गलाती2
1सुहूद वोर्ह्योंअ फाटी आंय बरनबासोअरी फाशुउ येरुसालेमोमेहें गोयू, आन तितुसोह बी आरी लेत गोयू.2माअ जाअलोअ देवोअ दर्शनोवाईं ओवो; आन जे हाजी बातमी आंय बिगर यहुदीमेहें परसार कोअहो, ते आंय तियांहां कोतापी देदी, पोन जे पुढारी जेहें गोणाअताते तियांहां एताज एखलामेहें कोताप्यी, काहाके माआं पेल्लीइ आन ओमेएं मेहेंनत वाया ने जाअहूं जोवे.3पोन तितुसोह बी जो माअरी ओतू, आन जो युनानी होय, तियापोअ खतना कोइलोअ काजे दाबाव ने टाक्यु.4ओं प्रश्न तियां वाईं उबो ओवो जे मोनेज आवित विश्वासी ओवीइलोअ ढोंग कोअताते, काहाके ख्रिस्त ईसुमेहें जोड़ल्यी सुटकाहा गुलाम कोइलोअ तियांआं इश्शा ओती.5एक घेड़ी जाआं तियांआं गोठ मानिइलोअ आमू मान्य ने कोअयो, काहाके खोरी हाजी बातमी तुमामेहें टिकीत रोअहूं जोवे.6फाशाआ जे माटी पुढारी कोत गोणाअताते, ते जे किबी गोणाअताय तियांअरी माआं कायने लेणो-देणो, काहाके देव कोडाआ भेदभाव नाहां कोअतू. पोन माहूं तियांप रोत कीज नोवी गोठ ने जोड़्यी.7पोन याआ उलट जेहेलाम तियां देख्यो के, जेहलोहो खतना कोअल्या माअहोंअ काजे हाजी बातमी कोअलोअ काम पेत्राहा होपी देदो, तेहलोज खतना ने ओवला माअहोंअ कोअते हाजी बातमी कोअलाअ काम माहूं होप्योहो.8काहाके जिये देवे पेत्रा वाईं यहुदी माअहूंमेहें तियाआ सेक्ती वाईं प्रेशितपणोअ कामे कोआड़्ये, तियेज माहूं बी बिगर यहुदी माअहूंमेहें प्रेशितपणोअ कामे कोआड़्ये.9आन जेहेलाम याकोब, केफा, आन योहान जे मंडड़ीइ पुढारी कोत गोणाअताते, तियां जाइंत लेदो के, माहूं ओं खास काम देवे होप्योहो; ताहां तियां माहूं आन बरनबासोहो संगतीइ आथ मिलाड़्यु, एताआ काजे के आमू बिगर यहुदीइ जागे जात सेको आन ते खतना ओवला माअहोंअ जागे जात सेके;10तियां एतोज कोयो के, आपू गरब्योंअ कालजी लेअहूं जोवे. आन आंय या कामोहों कोइलोअ काजे सोताहा बी कोशित कोअतुतो.11पोन जाहां केफा अंताकियाम आयू, ताहां आंय याअ सोबासोबी लागू काहाके तो खोरीज सुकूतो.12काहाके याकोबोअहीं रोत थोड़ेक माअहें आविइलाआ पेल तो बिगर यहुद्यांअरी बोहीत खाया कोअतुतो, पोन जेहेलाम तें आये, तेहेलाम खतनावाला माअहोंहों देखीत फाटी होरकीत गोयू, आन एक तोड़्युज जानु वोल्यू.13तियाअरी थोड़ेक यहुदी माअहें बी ढोंगड़ा कोए वोल्ये, तेतोज नाहां पोन बरनबास जाआं तियांअरी ढोंगड़ाम पोड़ीत गोयू.14पोन मी तियांहां देख्या के ए हाजी बातमीइं खोरी वाटेपोअ बोराबर नाहां सालता, ताहां आंय केफाहा कोयो, “तू यहुदी ओत बी बिगर यहुदीइ होस सालेहे, यहुदीइ होस नाहां सालतू, ताहां तू बिगर यहुद्याहां यहुदीइ होस साले तेहें काहा कोहे?”15आमू ते तुर्याआज यहुदी होय, तियां बिगर यहुदी पाप्योंअ होस नाहां.16तेबी माहुंउं कायदाआ परमाणे काम कोइलो वाअहीं नाहां, पोन ईसु ख्रिस्तापोअ विश्वास कोइला वाअहीं धर्मी ठरेहे, ओं ओलखीत आमू सोताहा बी ख्रिस्त ईसुपोअ विश्वास कोअयू; एताआ काजे के कायदा पालनो वाईं नाहां, पोन ख्रिस्तापोअ विश्वास कोइलो वाईं आमू धर्मी ठरीत सेको; काहाके कायदा पालनो वाईं कोड्लोज माहुंउं धर्मी नाहां ठरनारो.17ताहां, जें आपू ख्रिस्तामेहें धर्मी ठरुहूं होदतेहे, पोन आपूज पापी निहींये, ताहां का ख्रिस्त पापोअ सेवक होय के? बिलकुल बी नाहां!18काहाके जो किबी आंय वेसड़ी देदो आन वापिस फाशुउ तियाहा बोणावतुय, तेहें कोइत ताहां आंय सोताहा गुनाम तोआहो.19काहाके आंय ते कायदा वाअहीं कायदाआ काजे ख्रिस्ताअरी मोइत गोयू, तो एताआ वाखरी के आंय देवोअ काजे जिवीत सेको.20“आंय ख्रिस्ताअरी क्रुसखांबोपोअ सोढ़वाअयुहू, ओमें आंय जिवतु नाहां रोयू, पोन ख्रिस्त मामेहें जिवतु होय, ओमे आंय जो शरीरोम जिवतु होय, तो देवोअ बेटाह्हापोर्याआ विश्वासो वाईं जिवतु होये, जिये मापोअ मेर कोइत सोताआ जिवन माआं काजे आपी देदो.”21आंय देवोअ मेरवानीहीं नाहां नाकारतू, पोन जर एखो कायदा वाईं धर्मी ठरतोय, ताहां याआ अर्थ होय ख्रिस्ताआ मोइलोअ वाया ओवो!
The Word for the World International