यहेज्केल1
1तिसवा वोरह्योअ शोवथा मोयनाआ पाशवे दिहे, आंय यहेज्केल पुंजारु, बुजीइ पोर्यु, खास्द्याआं देशोअ कबार खाडीइ मेरे इस्राएलवाला वेठार्यांअरी ओतू; तेहलाम होरगो उगड़ीत गोयो, आन आंय देवोअ दर्शन देख्यो.2यहोयाकीन राजाआ तोआइलोअ पाशवा वोरह्योअ शोवथा मोयनाआ पाशवे दिही;3खास्द्या देशोअ कबार खाडीइ मेरेपोअ देवोअ वसन बुज्यीइ पोऱ्या यहेज्केल पुंजाराआ जागे पोतो आन तियाहा देवोअ सेक्ती प्रगट ओवी.4जाहां आंय पाल्यो ताहां पालामाआ वोग रोत वोडू वादुउ आवत्लू देखाअयू. जुगोम जुदो विजलीइतोतो आन वाद्लो डोअवाअतोतो. तिया वाद्लाआ शारी वोल उजवड़ पसरीत ओती आन तियाम इसत्लेए होस कि तेबी देखाअयो.5आन तियाआ विसमेहें रोत शार जिव निहींया, ते जिव मोनव्योअ होस देखाअताते.6तियां आखाआ शार-शार मुख आन शार-शार फाके ओते.7तियांआं गुडा होल्लाज ओता, आन तियांआं पाट्ल्यी वासड़ाआ खुर्योअ होस ओत्यी; ते जिव फोला उजाल्ल्या इस्त्लेए होस सोमकीइताते.8तियांआं शारी वोल फाकड़ाआ थुड़ते माहुंउं होसुज आथ ओता, आन शारु जिवोअ मुख आन फाकड़े एहें कोइत ओते:9तियांआं फाके एकान एकाअरी लागीत ओते; ते जिव सालीइलो वेले हुदाज सालताते आन ते ने वोलताते.10तियां आखाआ सामनेवालो मुख मोनवीइ होस ओतो; आन हाजाड़्यो मुख सिहांआ होस, बांगाड़्यो मुख बोलदोअ होस आन फासाड़ीइ मुख मोरागाआ होस ओतो.11शारु जिवोअ बेन-बेन फाके उसेए वोल पसरीत ओते. तियांआं फाके एकान एकाअरी जुड़ात ओते. बाकी बेन-बेन फाका वाअहीं ते तियांआं डिल टापित ओता.12ते जिवज्योअ मुखोअ वोल सिदा सालताते; जियी वोल आत्मा लेत जाय तियी वोल ते जाताते; पोन सालीइलोअ वेले ने वोलताते.13ते जिव आगीमेर्याआ जलजल कोअनारा आराआ आन दिवीइ होस देखाअताते, आन तियांआं विसमेहें आग फिऱ्या कोअतीते; तिहीं वाअहीं भोबलीइतोतो आन तिहींम रोत विज निहींतीते.14तियांआं सालीइलो-फिरीइलोअ ते विजेए होस ओतो.15जेहेलाम आंय यां शारु जिवोहो पाल्याज कोअतुतो, तेहलाम पुयींपोअ टेकीत रोल्ये शार साकारे देखाअये. शारु जिवोअ काजे एकेक साकारो ओतो.16साकाराआ रुप आन बोणावट मोगला डोणोअ होस ओती आन तें एकसारकेज देखाअतेते. आन तियांआं बोणावट मोन्ज्ये एका साकाराम दुसरो साको एहेलिही ओती.17सालतामेहें तें साके शारी वोल सालीत सेकतेते, पोन ने वोलतेते.18तियां शारु साकाराआ कोंड्ली जास्ती वोडी आन बिवाड़े एहेलिही ओती. तियीं शारु कोंड्लीइ शारु सोमकीर डोआन डोआ ओता.19जेहेलाम ते जिव सालताते, तेहलाम तें साके बी आरीज सालतेते. ते जिव पुंयीपोअ रोत उसे उडताते, तेहेलाम साके बी आरीज आखलाअतेते.20जियी वोल ते जिव जाताते, तियी वोल तें साके बी जातेते; काहाके तियां जिवोअ आत्मा तियां साकामेहें ओती.21ते जेहेलाम सालताते, तेहलाम एं साके बी आरी सालतेते, आन ते जिव उबा रोताते, ताहां तें साके बी रुकाअतेते. जेहेलाम ते पुयींपोअ रोत उसे उडताते तेहेलाम साके बी आरीज उडतेते; काहाके तियां जिवोअ आत्मा तियां साकाम ओती.22तियांआं मुंडीपोअ जुगमोंड्लाआ होसर्योअ जुदोज किवानीइ तेबी ओतो. तों बोर्फाआ सारकोहो जुदो पिपलीइतोतो. आन तों तियांआं मुंडीपोअ पसरीत रोयोतो.23जुगमोंड्लाआ निसे तियांआं फाके एकान एकाआ वोल सिदे पसरीत ओते; शारु जिव बेन बेन फाका वाईं सोताआ डिल टापित लेताते.24सालतामेहें तियांआं फाकाआ फोपड़ीइलोअ आवाज आवतुतो. तो आवाज दोर्याआ उपाड़ाआ होस, सर्वसेक्तिमानोअ आवाज जेहें, नेताहां फोला ते सेयनिकोअ हालसाल जेहें हासवाअतुतो; जेहेलाम ते उबा रोताते, तेहेलाम तियांआं फाके निसे पाड़ीत लेताते.25तियांआं मुंडीपोअ जो जुगोअ होस ओतो, तिहींपोअ रोत एक आवाज आवतुतो; आन जाहां जाहां ते जिव उबा रोताते, ताहां ताहां तियांआं फाके निसे कोइत लेताते.26जों जुगमोंड्लो तियांआं मुंडीपोअ ओतो, तियापोअ निलमोंड्याआ होसर्यीइ बोणावल्यी राजगादी ओती. तियी राजगादीपोअ माहुंउं जेहें कि तेबी देखाअतोतो.27तियाआ कंबरेएहीं रोत उसर्युउ भाग उजाल्ल्या इसत्लेए होस देखाअतुतो, आन तियाआ शारु सोमकीर आग जेहें देखाअतीते; तिहीं रोत तिया माहुंउं कंबरेएहीं रोत निसर्युउ भाग थोड़ुक आगीइ होस देखाअतुतो. आन तियाआ सोमकीर उजालो पसरीत रोयोतो.28जेहलोहो वोरहातोअ दिहोमेहें बाण देखाअहे, तेहेलोहो शारुसोमकीर उजालो देखाअतोतो. देवोअ सेक्ती तेहेलीज ओती, आन तियाहा देखीत आंय उबडू पोड़ीत गोयू; ताहां एखाआ गोगीइलाआ होस आवाज होंबलाअयू.
The Word for the World International