निर्गमोअ पुस्तक निर्गमोअ पुस्तक33
1फाश्यो यहोवा मोशेहे कोयो, “तु तियां माअहुंहूं जियांहां मिसर देसोम रोत सोड़वीत लेतायुहू आरी लेत कोइत तिया देसोम जा, जियाअ बाप्तिमेहें आंय अब्राहाम, इसाहाक आन याकोबोअरी शप्पत खात कोइत कोयोतो, के आंय तियाहा तुमाआ पारवाड़ीही आपीहीं.2आन आंय ताआ आगाड़ी आगाड़ी एका देवदूतोहो मोकलिहीं, आन कनानी, एमोरी, हित्ती, परिज्जी, हिव्वी, आन यबूसी माअहोंहों काडी देहीं.3तुमु तिया देसोम जावा जियामेहें दुद आन मोदोअ ताऱ्यी गोलतीही; पोन तुमू वोडाऱ्ये होय, तिहीं वाअहीं आंय तुमाआ विसमेहें ओत कोइत ने सालनारु, एहेलोह ने ओवुहूं जोवे के आंय तुमुहूं वाटे मेहें आरवीत देहीं.”4ए खाराब खबर उनाइत कोइत ते माअहें विसारोम पोड़ीत गोये; आन कोडोज तियांआं होनाआ सामान ने पोवयो.5काहाके यहोवा देवे मोशेहे कोत देदोतो, “इस्राएलोहो माआ ओं वसन कोत देखाड़, ‘तुमू ते वोडाऱ्ये होय; जर आंय थोड़ाक वेलोअ काजे तुमाआ विसमेहें ओत कोइत सालीहीं, ताहां तुमुहूं आरवीत टाकीहीं. तियाहा काजे ओमे तुमाआ डिलोपोअ रोत गोवणो काडीत मिका, ताहां आंय तुमाआ कि कोइलोअ तों आंय कोअहीं.’”6तिहीं वाअहीं इस्राएलवाले होरेब डोगोअहीं रोत आगाड़ी तियांआं बिगर गोवणाआ रोये.7मोशे पोड़ावाआ तोंबुहू बाअथे मोन्जे सेटे बोणावया कोअतुतो, आन तियाहा मिलापवालू तोंबु कोतुतो. जिया कोडाहा बी यहोवा देवोहो काविहीं फुसीइलोअ रोयो, ताहां तिया मिलापवाला तोंबाआ जागे जातेते.8जेहेलाम जेहेलाम मोशे तोंबाआ जागे जातुतो, ताहां ताहां आखे माअहें उठीत कोइत तियां तियांआं तोंबाआ बाअणापोअ उबे रोत जातेते, आन मोशे तिया तोंबामेहें फोहे ताअहूं जाआं तें तियाअहें ठावकेज पालीत रोतेते.9जेहेलाम मोशे तिया तोंबामेहें फोहतुतो, ताहां वाद्लाआ खांब उतरीत कोइत तिया तोंबाआ बाअणापोअ रुकाइत जातुतो, आन यहोवा मोशेएरी गोठी कोअतुतो.10आन आखे माअहें जेहेलाम वाद्लाआ खांबोहो तोंबाआ बाअणापोअ उबू रोल्यू देखतेते, तेहलाम उठीत कोइत जिवज्योअ तोंबाआ बाअणापोअ रोत पागे पोड़तेते.11एखा दोस्तीइरी गोठी मिकतेहे तेहें कोइत यहोवा देव मोशेएरी हुंबाहुंब गोठी कोअतुतो, आन मोशे ते पोड़ावाम आवतु रोतुतो, पोन तियाआ सेवक नुनोअ पोऱ्यु यहोशवा तो तोंबू सोड़ीत बारथे ने निहीतुतो.12मोशे यहोवाहा कोयो, “उनाआ तु माहूं कोहे के, ‘यां माहुंहूं लेत साल;’ पोन तु माअरी कोडाहा मोकलीइनारु तों नाहांजी कोयो. तेबी तुमे कोयोहो, ‘आंय ताहूं नावो वाअहीं ओलखोहो, आंय ताआ बाप्तिम खुस होय.’13आन ओमे जर मापोअ मेरेए नजर ओय, ताहां माहूं ताआ वाट देखाड़, जिया वाअहीं आंय ताआ सेवा कोइत सेकहीं आन हमेशा ताहूं खुस कोइत सेकहीं. एं आखे माअहें ताआ होय ओं तू ओर मिकजी.”14यहोवा देवे कोयो, “आंय सोताहा ताअरी आविहीं आन आंय ताहूं आराम आपिहीं.”15ताहां मोशे देवोहो कोयो, “जर तू आमाअरी ने आवनारु ओय, ताहां आमुहूं इंहीं रोत आगाड़ी मा मोकलिही.16तु आमा वाअहीं खुस होय ओं आमुहूं की कोइत सोमजाय? तू आमाअरी आवही ताहांज आंय आन एं माअहें नेहें दुन्यामेऱ्याआ माअहूं रोत फरक होय ओं तियांहां समजाय ना?”17ताहां यहोवा देवे मोशेहे कोयो, “तुमे जों कोयोहो तों आंय कोअहीं; काहाके आंय तापोअ खुस होय आन आंय ताहूं ताआ नावो वाअहीं ओलखोहो.”18मोशे कोयो, “मेरवानी कोइत माहूं ताआ महिमाआ उजालो देखाड़.”19तिये कोयो, “आंय ताआ आगाड़ी ओत कोइत सालतु रोत ताहूं माआ आखी हाजी गोठी देखाड़ीहीं, आन ताआ हुंबर यहोवाअ नावोअ परसार कोअहीं; आन जिया पोअ आंय मेर कोइला कोअहीं तियाज पोअ मेर कोअहीं, आन जियापोअ दया कोइलाआ कोअहीं तियाजपोअ दया कोअहीं.”20फाशोअ तिये कोयो, “तु माआ मुखोअ दर्शन नाहां लेत सेकतू; काहाके माहुंउं माआ मुखोअ दर्शन लेत कोइत जिवतो नाहां रोत सेकतो.”21फाश्योअ यहोवा कोयो, “उनाआ, माआ जागे एक जागू होय, इंहीं तु तिया खोड़कापोअ उबू रो;22आन जाअहूं जाआं माआ उजालो ताआ सामने रोत ने जाय, ताअहूं जाआं आंय ताहूं खोड़काआ कापड़ाटामेहें मिकीहीं आन आंय आगाड़ी निहीत जाहीं ताअहूं जाआं माआ आथो वाअहीं ताहूं टापित मिकीहीं;23तिहींइं फासाड़ी आंय माआ आथ काडीत लेहीं, ताहां तु माआ डिलोअ दर्शन लेही; पोन माआ सोबीइ दर्शन ने मिले.”
The Word for the World International