लुक19
1ईसु यरीहोअहें रोत जाया कोअतुतो.2तिहीं एक जक्कय नावोअ नाकेदारोअ आधिकारी ओतू, तो जाअखीलुहू मालदार ओतू.3ईसु कोडू होय तो पालीइलोअ तिये कोशित कोअयी, पोन तो वांगरु ओतू तिहीं वाअहीं तियाहा ने देखीत सेकू.4ताहां तो ईसुहू पालीइलोअ काजे गुगदीइतुज आखा रोत आगाड़ी जातु रोयू आन एका उंबरोअ साड़ोअ उसे सोड़ीत लागू, काहाके ईसु तियीज वाटे आगाड़ी जानारु ओतू.5ताहां ईसु तियी जागे आयू, आन उसे पालित कोइत जक्कयोह कोयो, “ए जक्कय, वेगु निसे उतर, काहाके आज आंय ताअहीं रोनारु होय.”6ताहां जक्कय ताबुड़ निसे उतरीत खुसी वाअहीं तियाहा हादीत लेत गोयू.7आखे माअहें ओं देखीत कोइत टुटणे वोल्ये, के “ओ माटी पाप्योअहीं होगवाड़्यू गोयुहू!”8ताहां जक्कय उबू रोत कोइत प्रभुहू कोयो, “प्रभुजी, पाल, आंय माआं आरदी मालमिलकत गरिबोहों वाटीत आपी देनारु, आन एखापोअ ठोगित माग्योय, तों बी शार भाग वापिस आपी देनारु.”9ईसु तियाहा कोयो, “आज या कोअमेहें सुटका आयीही, काहाके ओ बी अब्राहामोअ पारवाड़ीइ बेटुह्हू होय.10काहाके माहुंउं बेटुह्हू टाकाअलाहां होदू आन वासाड़ू आयुहू.”11माअहें ए गोठी उनाअया कोअतेते तेहेलाजमेहें ईसु तियांहां एक काईं कोत आप्यी. काहाके तो येरुसालेमोअ आहनेज ओतू, आन तियां माअहुंहूं एहेलोह लागो देवोअ राज ओमेज प्रगट ओवनारो होये.12ताहां ईसु कोयो, “एक उसी जातीइ माटी राजाअ पद लेत वापिस आवीइलो काजे एखा दुर देसोम गोयू.13जाअलोअ पेल, तिये तियाआ दोह पावरोहों हाद्या आन आखाहा एकेक होनाअ रुप्यू आपित कोइत तियांहां कोयो, ‘आंय आविहीं ताअहूं जाआं यां पोशा वाअहीं वापारो कोअजा.’14पोन, तिहींइं रोनारे बाकी माहें तियाआ सीस कोअतेते, ताहरेए तियां तियाआ फासाड़ी थोड़ाक खबर्याहां मोकल्या, ‘ओ आमापोअ राज कोए ओं आमुहूं नाहां जोवतो.’”15“पोन तो माटी राजाअ पद मेलवीत फाशुउ वापिस आयू. ताहां जियां पावरोहों तिये वापारो कोए तेहें पोशा आप्याते तियांहां हादा मोकल्या, एताआ काजे के, तियां पोशा वाअहीं तियां केताहा कामावया तो तियाआ पालीइलोअ ओतो.16पेलठे आगाड़ी आवित कोयो, ‘मालिख, तुमे जो रुप्यू आप्युतो, तिहीं पोअ रोत आंय फाश्याआ होनाअ दोह रुप्या कामावया.’17ताहां तिये मालख्ये तियाहा कोयो, ‘हाजा पावर, तुमे हाजो कोअयो! तु थोड़ी गोठीमेहें इमानदार रोयू, तिहीं वाअहीं ओमे आंय ताहूं दोहो होयरोअ पुडारी बोणाविहीं.’18दुसरे पावरे आवित कोयो, ‘मालिख, ताआ तिया एक होनाअ रुप्या वाअहीं फाशाअ पास कामावया.’19तिये कोयो, ‘तु पास होयरों पोअ पुडारी बोणही.’”20“फाशोअ तिसरे पावरे आवित कोयो, ‘मालिख, ओ ले तुमे आपल्यु तो रुप्यू, आंय पोतड़ाआ सेड़े बांदीत मिकी देदूतो.’21माहूं ताआ बिक लागली, काहाके तु एक कड़क माहुंउं होय, जो ताआ ने ओय तों बी मागित लेत्लु आन जिहीं रोत ने ओअत्लु तिहीं रोत वाड्त्लु.22मालख्ये तियाहा कोयो, ‘आरे फोगा पावर! आंय ताआज शब्दे वापरीत ताहूं दोशी ठरवोहो! ताहूं मुंदूज ओतू के, आंय कड़क माहुंउं होय, आन माआं कायनाहां तों बी आंय लेत लेहो आन जो नाहां ओअयो तों बी वाडीत लेहो;23ताहां तुमे माआं पोशा वियात्ताज काहा नाहां आपी देदा? मोन्ज्ये आंय जेहेलाम वापिस आवतु, तेहेलाम माहूं वियाद तेबी जोड़ीत जातु.’”24“फाशुउ मालख्ये तिहीं आहने उबा रोनाराहां कोयो, ‘या पोअ रोत तो होनाअ रुप्यू वापिस मागित ल्या, आन जिया पोअ होनाअ दोह रुप्या होय तियाहा आपी द्या.’25पोन तियां तियाहा कोयो, ‘मालिख, तिया पोअ तोम पेल्लाआज होनाअ दोह रुप्या होये.’26मालख्ये कोयो, ‘आंय तुमुहूं कोहो, जिया पोअ होय तियाहा फाशोअ बी जोड़े, पोन जिया पोअ कायनाहां तिया पोअ जो ओय तों बी मागित लेवाय.27ओमे माआं तेए दुस्मोन जे माहूं कोताते ओ आमापोअ राज ने सालाड़ुहूं जोवे, तियांहां माआं जागे लेतावा आन माआं सामने माइत टाका.’”28ईसु ए गोठी कोत आपी देदी आन ताहरुउ तो उसे येरुसालेमोअहें आगाड़ी जातु रोयू.29आन जाहां तो जेयतुन डोगोपोअ बेथफागे आन बेथानीइ जागे आयू आन तेहेलाम तियाआ बेन सेलाहां आगाड़ी मोकल्या.30ए सुसना लेत के: “तुमाआं सामने जो खेडो गांव होय तिहीं जावा; तिहीं जाताज वाआ तुमुहूं एक एहेलोह गोदड़ाआ बासो बांदीत मेकल्यो देखाय, जिया पोअ कोडो केदिहींज नाहां बोठो, तियाहा सोड़ीत इंहीं लेत आवा.31जर तुमुहूं एखु फुसे के, तुमू याहा काहा सोडताहा, ताहां तियाहा कोवा, प्रभुहू याआ गरज होय.”32ताहां जियांहां मोकल्या ते तिहीं गोया आन ईसु जेहें कोइत कोयो तेहेंज कोइत देख्यो.33ते गोदड़ाआ बासो सोडत्ला तेहेलाम तियाआ मालख्ये तियांहां कोयो, “तुमू या गोदड़ाआ बासाहा काहा सोडताहा?”34तियां कोयो, “प्रभुहू याअ गरज होये,”35ते तिया गोदड़ाआ बासाहा ईसुउ जागे लेतावया. तियां सोताआ आंगड़े तिया गोदड़ाआ बासापोअ टाक्ये आन ईसुहू तियापोअ बोहाड़ी देदू.36जेहेलाम ईसु वाटे रोत जायाज कोअतुतो, तेहेलाम माअहें तियांआं साअके वाटे पोअ आथरीइतेज जातेते. येरुसालेमोम ईसुउ विजयी प्रवेश37जेहेलाम तो येरुसालेमोअ जागे जेयतुन डोगोअ उतीरता पोअ निसे आयू, ताहां तियाआ सेलाआ ते वोडी गर्दी तियां देखल्या तियां आखा समत्कारोअ बोदले देवोअ धन्यवाद आन स्तुती कोई वोल्यी.38“प्रभुउ नावसे आवनारु राजा आशिर्वादीत होय! होरगाम शांती, आन जुगोम देवोअ महिमा ओवे!”39गर्दीमेर्याअ थोड़ाक फरिसी ईसुहू कोना वोल्या, “गुरुजी, तुमाआं सेलाहां ठावका रोय तेहें कोत दे.”40ईसु उत्तर आप्यो, “आंय तुमुहूं कोहो, जर तें ठावके बोहे, ताहां डोणे आअड़े वोले!”41तो जेहेलाम आहने आवयू तेहेलाम तिये होयरोअहें पालीत तियाआ वोतीइ रोड़्यू,42आन कोयो, “जर आज तु ओं जाईंत लेतू के ताहूं होक किहा वाअहीं जोड़े! पोन ओमे तु तियाहा ने देखीत सेकत्लू.43एहेलिही वेल आवे के, जाहां ताआ दुस्मोन ताआ शारी मेरे रोत केंडवारीत वाड़ बांदे, आन तें शारी वोलेहे रोत तापोअ दाबाव टाके,44तें ताहूं आन ताआ विसमेहें रोनाराहां नावसट तुलो वालित टाकी देय; आन तापोअ डोणोपोर्युउ डोण ने रोअहूं देय, काहाके जाहां देव ताहूं वासाड़ीइलोअ कोअते ताआ जागे आयू, ताहां ते वेल तुमे ने ओलख्यी!”45ताहरुउ ईसु मंदिरोम गोयू आन तिहीं वापारो कोअनाराहां बारथे काडू वोल्यू,46आन तियांहां कोयो, “एहेलोह लेख्यो होय के, ‘माआं मंदिर प्रार्थनाआं मंदिर बोणे!’ पोन तुमू तियाहा बांडोअ हाडडू कोइत टाक्युहू.”47तो दाड़ख्युउ मंदिरोम शिक्शण आपू वोल्यू. डाया पुंजारा, नियम सिकाड़नारां मास्तर, माअहोंअ पुडारी तियाहा माइलोअ काजे तीताअताते.48पोन तेहलोहो कोइलोअ तियांहां कोड्ली वेल ने जोड़्यी, काहाके आखे माअहें तियाआ गोठ वारुहूं कान देत उनाअतेते.
The Word for the World International