इब्री9
1पेल्लीइ तियी शप्पतेम बी भक्तीइ बाप्तिमेहें सेवाआ नियम ओता, तो एक मोनवीइ बोणावल्यू एक सोकु जागू ओतू, जो यी धरतीपोर्युउ ओतू.2काहाके एक तंबू बोणायुतो, आन तिहींमेहें बेन खुली तियार कोअयीते, पेहली खुलीमेहें दिवाआ खांबू, रोटू मेकीइलोअ टेबल, आन भेटेए रोटू ओतू, आन तियाहा सोकु जागू कोतेहे.3बिहीरी खुली पोड़दाआ फासाड़ी ओती, तिया जागाहा जाअखु सोकु जागू कोतेहे.4तियामेहें होनाआं देवान्यो आन शारी ओरी होनावाअहीं निपल्यी शप्पतेए पेटी आन तिहींम मान्ना पोअल्यो होनाआं बासन आन आरोनोअ डेंगार जिहींम फुलेन-फलवे आवित गोयेते आन दगड़ाआ कोड़ल्यी शप्पतेए पाटी ओती.5तियापोअ बेन उजलाफट करुब ओता, जे दयासनोअ टापणापोअ सावलू कोइत ओता, ओं आखो एकेक कोइत फोड़ीत कोअलोअ ओंमे वेल कायनाहां.तंबाआ मायतेवालू भाग6यी पद्धती वाअहीं ए वस्तु तियार कोअयीते. तिया तंबाआ पेहली खुलीमेहें पुंजारा कायम माय जात कोइत सेवाआ कामे पुरे कोअत्ला.7पोन तंबाआ बिहीरी खुलीमेहें फक्त मुख्य पुंजारु पुरा वोऱ्ह्योंम एकुज वारी जाहे आन रक्त लेयावासी नाहां जातू; आन तों रक्त तियाहा सोताआ वोतीइ आन माअहोंअ पापोअ वोतीइ गाराहा आपीइलो काजे लेत जाअहूं पोड़ेहे.8यावाअहीं पवित्र आत्मा ओं सिकाड़ेहे के, जाअहूं जाआं तंबाआ पेहली खुली उबी होय ताअहूं जाआं दुसरी खुलीम जाअखा सोका जागाआ खुल्ली वाट कायनाहां.9ओ तंबू आज्याआ दिहोअ काजे एक नमुनू होय, मोन्ज्ये याआ अर्थ एहलोहो के जे भेट आन गाराहा आपतेहे तिहीं वाअहीं भक्ती कोअनाराआं बुद्दी हारीपुरी नाहां बोणीत सेकती.10काहाके तें फक्त खाअलोन पिइलोअ वस्तु आन बाती बातीइ सोकालीलोअ रितीइ आधारोपोअ दुन्यादारीइ नियम होय, जे हुदरिइलोअ वेल आवे ताअहूं जाआं ठरवाअला होय.11पोन ख्रिस्त जाहां आवनारी हाजी-हाजी वस्तुउ डायु पुंजारु बोणीत आयु, ताहां तिये जाअखा हाजा आन पाक्का तंबामेहें रोत आयु जो कोडा मोनवीइ आथेए नाहां बोणायू मोन्ज्ये यी कोलीइ नाहां,12आन बोकड़ान वासड़ाआ रक्तावाअहीं नाहां, पोन सोताआ रक्तावाअहीं एकुज वारी सोका जागाम गोयु, आन तिये हादाफल्यीइ सुटका लेत लेदी.13काहाके जाहां बोकड़ाआ आन बोलदोअ रक्त आन किलवड़ वासड़ीइ खाआं एठा माहूंपोअ हिपड़ीइतेहे, ताहां तिहींमेहें माहुंउं डिल सोको कोइलोअ ताकत होय.14ताहां जिये सोताआ जिवोहो अमर आत्मावाअहीं देवोअ सामने निर्दुस गाराहा कोत आपी देदू, तिया ख्रिस्ताआ रक्त तुमाआं बुद्दीही तुमू जिवता देवोअ सेवा कोअहूं जोवे काजे खाराब कामोम रोत केहें ने सोको कोइत सेके?15ख्रिस्त यीज गोठी वाअहीं देव आन माअहुंउं विसमेऱ्यीइ नोवी शप्पतोअ वोग्यु बी होय, तो याअ काजे काहाके तियाआ मोतो वाअहीं पेल्लीइ शप्पतेए वेले जो पाप ओवू तिहींम रोत सुटका जोड़ुहूं जोवे, आन जें माअहें वायदाअ परमाणे हादाअले तियांहां अमर जिवनोअ वाटू जोड़ुहूं जोवे.16काहाके, जिहीं शप्पत खावाअयीही तिहीं शप्पत खानाराआ मोत ओवोहो कोत पुरावू देखाड़ीलोअ बी गरज होय.17काहाके एहलीही शप्पत मोअत्ले ताहांज पाक्की ओवत्ली, आन जाअहूं जाआं शप्पत खानारु जिवतु होय ताअहूं जाआं ते शप्पत किज कामोअ नाहां रोती.18तिहींवाअहीं पेल्लीइ शप्पत बी रक्ता सिवाय नाहां लेदी.19काहाके जाहां मोशे कायदामेऱ्याआ आखा आदेश माअहुंहूं कोताप्या, ताहां तिये वासड़ाआ आन बोकड़ाआ रक्त लेत कोइत, पाईंन, लाल पोटको आन रुंगहाल खोड़ोवाअहीं तिया पुस्तकोपोअ ना आखा माहूंपोअ हितड़ी देदो.20आन ताहरोअ कोयो, “जे शप्पत पालीइलोअ देवे तुमाआं काजे आदेश आप्युहू तियी शप्पतेए ओं रक्त होय.”21आन तेहेंज कोइत तिये तंबापोअ आन सेवाआ आखा सामानोपोअ रक्त हितड़ी देदो.22खोरो पाल्ल्ये, कायदाआ परमाणे आखी वस्तु रक्ता वाअहीं सोकी ओवतिही, आन रक्त वोहाड़्या सिवाय गुनाआं माफी नाहां जोड़ती.23तिहीं वाअहीं होरगामेर्यीइ वस्तुउ नमुनो यी गाराहा वाअहीं सोको कोइलोअ गरज ओती, पोन यारोत बी जाअखी हाजी गाराहा वाअहीं होरगामेर्यीइ वस्तु सोकी कोआतिही.24काहाके ख्रिस्त आथोवाअहीं बोणावल्या तिया सोका जागाम जो खोरा सोका जागाआ नमुनू होय, तिहीं तो ने गोयू पोन होरगाजमेहें गोयू, मोन्ज्ये तो आपाअ काजे देवोअ सामने हजर ओत सेके.25जेहेंकोइत डायु पुंजारु जाअखा सोका जागामेहें वोऱ्ह्योअ डिठ डोगरान बोकड़ाआ रक्त लेत जाया कोअहे तेहेंकोइत ख्रिस्ताहा ताल-ताल सोताआ जिवन गाराहा ने कोअहूं पोड़तोतो.26तेहलोह रोतो ताहां ख्रिस्ताहा दुन्याअ सुरवातिही रोत सोताआ जिवोअ ताल-ताल दुख वेठुहूं पोड़तो. पोन यां आखरीइ दिहोमेहें सोताआ जिव गाराहा कोत आपीत पाप काडीत टाकीइलो काजे तो एक्कुज वारी प्रगट ओवुहू.27आन जेहलोहो मोनवीइ एकुज वारी मोइलो तिहींरोत न्यायनिवाड़ु ठरवीत मिक्युहू.28तेहेंज कोइत ख्रिस्ते बी जाअखीला जोओंअ पापोहों विसीत लेअलोअ काजे एकुज वारी गाराहा बोण्यु; आन बिहीरी वारी तो जें माहें तियाआ वाट जोवतेहे, तियांआं पापोअ काजे नाहां, पोन तियांआं तारणोअ काजे देखाये.
The Word for the World International