मार्क4
1ईसु फाशुउ गालील तालावोअ मेरे सिकाडू वोल्यू. आन एतीही गर्दी तियाआ जागे टोलू वोल्यी के तो तालावोमेहें एका नावड़ा मेहें बोहीत गोयू, आन आखी गर्दी तालावोअ मेरे उबी रोयी.2तो काईं वाअहीं जाअखीलिही गोठी सिकाडू वोल्यू आन एहें कोत कोयो,3“कान द्या! एक पेएनारो बियारु पेओ निहींयो.4आन पेएत्लो तेहेलाम थोडहू बियारु वाटेपोअ पोड्यू, आन तो सिड़ा विसीत खात लेदू.5थोडहू बियारु खरबाल जागा मेहें पोड्यू, तिहीं जाअखु कादुव ने जोड़्यू तिहीं वाअहीं उतवाल उगो.6पोन दिही उग्यू तेहेलाम तोपो वाअहीं कोमात गोयो, आन मुले ने काल्ये तिहीं वाअहीं उगाईत गोयो.7थोडहू बियारु काटाआ साटवा मेहें पोड्यू तिहीं वाअहीं तें, काटाआ साटवेज उसे वादीत गोये आन ओनोहों दाबी देदो ताहरोअ तिया ओनोहों फल ने आयो.8थोडहू बियारु हाजा कादवूम पोड्यू तो उगू, आन वोडो ओवित पाको; थोडहो तीस भाग, थोडहो साट भाग, थोडहो हौ भाग पाको.”9ईसु कोयो, “जिया पोअ उनाइलोअ कान ओय, तो उनाआ!”10ईसु एखलुज ओतू ताहां तिहीं उनाअनारा मेर्याआ थोड़ाक जोओं बारा सेलाअरी लागीत तियाआ जागे आवया आन काईंइं बाप्तिम फुशो.11तिये तियांहां कोयो, “तुमुहूं देवोअ राजोअ दोड़पाअली गोठी समजीइलोअ समज मिल्यीही, पोन बारथेवालांअ कोअते आखी गोठी काईं मेहें कोवाअत्ली,12एताआ काजे के,“‘तें देख्याज कोअतेहे, देखुहूं जोवे,आन तियांहां नाहां देखाअतो;तें उनाअयाज कोअतेहे, उनाअहूं जोवे,आन तियांहां नाहां समजाअतो.केहेंनेत तें देवोअ वोलेहे फिरतेताहां देव तियांहां माफ कोअतू.’”13ताहां ईसु तियांहां कोयो, “केहें ए काईं तुमुहूं नाहां समजाअयी के? ताहां बाकी बिहीरी तुमू केहें कोइत समजाहा?14पेएनारो वसन पेएहे.15वाटेपोअ वसन पेएयो, तें एहेलेहे माअहें होय, जें वसन उनाअत्ले, ताहां सैतान आवित कोइत ताबुड़ विसीत लेत जातु रोत्लू.16तेहलोज खरबाल जागा मेहें पेआअले तें एहेलेहे माअहें होय, जें वसन उनाअताज वाआ खुसी वाअहीं मानित लेत्ले;17पोन तियां सोतामेहें मुले ने तोअये तिहीं वाअहीं थोड़ाज दिही टिकाव तोअत्ले, तिहींइं फासाड़ी वसनोअ वाखरी अड़सन नेताहां सताव आवत्लू ताहां तें ताबुड़ सोड़ीत जाते रोत्ले.18काटाआ साटवामेहें पेआअले तें एहेलेहे माअहें होय जें वसन उनाइत लेतेहे,19पोन दुन्यादारीइ सिंता, पोशाअ धोकू, आन बिहीरी वारुज वस्तुउ लोभ तियांमेहें फोहीत कोइत वसनोहों दाबी देतेहे, आन तों फल नाहां फलतो.20पोन हाजा कादवाला जागामेहें पेएल्यो तें एहेलाहा माअहोंअ होस होये, जें वसन उनाइत कोइत तो मानित लेतेहे, आन तीस भाग, साट भाग आन हौ भाग फल आपतेहे.”21फाशुउ ईसु तियाहा कोयो, “दिवू पेटाड़ीत टोपलाआ नेत खाट्लाआ निसे मेकीइलोअ काजे लेतावत्ले के? बेलकाअ उसे मेकीइलोअ काजे लेतावत्ले ना?22जो किबी टापाअलो ओय तो उगड़ीत जाय आन हारेक निकाअली गोठी देखात जाय.23जियाहा उनाइलोअ कान होय तो उनाइत लेवा!”24फाशुउ तिये तियांहां कोयो, “तुमू जे गोठी उनाअताहा तियाआ बाप्तिमेहें सांबालित रोवा! जिया मापोवाअहीं तुमू मापित आपहा तियाज मापोवाअहीं तुमुहूं बी मापित जोड़े.25काहाके जियापोअ होय तियाहा फाशोअ जोड़े पोन जियापोअ कायनाहां तियाहा तियापोअ जो ओय तों बी बुउसीत लेवाय.”26फाशुउ ईसु कोयो, “देवोअ राज याअ होस होय, एक माहुंउं खेतोम बियारु पेई देहे.27आन राती हुवीत जाहे आन दिहे जागित उठेहे, आन तों बीज केहें कोइत उगेहे आन पोहाअहे, ओं तियाहा नाहां मुंदू जातू.28धरती तियी तियीइज फल आपेहे, पेल डिरा फुटताहा, तिहीं रोत सोंवें निहींतेहे, आन सोवोंमेहें मोटा दाणा.29पोन जेहेलामेहें ओन पाकीत जाहे, ताहां तो माहुंउं दात्ला वाअहीं वाडेहे, काहाके वाडीइलोअ वेल आवित लागीही.”30ईसु कोयो, “आपू देवोअ राजोहो किहाआ होस समजुहूं, किहाआ काईं पाड़ीत कोत आपहूं?31तो रायीइ दाणाअ होस होय. तियाहा ओइलो वेले पुंयी पोर्याअ आखा दाणा रोत हानू दाणू रोहे.32पोन वोडो ओवेहे तेहेलाम आखा पाजा पालाआ साड़ोम रोत वोडो पोहाअहे. तों एतोहो वोडो ओत जाहे के जुगोमेर्येए सिड़े तियाआ डालीपोअ पांजरु बोणावीत सेकतेहे.”33ईसु एहेलिही वारुज काईं पाड़ी पाड़ीइ तियांहां समजाय एहेलिही पद्धती वाअहीं संदेश कोत आपतुतो.34तो बिगर काईं कोया वासी कोड्लीज गोठ ने कोतुतो. पोन एखलामेहें तो तियाआ सेलाहां समजाड़ीत कोतुतो.35तेदिहींज हांजेपोअ ईसु तियाआ सेलाहां कोयो, “साला, आपू दोर्याअ तियी मेरे जात्ला.”36ताहां तियी गोरदीही सोड़ीत देत तो जेहलुहू ओतू तेहलुज ते हिद्लाआ नावड़ामेहें तियाहा लेताज गोया; आन तियांअरी बिहीरे बी नावड़े ओते.37तेताजमेहें वोडू वादुउ आयू, आन सेलकाआ नावड़ापोअ एताहा जाआं ठोकाआ वोल्या के, तिया नावड़ामेहें पाईं पोआओ वोल्यो.38पोन ईसु नावड़ामेहें फासाड़ीइ वोलेहे उहुट्यापोअ मुंड मिकीत हुवया कोअतुतो. तेहेलाम सेला तियाहा जागाड़ीत कोइत कोयो, “गुरु, आपू मोअहूं कोअताहा तेबी ताहूं कायनाहां विसार आवतू के?”39ताहां ईसु उठीत कोइत वाराहा आदेश आप्यू “ठावको ओत जा!” आन पाअयोंहो कोयो, “रुकात जा!” आन वादुउ बोंद ओत गोयू आन एकदम होक आयू.40ताहां ईसु तियांहां कोयो, “तुमू काहा बिताहा? तुमुहूं ओमे जाआं विश्वास कायनाहां के?”41पोन ते जुदाकाम बियाते आन एकान बिहीराहा कोना वोल्या, “वादुउ आन दोर्या बी याअ गोठी उनाअतेहे, ओ होय कोडु!”
The Word for the World International