निर्गमोअ पुस्तक निर्गमोअ पुस्तक29
1“तियांहां सोको कोइला काजे जो काम ताहूं तियांअरी कोइलाआ होय के ते माआं काजे पुंजाराआ काम कोए, तों ओं होय: एक निर्दुस डोगरान बोकड़ाआ बासो आन बेन निर्दुस मेडा लेजा,2आन खमीरोअ रोटू, आन तेलोम कुहूंणीइल्या लोटो वाअहीं बोणावल्या मोयदाआ बिगर खमीरोअ सान्क्ये, आन तेलोवाअहीं बोणावल्या खमीरोअ पापड़ी बी लेजा. ओं आखो गोवोंअ मोयदाआ बोणावजा.3तियांहां एकी टोपलीम मिकीत कोइत तियी टोपलीही तिया डोगराआ बासाहा आन तियां बेनू मेडाहां आरी लेत आवजा.”4“फाश्योअ आरोन आन तियाआ पोऱ्याहा मिलन तोंबाआ बाअणाआ आगाड़ी लेतावीत कोइत पाअयों वाअहीं उंगलावजा.5ताहां तियां आंगड़ाहा लेतावीत कोइत आरोनोहो कोट आन एपोदोअ आंगड़ो पोवजी, आन एपोद आन सातीइ पोट्टू बांदजी, आन एपोदोअ कलाकारी वाअहीं कोअल्या कामोअ पोट्टू बी बांदजी;6आन तियाआ मुंडोपोअ पागड़ी मिकजा, आन पागड़ी पोअ सोकी सुटी मिकजा.7ताहां सोको तेल लेत कोइत तियाआ मुन्कापोअ ओलीत कोइत तियाहा अभिशेक कोअजी.”8“फाश्योअ तियाआ पोऱ्याहां तिहीं लेतावीत कोइत आंगड़े पोवाड़जी.9आन तियांआं मोन्जे अहरोनोअ आन तियाआ पोऱ्याअ कंबर बांदजी आन तियांआं मुन्कापोअ टोपी मिकजी; जिया वाअहीं पुंजाराआ पद पोअ हादाजोलम तियांआं हक्क रोय. एहें कोइत आरोनोअ आन तियाआ पोऱ्याआ सांवसार कोअजा.”10“ताहां डोगराआ बासाहा मिलन तोंबाआ हुंबर लेतावजी. आरोन आन तियाआ पोऱ्ये, बासाआ मुन्कापोअ तियांआं आथ मिकुहूं जोवे,11ताहां तिया डोगराआ बासाहा यहोवा आगाड़ी मिलापवाला तोंबाआ बाअणाज पोअ गाराहा कोअजा,12आन डोगराआ बासाआ रक्तामेहें रोत थोड़ोक लेत कोइत ताआ आथोअ आंगी वाअहीं देवान्याआ हिगोंपोअ लागाड़जी, आन आखो रक्त देवान्याआ पायाआ जागे रेसवी देजी.13आन जियी सरबी वाअहीं आते टापाइत रोतेहे, आन जे कांअजापोअ रोनारी सरबी, आन बेनू किडनीही तियाआ उपऱ्यीइ सरबी आरी लेत कोइत आखो देवान्यापोअ पेटाड़जा.14पोन वासड़ाआ माहां, आन सांबड़ो, आन साआं, पोड़ावाआ बाअथे आगीम पेटाड़ी देजा; काहाके ओं पापोअ गाराहा रोय.”15“फाश्योअ एक मेडो लेजा, आन आरोन आन तियाआ पोऱ्या तियाआ मुन्कापोअ तियांआं आथ मिके,16ताहां तिया मेडाहा गाराहा कोअजा, आन तियाआ रक्त लेत कोइत देवान्याआ शारु वोल हितड़ावजा.17ताहां तिया मेडाहा डुन्का डुन्काज कोअजा, आन तियाआ आते आन गुडा तुवीत कोइत तियाआ डुन्काहा आरीज मिकजा,18आन तिया आखा मेडाहा देवान्यापोअ पेटाड़जा; तो ते यहोवाअ काजे आगीइ गाराहा रोय; तो यहोवाआ काजे खुसी आपनारी गोंद होय.”19“फाश्योअ बिहीरा मेडाहा लेजा; आन आरोन आन तियाआ पोऱ्या तियाआ मुंडोपोअ सोताआ आथ मिकुहूं जोवे.20ताहां तिया मेडाहा बली कोअजा, आन तियाआ रक्ताम रोत थोड़ोक लेत कोइत आरोन आन तियाआ पोऱ्याआ हाजाड़्या कानोअ मुंडोपोअ, आन तियांआं हाजाड़्यु आथ आन हाजाड़्यु गुडाआ आकड़ापोअ लागाड़जी, आन रक्ताहा देवान्यापोअ शारु वोलेहे साटारी देजा.21फाश्योअ देवान्यापोऱ्योअ रक्त आन अभिशेकोअ तेल, यां बेनुमेहें रोत थोड़-थोड़ो लेत कोइत आरोन आन तिया आंगड़ापोअ, आन तियाआ पोऱ्या आन तियांआं आंगड़ा पोअ बी हितड़ावी देजा; ताहां तो तियाआ आंगड़ाआ आरीज, आन तियाआ पोर्या बी तियांआं आंगड़ा आरीज सोके ओत जाय.”22“ताहां मेडाहा होपाअलो होय कोत तियाम रोत सरबी आन वोडी सेपटी, आन जियी सरबी वाअहीं आते टापाइत रोतेहे तियाहा, आन कांअज्याअरी सरबी, आरीज बेनू किडनी आन हाजाड़ी जांग लेजा,23आन बिगर खमीरोअ रोटाअ टोपली जे यहोवाअ आगाड़ी तोअयी ओय तियाम रोत बी एक रोटू, आन तेलोम केलवीइल्या मोयदाआ एक रोटू, आन एक सान्की लेत कोइत,24ओं आखो आरोन आन तियाआ पोऱ्याआ आथोम मिकीत कोइत डोलवीइलाअ भेट ठरवीत यहोवा देवोअ सामने डोलवी देजा.”25“ताहां तिया वस्तुहू तियांआं हाथोम रोत लेत आगीइ गाराहा देवान्यापोअ पेटाड़ी देजा, जिया वाअहीं तो यहोवा आगाड़ी खुसी आपनारी गोंद आवे; यहोवाअ काजे आगीइ गाराहा होय.26“फाश्योअ आरोनोअ होपाअलो जों मेडो रोय तियाआ सातीही लेत कोइत डोलवीइलाअ भेटेए काजे यहोवाअ आगाड़ी डोलवीइजा; आन तो ताआ भाग रोय.27“आन आरोन आन तियाआ पोऱ्याआ होपाअलो जों मेडो ओय, तियाम रोत डोलवीइलाअ भेट साती जे डोलवीइनारे होय ते आन होपाअली मांडी यां बेनुहूं तु सोकालजी.28आन ए हादाजलम्यीइ रिती पोअ इस्राएलोअ वोल रोत आरोन आन तियाआ पोऱ्याअ भाग ठोरे, काहाके ए होपल्यी गाराहा ठऱ्यीही; आन ए इस्राएलोअ वोल रोत तियांआं शांतीबलीम रोत यहोवा काजे होपाअलो गाराहा होय.”29“आरोनोअ जें सोके आंगड़े रोय ते तियाआ फासाड़ी तियाआ पोऱ्याअ पोर्याहा यांहां मिलते रोय, जिया वाअहीं तियांहां पेवीत रोल्या तियांहां तेल ओलीत अभिशेक आन निवड़ कोअजा.30तियाआ पोऱ्या मेहें रोत जो तियाआ जागा पोअ पुंजारु ओय, तो जेहेलाम सोका जागामेहें सेवा कोइला काजे मिलापवाला तोंबामेहें पेल आवे, ताहां तिया आंगड़ाहा हांत दिही जाआं पेवित रोय.31“फाश्योअ पुंजाराआ होपाअलो जो मेडो ओय तियाहा लेत कोइत तियाआ माहां सोका जागा मेहें रांदजा;32ताहां आरोन तियाआ पोऱ्याअ आरी तिया मेडाअ माहां आन टोपला मेऱ्युउ रोटू, बेनू मिलापवाला तोंबाआ बाओपोअ खाय.33सोताहा सोका ओवीइलोअ काजे जो रोटू तियां गाराहा कोत आप्यू आन तियाहा तेंज खाअहूं जोवे, पोन बिहीरे तो ने खाअहूं जोवे, काहाके तो सोकू होय.34जर होपाअलो माहां नेत रोटामेहें रोत थोड़क वेगीइ जाआं उगरे, ताहां उगरीइल्यो तियाहा आगीमेहें पेटाड़ी देजा, तो ने खाअहूं जोवे; काहाके तो सोको रोये.35“आंय ताहूं जो जो आदेश आप्युहू तियाआ पुरमाणे तु, आरोन आन तियाआ पोऱ्या नेहें कोअजा; आन हांत दिही जाआं तियांआं सांवसार कोअजा,36मोन्ज्ये पापोअ गाराहाआ काजे एक डोगराआ बासो पापोअ माफीइ वेले सोको कोअजा, आन तियाहा सोको कोइलाआ काजे तियाहा अभिशेक कोअजा.37हांत दिही जांआं देवान्याहा सोको कोअजा, ताहां तों सोकाम सोको ठोरे; आन जो कोडो नेत जो किबी तियाहा टेकीत जाय तों बी सोको ओत जाय.”38“जो ताहूं देवान्यापोअ दाड़ीइज सोड़वुहूं पोड़े तों ओं होय: दाडीइज एक एक वोरहोअ बेन मेडाआ बासे.39एक मेडाअ बासाहा वेगीइ वेले, आन बिहीरा मेडाआ बासाहा हांजेए वेले गाराहा कोअजा.40आन पेल्लाआ मेडाआ बासाहा आन सिपड़ीत काडल्यो जेयतुनोअ बेन लिटर तेल, तेलोमेहें कुहूंणीइल्यु मोयदाआ लोट आन भेटेए कोअते दाराक्शाआ रोहो ओं अर्पण कोअजा.41हांजेए वेले बी बिहीरो मेडाआ बासो गाराहा कोअहूं जोवे आन तियाअरी वेगीइ कोअयोहो तेहेंज कोइत ओनोअ आन रोहोअ गाराहा आपुहूं जोवे; ओं यहोवा देवोहो गोमनारो गाराहा होय.42तुमाआ पिड़ीइ ते पिड़ी मेहें जाआं यहोवाअ आगाड़ी मिलापवाला तोंबाआ बाओपोअ हादाफोल एहेंज कोइत आगीइ गाराहा ओवतु रोय; ओं तो जागू होय जिया मेहें आंय तुमू माअहोंहों याअ कोअते मिल्या कोअहीं के ताअरी गोठी कोअहीं.43ओ तो जागू होय जिहीं आंय इस्राएलोहो मिल्या कोअहीं आन तो तोंबु माआ उजाला वाअहीं सोकू ओत जाय;44आन आंय मिलापवाला तोंबाहा आन देवान्याहा सोको कोअहीं, आन आरोन आन तियाआ पोऱ्याहा बी सोको कोअहीं के ते माआ काजे पुंजाराआ काम कोए.45आन आंय इस्राएलोअ विसमेहें रोहीं, आन तियांआं देव बोणिहीं.46ताहां ते जाईंत लेय के आंय यहोवा तियांआं देव होय, जो तियांहां मिसर देसोम रोत याआ कोअते काडीत लेतायुहू के तियांआं विसमेहें रोअहूं आयू; आंयुज तियांआं देवो यहोवा होय.”
The Word for the World International