यहेज्केल31
1इग्यारवा वोरह्योअ तिसरा मोयनाअ पेलठे दिही यहोवा देवोअ ओं वसन माआ जागे पोतो:2“ए मोनव्योअ पोर्या, मिसरोअ राजा फारोहो आन तियाआ माअहोंहों को:“सोताआ वोडायीमेहें तु कोडाआ बोराबर होय?3पाल, आश्शूर ते लोबानोनोअ एक देवदार साड़ ओतो जियाआ बाहरी बाहरी डाल्यी,जाअखीलुहू सावलू आपत्ली आन जाअखीलिही उसी ओती;आन तियी डाल्यीइ सिगू जुगोम जाआं पोतीत गोयुतो.4पाईं तियाहा वोडो कोअयो, पाईंन पाईं तिहीं वाअहीं साड़ उसो पोहाअयो,जियावाअहीं खाड्यी तिया साड़ोअ शारु मेरे वोहतीते;आन तियाप रोत निहींनारे हाने वोखले निहीत कोइत रानोमेर्याआ आखा साड़ोअ जागे पोत्तेते.5तिहीं वाअहीं तो साड़ रानोमेर्याआ आखा साड़ोम रोत वादार उसो गोयो;तियाआ डाल्यी जाअखीलीही ओत गोयी, तियाआ लोग्यी नांबीही ओत गोयी,काहाके ते जेहेलाम फुटी ताहां पाईं जाअखीलोहो जोड़्यो.6तियाआ डाल्यीमेहें जुगोमेर्येए आक्खे सिड़े रोतेते,आन तियाआ लोग्यी थुड़ते आक्खी बातीइ रानोमेर्येए जिवजन्तु उब्जीइतेते;आन तियाआ सावलामेहें आक्खी वोडे देसे रोतेते.7तो तियाआ पोहाइलोअ आन तियाआ नांबी लोग्यी वाअहीं तो बाहरी ओवो;काहाके तियाआ मुले जाअखा पाअयोंअ जागे ओते.8देवोअ बोगीसाआ देवदार साड़े बी तियाहा ने टापित सेकतेते,सनोवर साड़े तियाआ डाल्यीइ हारके बी ने ओते,आन ने आर्मोन साड़ तियाआ डाल्यीइ हारके ओते;देवोअ बोगिसाआ बी कोड्लोज साड़ बाहरी देखाइलोम तियाआ बोराबर ने ओतो.9आंय तियाहा वादार डाल्यी वाअहींज होबातो बोणायोतो,एतोहो होबातो बोणायोतो के एदेनोअ आखे साड़े जें देवोअ बोगिसामेहें ओते,तें तियाहा कुहूराअतेते.10“तिहीं वाअहीं यहोवा देवे एहें कोहे: तों उसो वादीत गोयो, आन तियाआ सिगू जो वाद्लाहा जाआं सिबीत लेदो, आन तों उसो वादल्यो कोत तियाहा वोडाय सोड़्यी;11तियाहा काजे देसोमेहें जो ताकतवान होय, आंय तियाआज आथोम तियाहा कोइ देहीं, आन तो खरीज तियाअरी खाराब वेवारो कोए. तियाआ खाराब कामोवाअहीं आंय तियाहा काडी देदुहू.12बिहीरा देसोमेऱ्याआ जुदाज पारका माअहूं तियाहा तोड़ीत उडाड़्यो: तियाआ डाली डोगोपोअ आन बारीमेहें पोड़ीत रोयेहे. देसोमेएं आखी बारीमेहें तियाआ डाली मुड़ात पोड़ीत रोयीही.13तिया पोड़ल्या साड़ोपोअ जुगोमेर्येए आखे सिड़े बोहतेहे, आन तियाआ लोग्यीपोअ रानोमेर्येए आखे जिव-जनवारे आवित सेकतेते.14ओं याअ काजे ओवो के पाअयोंअ जागर्याअ आखा साड़ोमेहें रोत कोडो सोताहा जाअखो उसो ने वादुहूं जोवे, आन ने तियाआ सिगू वादलाम जाआं पोताड़ुहूं जोवे, आन तियांमेर्येए जेत्ते पाअयोंअ जागे रोत कोइत मजबुत ओत गोयेहे ते उसे वाद्येहे कोते उसेज ने पालुहूं जोवे, काहाके तें बी आक्खे माहांणोम गाड़ल्या माअहोंअ होस मोतोअ ताबाम कोइत अधोलोकोम टाकी देवाय.”15“यहोवा देव एहें कोहे: जेदिहीं तो अधोलोकोम उतरीत गोयु, तेदिहीं आंय विखु कोआड़्यु आन उंडा दोर्याहा टापी देदो, आन नोयीइ जाअखीलोहो पाईं रुकाइत गोयो; आन तियाआ वाखरी आंय लोबानोनोपोअ नाराजी टाकी देदी, आन रानोमेर्येए आखे साड़े कोमाइत जाय.16जेहेलाम आंय तियाहा माहांणोम डाटल्या माअहोंअ जागे अधोलोकोम टाकी देदो, ताहां तियाआ पोड़ीइलोअ आवाजो वाअहीं आखा देसोअ माअहें बित गोये, आन एदेनोमेएं आखे साड़े मोन्ज्ये लोबानोनोअ आखे हाजे हाजे साड़े, जेतेहे तिहीं पाअयोंअ जागे ओते, तियां आखा अधोलोकोमेहें शांती मिलव्यी.17ते बी तियाअरी बोहनारे तियाआ हाती तियाअरीज तारवाइ वाअहीं मोल्याआ जागे अधोलोकोम उतरीत गोये.18“तियाहा काजे महिमा आन वोडायीइ बाप्तिमेहें एदेनोअ साड़ोमेहें रोत तु कोडाआ होस होय? तु ते एदेनोमेऱ्याआ साड़ोअरी अधोलोकोम उतरीही, आन विण खतना वालाआ माअहुंउं विसमेहें तारवाइ वाअहीं मोअनाराअरी पोड़ीत रोही. फारो आन तियाआ आखा माअहोंअरी एहेलोहो ओवे, यहोवा देवोअ ओंज वसन होय.”
The Word for the World International