उत्पत्ती12
1यहोवा देवे अब्रामोहो कोयो, “ताआ देस, ताआ कुटूंबाहा, आन ताआ आब्हाआ कोओहो सोड़ीत कोइत तिया देसोम जातु रो जो आंय ताहूं देखाड़ीहीं.2आन आंय तापोअ रोत एक वोडी पिड़ी बोणावीहीं, आन ताहूं आशिर्वाद आपीहीं, आन ताआ नाव वोडो कोअहीं, आन तू आशिर्वादोअ थुड़ो बोणीहीं.”3“जों ताहूं आशिर्वाद आपे, तियाहा आंय आशिर्वाद आपीहीं;आन जों ताहूं हाराप आपे, तियाहा आंय हाराप आपीहीं;आन धरतीपोर्याआ आखा माअहुंहूं तावाअहीं आशिर्वाद जोड़े.”4यहोवाअ यी शप्पतेए पुरमाणे अब्राम जानू वोल्यू, आन लोट बी तियाअरी जानु वोल्यू; आन जेहेलाम अब्राम हारान देसोम रोत निहीयु तेहेलाम तो पोन्शात्तर वोरह्योअ ओतू.5एहें कोइत अब्राम तियाआ लाडी सारे, आन तियाआ पायहोअ पोर्या लोटोहो, आन जे मालमिलकत तियां कामायीते, आन जें जनवारे तियां हारान देसोम मेलव्येते, आखाहा लेत कोइत कनान देसोम निहीत पोड़्यु; आन ते कनान देसोमेहें आवीत लागा.6तिया देसोअ मांय रोत जाअलाअ वेले अब्राम शकेम, जिहीं मोरेए सोको साड़ होय, पोत्यु. तियी होमसे तिया देसोम कनानी माअहें रोतेते.7ताहां यहोवा अब्रामोहो दर्शन आपीत कोइत कोयो, “ओं देस आंय ताआ पारवाड़ीही आपीहीं.” आन तिये तिहीं यहोवाअ कोअते, जिये तियाहा दर्शन आप्योतो, एक देवान्यो बोणायो.8फाशुउ तिहीं रोत आगाड़ी जात कोइत तो तिया डोगोपोअ आयू, जो बेथेलोअ होयरोअ उक्तामाअहें होय, आन तियाआ तोंबू तिया जागाम उबू कोअयू जियाआ बुट्टामाअहें तोम बेथेल आन उक्तामाअहें एय होय. तिहीं बी तिये यहोवाअ कोअते एक देवान्यो बोणायो आन यहोवाअ आराधना कोअयी.9आन अब्राम आगाड़ी जात कोइत देहामा देसोअहें जातु रोयू.10तिया देसोम काल पोड़्यु: तियाहा काजे अब्राम मिसर देसोम जिवण्युज जातु रोयू काहाके देसोमेहें वोडु काल पोड़्युतो.11ताहरोअ एहेलोहो ओयो के मिसर देसोअ आहने पोतीत कोइत, तिये तियाआ लाडी साराहा कोयो, “उनाआ, माहूं मुंदू होय के तू एक हाजी बी बोईं होय;12आन जाहां मिसरवाले माअहें ताहूं देखे ताहां कोये, ‘ए तियाआ लाडी होय,’ ताहां तें माहूं ते माइत टाकनारे, पोन ताहूं जिवतीज मिकीत लेनारे.13तियाहा काजे तु एहें कोजी, ‘आंय तियाआ बोअह्हीं होय,’ ताहां तावाअहीं माआं हाजो आवे, आन माआ जिव तावाअहीं वासाय.”14ताहरुउ अब्राम मिसरोम आयू, तेहलाम मिसरवाले माअहें तियाआ लाडीही देखीत हाजी बी होय कोयो.15आन फारोअ आधिकारह्यों देखीत कोइत फारोअ सामने तियीइ वोडाय कोअयी; तियाहा काजे तियीही फारोअ कोअमेहें पोताड़ी देदी.16आन फारो तियीइ वाखरी अब्रामोअ हाजो कोअयी; आन तियाहा मेडे, डोगरेन बोकड़े, पावर-पावरीइं, गोदड़ी, आन उटड़े आप्ये.17पोन यहोवा फारो आन तियाआ घराणापोअ, अब्रामोअ लाडी साराआ वाखरी वोडी वोडी पिड़ा टाक्यी.18ताहरुउ फारो अब्रामोहो हादीत कोयो, “तुमे माअरी ओं की कोअयोहो? तुमे माहूं काहा नाहां कोयो के ए ताआ लाडी होय?19तुमे काहा कोल्यो के ए ताआ बोअह्हीं होय? आंय यिही माआंज लाडी बोणावीइलाअ काजे लेत गोयू; पोन ओमे ताआ लाडीही लेत कोइत इंहीं रोत जातुरो.”20आन फारो तियाआ माहुंहूं तियाआ बाप्तिम आदेश आप्यू आन तियां तियाहा आन तियाआ लाडीही, आखी तियाआ मालमिलकोत नेहें जों आखो तियाआ ओतो तों लेत मोकली देदो.
The Word for the World International