लेवी8
1फाशुउ यहोवा देव मोशेहे कोयो,2“तू आरोन आन तियाआ बेटाह्हाआं आंगड़े, आन अभिशेकोअ तेल, आन पापोअ गाराहाआ काजे गोदू, आन बेनु मेडे, आन बिगर खमीरोअ रोटाआ टोपली लेत कोइत3मिलापवाला तोंबाआ बाओअ जागे लेताव, आन तिहींज आखी मंडड़ीही टोलु कोओ.”4यहोवा देवोअ या आदेशोअ परमाणे मोशे कोअयो; आन मंडड़ी मिलापवाला तोंबाआ बाओअ जागे टोलु वोल्यी.5ताहरुउ मोशे मंडड़ीही कोयो, “जो काम कोइलाआ आदेश यहोवा देवे आप्युहू तो ओं होय.”6ताहरुउ मोशे आरोन आन तियाआ बेटाह्हाहां आहने लेत जात कोइत पाअयों वाअहीं उंगलावया.7ताहां तिये तियांहां कोट पेवाड़्या, आन पोट्टू बांदीत कोइत तियांहां कुरतू पेवाड़ी देदू, आन एपोद लागाड़ीत कोइत गुथल्या पोट्टा वाअहीं एपोद बांदीत कोइत खुहीं देदू.8आन तिये सातीइ पोट्टू लागाड़ीत कोइत तियामेहें उरिम आन तुम्मीम मिकी देदे.9ताहां तिये तियाआ मुन्कापोअ पागड़ी बांदीत कोइत पागड़ीइ सामनेए वोल होनाआ पोट्टी, मोन्ज्ये सोकी पागड़ी लागाड़्यी, यहोवा देवे जेहें कोइत कोए तेहें कोयोतो, तेहेंज कोइत मोशे कोअयो.10ताहरुउ मोशे अभिशेकोअ तेल लेत कोइत रोअलाआ जागाहा आन जों किबी तिहींमेहें ओतो तियां आखाआ बी अभिशेक कोइत तियांहां सोको कोअयो.11आन तिया तेलोमेहें रोत थोड़ोक तेल लेत कोइत तिये देवान्यापोअ हांत वारी साटार्यो, आन पुरो सामान नेहें देवान्याआ आन पाअयोंअ तागारी आन तियाआ पाट्लाआ नेहें अभिशेक कोइत तियांहां सोको कोअयो.12मोशे अभिशेकोअ तेलोमेहें रोत जारिक आरोनोअ मुंडोपोअ टाकीत कोइत तियाआ अभिशेक कोइत तियाहा सोकू कोअयू.13फाशुउ मोशे आरोनोअ बेटाह्हाहां आहने लेतावीत कोइत, कुरता पेवाड़ीत कोइत, पोट्टू बांदीत कोइत तियांआं मुन्कापोअ टोपी मिकी देदी, यहोवा देवे मोशेहे आदेश आपल्याआ पुरमाणे तिये ओं कोअयो.14ताहरुउ मोशे पापोअ वोतीइ गाराहा कोइलाआ काजे गोदाहा जागे लेत गोयु; आन आरोन आन तियाआ बेटाह्हा जिवज्योअ आथ पापोअ गाराहा कोअते गोदाआ मुन्कापोअ मिक्या.15ताहरोअ तों गाराहा कोअयो, आन मोशे रक्त लेत कोइत आंगल्यी वाअहीं देवान्याआ शारू हिंगोअरी हारीत कोइत सोकाल्यो, आन रक्ताहा देवान्याआ थुड़ोम ओली देदो, आन तियाआ कोअते गाराहा इसीत कोइत सोको कोइलोअ काजे पास्तावू कोअयू.16आन मोशे आतापोऱ्यीइ आखी सरबी, आन कांअजापोऱ्यीइ सरबी, आन बेनु किडनीही लेत कोइत देवान्यापोअ पेटाड़्यो.17पोन बाकी उगरीइल्यू गोदाआ भाग मोन्ज्ये तियाआ सांबड़ो, माहां आन साआं तिये पोड़ावाआ बारथे आगीम पेटाड़्यो; यहोवा देवे आदेश आपल्याआ पुरमाणे मोशे ओं कोअयो.18फाशुउ मोशे होमजोणोअ गाराहाआ मेडाहा आहने लेत आवयू, आन आरोन आन तियाआ बेटाह्हां जिवज्योअ आथ मेडाआ मुन्कापोअ मिक्या.19ताहरोअ मोशे तियाहा गाराहा कोअयो, आन तिये तियाआ रक्त देवान्याआ मेरे-मेरे साटार्यो.20ताहरोअ मेडाआ तुकड़ा-तुकड़ा कोअया, आन मोशे मुन्को, सरबी आन तियाआ तुकड़ाहा पेटाड़्या.21ताहरोअ आते आन गुडा पाअयोंवाअहीं तुवया, आन मोशे पुरा मेडाहा देवान्यापोअ पेटाड़्यो, आन तों हाजो गुंदाअनारो गाराहा ओवयो. यहोवा देवे आदेश आपल्याआ पुरमाणे मोशे ओं कोअयो.22फाशुउ मोशे बिहीरा मेडाहा जों पुंजाराआ काजे इसल्यो ओतो, तियाहा आहने लेतायु, आन आरोन आन तियाआ बेटाह्हां जिवज्योअ आथ मेडाआ मुन्कापोअ मिक्या.23ताहां तियाहा गाराहा कोअयो आन मोशे तियाआ रक्तामेहें रोत जाराक लेत कोइत आरोनोअ हाजाड़्या कानोअ कोरेपोअ आन तियाआ हाजाड़्या आथोअ इंगाअठापोअ आन हाजाड़्या गुडाआ वोडा इंगाअठापोअ लागाड़्यो.24आन तो आरोनोअ बेटाह्हाहां आहने लेत गोयु, आन रक्तामेहें रोत जाराक रक्त एकेकाआ हाजाड़्या कानोअ कोरेपोअ आन हाजाड़्या आथ हाजाड़्या गुडाआ इंगाअठापोअ हार्यो; मोशे उगरीइल्या रक्ताहा देवान्याआ मेरेमेरे साटारी देदो.25आन तिये सरबी आन सरबीवाली सेपटी, आन आताआ उपर्यीइ आखी सरबी, आन कांअजापोर्यीइ सरबी नेहें बेनु किडनी, आन हाजाड़्यी जांग, यां आखाहा लेत कोइत आलाग मिकुहूं जोवे;26आन बिगर खमीरोवाला रोटाआ टोपली जे यहोवा देवोअ आगाड़ी मिकल्यी ओती, तियी टोपलीमेहें रोते एक रोटू, आन तेलोवाअहीं केलवीइल्या मोयदाआ एक रोटू, आन हाजाड़्यी जांगेपोअ मिकी देदू;27आन ए आखी वस्तु आरोन आन तियाआ बेटाह्हाआं आथोम मिक्यी, आन आलवीइलोअ भेटेए कोअते यहोवा देवोअ आगाड़ी उताऱ्यी.28ताहरुउ मोशे तियीं भेटेहे फाश्युउ तियांआं आथोम रोत लेत कोइत आगीइ गाराहाअरी देवान्यापोअ पेटाड़्यी, ए भेट हाजी गोंदेए कोअते ओवी.29ताहरुउ मोशे सातीही लेत कोइत आलवीइलोअ भेटेए कोअते यहोवा देवोअ आगाड़ी उताऱ्यी; ओज इसाअलू भाग मोशेए वाटाआ ओतू; यहोवा देवे आदेश आपल्याआ पुरमाणे मोशे कोअयो.30ताहरुउ मोशे अभिशेकोअ तेल आन देवान्यापोर्योअ रक्त, बेनुमेर्योअ जारजाराहा लेत कोइत आरोनोपोअ आन तियाआ आंगड़ापोअ, आन तियाआ बेटाह्हा आन तियांआं आंगड़ापोअ बी साटारी देदो; आन तिये आरोनोहो तियाआ आंगड़े आन तियाआ पोऱ्या आन तियांआं आंगड़े नेहें सोकाली देदे.31ताहरुउ मोशे आरोनोहो आन तियाआ बेटाह्हाहां कोयो, “ओं माहां मिलापवाला तोंबाआ बाअणाआ जागे रांदा, आन तों इसाअली टोपलीमेऱ्याआ रोटाअरी खावा, माआ आदेशोअ पुरमाणे आरोन आन तियाआ बेटाह्हां तियाहा खाअहूं जोवे.32माहां आन रोटामेर्योअ जों उगरीत जाय तियाहा आगीम पेटाड़ी देजा.33आन जाअहूं जाआं तुमाआ इसल्या दिही पुरा ने ओवे ताअहूं जाआं, मोन्जे हांत दिही जाआं मिलापवाला तोंबाआ बाअणाआ बारथे मा जाहा, काहाके तो हांत दिही जाआं सालतो रोय.34जेहें कोइत आज कोअयोहो तेहेलोज कोइलाआ आदेश यहोवा देवे आप्युहू, जियावाअहीं तुमाआ पाप टापाइत जाय.35तियाहा काजे तुमू मिलापवाला तोंबाआ बाओअ जागे यहोवा देवोअ आदेशोअ पुरमाणे हांत दिही आन हांत रात्यी रोजा, नेते तुमू मोअहा; काहाके माहूं एहें कोइत देवोअ आदेश जोड़्युहू.”36ताहां यहोवा देवोअ यांज आखा आदेशोअ परमाणे जे तिये मोशेवाअहीं आप्याते, आरोन आन तियाआ बेटाह्हां कोअयो.
The Word for the World International