आन तो तियाआ खोलो सोको कोए आन तियाआ गोंवें मोठीमेहें मिके, पोन पुहूटो केदिहींज ने उलाअनारी एहेलिही आगीमेहें पेटाड़ी देय.”13ताहां योहानोअ आथे बाप्तिस्मा लेअलोअ काजे ईसु गालीलोम रोत यारदेन खाडीइ मेरे आयू.14पोन योहान तियाहा कोनु वोल्यू, “आंय ताआ आथे बाप्तिस्मा लेअहूं जोगोहो होये, तेबी तू माआं आथे बाप्तिस्मा लेनु आयुहू?”15पोन ईसु तियाहा उत्तर आप्यो, “ओमे एहेंज कोइत ओवुहूं देमे; काहाके जों जों खोरो होय तों तों आपू कोअहूं जोवे एहेलिही देवोअ इश्शा होय.” ताहां योहाने तियाआ गोठ मानित लेदी.16बाप्तिस्मा लेत कोइत ईसु पाअयोंमेहें रोत बाअथे निहींताज जुग उगड़ीत गोयु, आन देवोअ आत्मा पेरवाअ होस तियापोअ उतरीइत्लूज देख्यू.17आन पाला, जुगोमेहें रोत एक आवाज आयू, “ओ माआं मेरालू बेटुह्हू होये, याआ बाप्तिमेहें आंय जुदू खुस होये.”
The Word for the World International