निर्गमोअ पुस्तक निर्गमोअ पुस्तक37
1बसालेले बाबल्योअ लाकड़ाआ एक शप्पतोअ पेटी बोणावयी; ते आड़ीस आथ नांबी, डेड़ आथ सोवड़ी, आन डेड़ आथ उसी ओती.2तिये तियी पेटीही मायतेन बारथे सोका होना वाअहीं मोडाड़्यी. आन तियीइ शारु वोल होनाआ कोर बोणावयी.3तियी पेटीइ शारु पायाहा लागाड़ीइलोअ काजे एकी वोग बेन आन बिहीरी वोग बेन एहें कोत कोड़ी लागाड़्यी.4फाशा पवित्र पेटी उसलीत लेत जाअलोअ कोअते तियां बाबल्योअ लाकड़ाआ बेन डांडा बोणावया आन तियांहां होना वाअहीं मोडाड़्या.5शप्पतोअ पेटी आखलीइलोअ काजे ते डांडा बेनू वोगेहे तियीं कोड़ीमेहें टाक्या.6तिहीं रोत तिये सोका होनाआ दयासनोअ टापणो बोणावयो; तियाआ लांबी आड़ीस आथ आन सोवड़ाय डेड़ आथोअ ओती.7तिये होनो टाकीत कोइत बेन करुब देवदूत दयासनोअ बेनू मेरे पोअ बोणावये.8एक करुब एकी मेरे आन एक करुब बिहीरी मेरे पोअ बोणावयू; तिये तियांहां होनाआ एकाज तुकड़ा वाअहीं बोणावया.9तियां करुबोअ फाके उपोअ रोत एहलेहे पसरीइये, के तिहीं वाअहीं दयासन टापाअयोतो, आन तियांआं सोब हुंबाहुंब आन दयासनोअ टापणाआ वोल कोइत ओती.10फाशोअ तिये बाबल्योअ लाकड़ाआ रोटाआ टेबल बोणावयू; तो बेन आथ नांबू, एक आथ पोलू, आन डेड़ आथ उसू ओतू;11आन तिये तियाहा सोका होना वाअहीं मोडाड़्यू, आन तियामेहें शारी वोगेहे होनाआ एक वाड़ बोणायी.12आन तिये तियाआ काजेहे शार आंगली पोली कोर बोणायी आन यी कोरीइ काजे शारी वोगेहे होनाआ वाड़ बोणावयी.13तिये रोटाआ टेबलोअ काजे होनाआ शार गोल कोड़ी बोणावीत कोइत तियां शारु पायाआ शारु खुणामेहें लागाड़्यी.14ते कोड़ी कोरीइ जागे खुणापोअ ओती, तिहींमेहें डांडा टाकीत टेबल उसलीइता आवतुतो.15तिये टेबल उसलीइलोअ कोअते तियां डांडाहा बाबल्योअ लाकड़ाआ बोणावया आन तियांहां होना वाअहीं मोडाड़्या.16तिहीं तिये टेबलोपोर्येए बासने मोन्जे पारात, तुमाणाआं बासन, वाटका, जेग आखे सोका होनाआ बोणावये.17तिये सोका होनाआ दिवाआ खांब बोणायू. ओ दिवाआ खांब तियाआ पाट्ली, तियाआ डांडू, तियाआ वाटी, तियाआ डुड्ड्या आन तियाआ फुले ओं आखो पुरा एकाज तुकड़ाआ बोणायो.18या दिवाआ खांबाम सोव फेगड़ा ओता; ते एकी वोग तिन आन एकी वोग तिन ओता;19तियां आखा फेगड़ामेहें बादामोअ फुलोअ होस एकेक डुड्ड्यू आन एकेक फुल बोणायो; एकी वोग बी तेहेंज कोइत तिनू फेगड़ाम बादामोअ फुलोअ होस एकेक डुड्ड्यू आन एकेक फुल बोणायो; दिवाम रोत निहील्या तियां सोव फेगड़ाआ बोणावट एहेंज कोइत ओवी.20आन दिवाआ डांडामेहें बादामोअ फुलोअ होस डुड्ड्यान फुलोअरीज शार वाटकी ओती.21आन दिवाम रोत निहील्यी सोव डालीमेहें रोत बेन बेन डालीइ निसे एक एक पेर दिवाअरीज एकाज तुकाड़ाआ बोण्यी.22पेर आन डाली आखे दिवाअरीज एकाज तुकड़ाआ बोण्यी; आखु दिवू सोका होना वाअहीं आन एकाज तुकाड़ाआ बोणावयोतो.23आन तिया दिवाआ खांबोअ हांत दिवा आन सिपटा आन वाटकी सोका होनाआ बोणायी.24तिये आखा सामानोअरीज दिवाहा एक आंदास शोवतीस किला सोका होनाआ बोणावयो.25फाशोअ तिये बाबल्योअ लाकड़ाआ तुमाणाआ देवान्यो बी बोणावयो; तियाआ लांबी आन पोली एक एक आथोअ ओती; तों शार खुणाआ बोण्यो, आन तों बेन आथोअ उसो ओतो; आन तियाआ हिंगे एकुज तुकाड़ाआ बोणायेते.26उपऱ्याआ खुणा, तियाआ शारु वोल हिंगोअरीज तुमाणाआ देवान्याहा सोका होना वाअहीं मोडाड़्यो; आन तियाआ शारु वोल होनाआ एक वाड़ बोणायी,27आन तियीइ वाड़ीइ निसे तियाआ बेनू मेरेपोअ तिये होनाआ बेन कोड़ी बोणावयी, देवान्यो आखलीत लेत जाअलो काजे.28आन डांडाहा तिये बाबल्योअ लाकड़ाआ बोणावये, आन होना वाअहीं मोडाड़्यो.29मोशे सोको तेल आन अभिशेकोअ तेल तुमाणाआ काजे गोंदेए इसाबो वाअहीं बोणावयो.
The Word for the World International