उत्पत्ती21
1जेहें कोइत यहोवा देवे साराआ काजे कोयोतो तेहेंज कोइत तिये ओर तियीइ कोइत तियाआ शब्द पुरो कोअयो.2सारा अब्राहामोप रोत पोटाअरी ओवी; आन तियीइ डायीपणीमेहें देवे ठरवीइल्यी वेलेपोअ तियीही एक सोऊ जोड़्यू.3अब्राहामे साराप रोत उबजीइल्या तिया पोर्याआ नाव इसाहाक मिक्यो.4आन जेहेलाम अब्राहामोअ पोर्यू इसाहाक आँठ दिहोअ ओवू, ताहां तिये देवोअ आदेशोअ परमाणे तियाआ खतना कोअयू.5इसाहाक उबजीइयू तेहेलाम अब्राहाम एक होव वोरह्योअ ओतू.6तेहेलाम सारा कोयो, “देवे माहूं ओंहाण्यीही; तियाहा काजे आखे उनाअनारे बी माअरी ओहें.”7फाशीइ तियी एहें बी कोयो, “सारा पोर्याहा बुजी खावाड़े एहें कोत अब्राहामोहों एकदू कोत सेकतोतो के? पोन पाला, माआ डायावाराम तियाआ एक सोऊ ओवू.”8तो पोर्यू वोडु ओवू आन तियाआ बुजी सुटी; आन इसाहाकोअ बुजी सुटी तेदिहीं अब्राहामे वोडी पांगात मिक्यी.9ताहां अब्राहामोप रोत उबजीइल्यु मिसरवाली हाजिराआ पोर्यू इस्माएल, ओ साराआ पोऱ्या इसाहाकोअरी रोमत्लाहा देखीत,10सारा अब्राहामोहो कोयो, “यी पावरीहीन पोर्याहा नेहें काडी दे; काहाके यीइ पोर्यू माआ पोर्या इसाहाकोअरी वारस नाहां ओवनारु.”11तियाआ पोर्याआ बाप्तिमेऱ्यीइ ए गोठ अब्राहामोहो जास्ती खाराब लागी.12पोन देवे अब्राहामोहो कोयो, “तिया पोर्यान ताआ पावरीइ वाखरी तु सिंता मा कोअही; सारा ताहूं जे गोठ कोय ते मानित ले; काहाके ओ इसाहाकुज ताआ पारवाड़ सालाड़े.13यी पावरीइ पोर्याप रोत बी आंय एक देस बोणावीहीं; काहाके तो हाआं ताआज पोर्यू होय.”14ताहरुउ अब्राहाम वेगर्युउ सिंजीवड़ाअरीही उठीत कोइत रोटून सांबड़ाआ थेयलीमेहें पाईं बी पोइत हाजिराआ खांदे मिकी देदोन तियीइ पोर्याहा बी आरी होपी देत तियीही मोकली देदी. ते निहीत गोयी आन बेर्शेबाआ रानोमेहें भटकी वोल्यी.15सांबड़ाआ थेयलीमेर्योअ पाईं सेलाइत गोयो, ताहां ते तिया पोर्याहा एका साड़ोअ थुड़ी मिकी देदो.16आन ते बिलखो ताइंत सोड़तेहे तेतीही सेटे जात कोइत तियाआ वोल फिरीत कोइत बोहीत गोयीन ताहरीइ तियी तियीइज कोनी वोल्यी, “या पोर्याआ मोत माआ नजरे ने पोड़ुहूं जोवे.” ताहरीइ ते तियाआ हुंबर बोठबोठी आअड़ी आअड़ीइ रोड़ी वोल्यी.17देवे तिया पोर्याहा रोड़त्लो उनाइत लेदो; ताहां देवोअ देवदूत होरगाम रोत हाजिराहा आअड़ीत कोइत कोयो, “हाजिरा, तु एवडी काहा खोताअयीही? बिही मा; काहाके ताआ पोर्यू जिहीं होय तिहीं रोत तियाआ आवाज देवे उनाइत लेदुहू.18उठ, ताआ पोर्याहा वारुहूं आखोल आन होमजाड़; काहाके आंय तियाप रोत एक वोडू देस बोणावीहीं.”19ताहां देवे तियीइ डोआ उगाड़ी देदा, ताहां तियीही एक वेए देखाअयी; ताहरीइ ते जात कोइत थेयलीम पाईं पोइत लेदोन तिया पोर्याहा पिवाड़्यो.20आन देव तिया पोर्याअरी रोयू; ताहरुउ तो हानू रोत वोडु ओवू, ताहां तो जंगलोम रोय-रोय तोंद्लीन बिलखीवालू पारद्यू बोणीत गोयू.21तो पारान नावोअ उजाड़ीमेहें रोया कोअतुतो, आन तियाआ आयही तियाहा मिसर देसोवाली लाडी होदीत आपी देदी.22तियां दिहोम एहेलोहो ओवो के अबीमेलेक आन तियाआ सेनापती पीकोल नेहें आवीत कोइत अब्राहामोहो कोना वोल्या, “जों किबी तु कोअहे तियामेहें देव ताअरी रोहे;23तियाहा काजे ओमे माअरी आन माआ पारवाड़ीइरी केदिहीं दोगु ने कोअहूं जोवे, पोन जेहेलीही आंय तापोअ माया कोअयीही तेहेंज कोइत तु बी मापोअ आन जिया देसोमेहें तु रोहे या माआ देसोपोअ कोअहूं जोवे, एहलिही देवोअ शप्पत खा.”24अब्राहामे कोयो, “आंय शप्पत खाहो.”25फाशुउ अब्राहामे अबीमेलेकोहो एकी वेईइ बाप्तिमेहें जे अबीमेलेकोअ सेवकहों जबरजस्ती मागीत लेदीते, तियाहा कोताप्य.26ताहरुउ अबीमेलेके कोयो, “माहूं ने मुंदू के कोडे ओं काम कोअयोहो; आन तुमे बी माहूं नाहां कोयो, आन आंय याआ बाप्तिमेहें पेल काविहीं उनाअयू.”27ताहरुउ अब्राहामे मेडे, डोगरेन बोकड़े अबीमेलेकोहो आप्ये; आन तियां बेनू शप्पत लेदी.28अब्राहामे गोवाराम रोत मेडाआ हांत बासे आलाग कोइत मिक्ये.29ताहरुउ अबीमेलेके अब्राहामोहो फुश्यो, “जें तुमे आलाग कोइत मिक्येहे यां हांत मेडाआ बासाआ की काम होय?”30ताहां अब्राहामे उत्तर आप्यो, “तु माआ आथे यां हांत मेडाआ बासाहा स्विकार कोअहूं जोवे, ताहां आंयुंज यी वेईइ खुंउनारु ओतू कोत तु माआ साक्शीदार बोणही.”31तियां बेनू जोओं जे तियी जागे शप्पत खादी तियाहा कोत तिया जागाआ नाव बेर्शेबा पोड़्यो.32जाहां तियां बेर्शेबामेहें शप्पत खादी ताहां अबीमेलेक आन तियाआ सेनापती पीकोल उठीत कोइत पलिश्तीइ देसोम वोलीत जाता रोया.33ताहरुउ अब्राहामे बेर्शेबामेहें एक एसेल नावोअ साड़ ठांअयों आन तिहीं हादाजलम्याआ यहोवा देवोअ आराधना कोअयी.34अब्राहाम पलिश्तीइ देसोम पारकू बोणीत जाअखीलाहा दिही जाआं रोयू.
The Word for the World International