इब्री1
1देव जुना वाडोमेहें आपाआ वेगाआ डायहांअरी भविश्यवक्ता वाअहीं खेलवारी आन बाती-बातीइ पद्धतीमेहें गोठी कोअयी,2पोन यां आखरीइ दिहोमेहें तिये आपाअरी सोताआ बेटाह्हा वाअहीं गोठी कोअयिही, जियाआ आथो वाअहीं तिये पुरी कोल बोणायीही आन तियाहा आखी वस्तुउ वारीस बी ठरव्युहू.3तो देवोअ महिमाआं उजालो आन सोताहा देवोअ साप होय. आखी वस्तुहू तो तियाआ ताकतवाला वसनो वाअहीं सांबालेहे. तोज आखाआ पापोहो तुवीत कोइत उसा जागापोअ जो देवोअ देव होय, तियाआ हाजाड़ीइ वोलेहे जात कोइत बोठुहू.4देवोअ बेटुह्हू देवदुतों रोत बी जाअखु वोडु बोण्यू, देवे तियाहा देवदुतों रोत बी जास्ती उसो नाव आप्यो.5काहाके देवदुतों मेर्याआं कोडाहाज तिये काअहांज नाहां कोयो के,“तू माआं बेटुह्हू होय;आज आंय ताआ आब्हू ओवू.”आन फाशोअ एका देवदुतोहो बी तिये एहें नाहां कोयो के,“आंय तियाआ बाह्हू बोणिहीं,आन तो माआं बेटुह्हू बोणे.”6आन तिहीं रोत पेलठा बेटाह्हाहा यी धरतीपोअ मोकलीइली वेले तो एहें कोहे के,“आक्खा देवदुत तियाहा वोंदुहूं जोवे.”7आन देवदुतोंअ बाप्तिमेहें देव एहें कोहे के,“तो तियाआ दुतोहों वारो,आन दुड़ूदुड़ू पेटाअनारी आग बोणावेहे.”8पोन बेटाह्हाआ बाप्तिमेहें देव एहें कोहे,देवा, ताआ राज हादाजल्म्योंअ होय,तु ताआ माहूंपोअ धर्मी राजोवाअहीं राज कोअत्लू.9जो खोरो होय तियापोअ तु मेर कोअत्लू,आन जो सुकीइ होय तियाआ सीस कोअत्लू;तिहींज वाअहीं देव, ताआ देवे ताहूं निवड़्युहू, आन ताआ हेंगात्यों रोत जाअखी वोडी खुसी ताहूं आप्यीही.10आन तो एहें बी कोहे,“मालिख, सुरुवातिही तुमे यी धरतीइ पायू टाक्यु,आन जुग ताआ आथोअ कला होय.11तें ताम आरवात जानारे, पोन तु हादाजोलम रोनारु;आन तें आखे साअकाआ होस जुने ओत जानारे;12आन तु तियांहां सादराआ होस कोड़ी वाली देही;आन तें साअकाआ होसऱ्येए बोदलात जाय;पोन तु तोज होय,ताआ जिवन केदिहींज नाहां सेलाअतो.”13आन देव तियाआ देवदुतोंहों केदिहींज नाहां कोयो के,“जाअहूं जाआं आंय ताआ दुस्मोनोहों ताआ गुडाआ थुड़तेए पाट्लू ने कोइ देंव,ताअहूं जाआं तु माआं हाजाड़्यीइ वोल बोहो.”14ताहां ते देवदुत कोडा होय? ते आखा सेवा कोअनारे आत्मे होय, जें तारण स्विकारनाराआं सेवा कोए तेहें काजे मोकलीइल्ये रोतेहें.
The Word for the World International