उत्पत्ती5
1आदामोअ पारवाड़ ए होय. जाहां देवे माहुंहूं बोणावयो ताहां सोताआज रुपोम तियाहा बोणावयो.2तिये माटी आन बोईं एहेंकोइत माअहुंउं बोणावयो आन तियांहां आशिर्वाद आप्यू, आन तियांआं बोणावीइलाअ दिही तियांआं नाव आदाम मिक्यो.3जाहां आदाम एक होव तीस वोरह्योअ ओवू, ताहां तिया वाअहीं तियाआज होस तियाआज रुपोअ पुरमाणे एक पोर्यू उबज्यु. तिये तियाआ नाव सेत मिक्यो.4सेतोअ जल्माआ फासाड़ी आदाम आँठ होव वोरह्ये जिवतु रोयू, आन तियाआ फाशे बी पोर्यान पोर्यी उबज्ये.5एहेंकोइत आदाम पुरु नोव होव तीस वोरह्योअ ओवू; तिहींइं फासाड़ी तो मोइत गोयु.6जाहां सेत एक होव पास वोरह्योअ ओवू, ताहां तियाप रोत एनोश उबज्यु.7एनोशोअ जल्माआ फासाड़ी सेत आँठ होव हांत वोरह्ये जिवतु रोयू, आन तियाआ फाशे बी पोर्यान पोर्यी उबज्ये.8एहेंकोइत सेत पुरु नोव होव बारा वोरह्योअ ओवू; तिहींइं फासाड़ी तो मोइत गोयु.9जाहां एनोश नोव्वोद वोरह्योअ ओवू, ताहां तियाप रोत केनान उबज्यु.10केनानोअ जल्माआ फासाड़ी एनोश आँठ होव पोनर वोरह्ये जिवतू रोयू, आन तियाआ फाशे बी पोर्यान पोर्यी उबज्ये.11एहेंकोइत एनोश पुरु नोव होव पास वोरह्योअ ओवू; तिहींइं फासाड़ी तो मोइत गोयु.12जेहेलाम केनान सत्तर वोरह्योअ ओवू, ताहां तियाप रोत महललेल उबज्यु.13महललेलोअ जल्माआ फासाड़ी केनान आँठ होव सालिही वोरह्ये जिवतू रोयू, आन तियाआ फाशे बी पोर्यान पोर्यी उबज्ये.14एहेंकोइत केनान पुरु नोव होव दोहो वोरह्ये जिवतू रोयू; तिहींइं फासाड़ी तो मोइत गोयु.15जाहां महललेल पाहासाट वोरह्योअ ओवू, ताहां तियाप रोत येरेद उबज्यु.16येरेदोअ जल्माआ फासाड़ी महललेल आँठ होव तीस वोरह्ये जिवतू रोयू, आन तियाआ फाशे बी पोर्यान पोर्यी उबज्ये.17एहेंकोइत महललेल पुरु आँठ होव पोन्शान्नोव वोरह्योअ ओवू; तिहींइं फासाड़ी तो मोइत गोयु.18जाहां येरेद एक होव बाहासाट वोरह्योअ ओवू, ताहां तियाप रोत हानोक उबज्यु.19हानोकोअ जल्माआ फासाड़ी येरेद आँठ होव वोरह्ये जिवतू रोयू, आन तियाआ फाशे बी पोर्यान पोर्यी उबज्ये.20एहेंकोइत येरेद पुरु नोव होव बाहासाट वोरह्योअ ओवू, तिहींइं फासाड़ी मोइत गोयु.21जाहां हानोक पाहासाट वोरह्योअ ओवू, ताहां तियाप रोत मतुशेलह उबज्यु.22मतुशेलहोअ जल्माआ फासाड़ी हानोक तिन होव वोरह्ये जाआं देवोअ आरी आरी सालतु रोयू, आन तियाआ फाशे बी पोर्यान पोर्यी उबज्ये.23एहेंकोइत हानोक पुरु तिन होव पाहासाट वोरह्योअ ओवू.24हानोक देवोअ आरी आरी सालतुतो; ताहरुउ तो आरतात गोयु काहाके देवे तियाहा विसीत लेदू.25जाहां मतुशेलह एक होव सात्त्यांयशी वोरह्योअ ओवू, ताहां तियाप रोत लेमेक उबज्यु.26लेमेकोअ जल्माआ फासाड़ी मतुशेलह हांत होव ब्यांयशी वोरह्ये जिवतू रोयू, आन तियाआ फाशे बी पोर्यान पोर्यी उबज्ये.27एहेंकोइत मतुशेलह पुरु नोव होव एकोनसत्तर वोरह्योअ ओवू; तिहींइं फासाड़ी तो मोइत गोयु.28जाहां लेमेक एक होव ब्यांयशी वोरह्योअ ओवू, ताहां तियाआ एक पोर्यू उबज्यु.29तिये ओं कोत कोइत तियाआ नाव नोहा मेक्यो, “यहोवा देवे जो धरतीही हाराप आप्युहू, तियाआ बाप्तिम ओ पोर्यू आपाअ कामोम, आन तियी कोठीण मेहेंनतीम जो आपू कोअतेहे, आपुहूं आराम आपे.”30नोहाआ जल्माआ फासाड़ी लेमेक पास होव पोन्शान्नोव वोरह्ये जिवतू रोयू, आन तियाआ फाशे बी पोर्या आन पोर्यी उबज्ये.31एहेंकोइत लेमेक पुरु हांत होव सात्यात्तर वोरह्योअ ओवू; तिहींइं फासाड़ी तो मोइत गोयु.32आन नोहा पास होव वोरह्योअ ओवू; आन नोहापरोत शेम, आन हाम, आन येपेत उबज्या.
The Word for the World International