निर्गमोअ पुस्तक निर्गमोअ पुस्तक27
1“फाश्योअ देवान्यो बाबल्योअ लाकड़ाआ, पास आथ नांबी आन पास आथ पोली बोणावजी; देवान्यो शार खुण्यो जोवे, आन तियाआ उसी तिन आथोअ जोवे.2आन तियाआ शारु खुणापोअ शार हिंग बोणावजा; तो एकुज तुकड़ाआ जोवे, आन तियाहा तांबाआ वाअहीं मोडाड़जा.3आन तियाआ खाँआं विसीइलोअ बासन, पावड़ो, वाटकी, दाताल पावड़ो, सुपड़ी बोणावजा; तियाआ आखो सामान इसत्लेए बोणावाड़जा.4तियाआ काजे इसत्लेए जालीइ एक सारी बोणावाड़जी; आन तियाआ शारी वोल मुन्कापोअ इसत्लेए शार आकड़ा लागाड़जी.5आन तियी इसत्लेए सारीही देवान्याआ शारी वोल सुटीइ निसे एहें कोइत लागाड़ावजी के तो देवान्याआ उसेए पोरापोर जाआं पोते.6आन देवान्याआ काजे बाबल्योअ लाकड़ाआ डांडू बोणावजा, आन तियांहां तांबाअ वाअहीं मोडाड़जा.7आन डांडू कोड़ीमेहें टाकजा के जाहां जाहां देवान्यो उसलीइलोअ वेल आवे ताहां ताहां ते तियाआ बेनू मेरेपोअ रोय.8देवान्याहा रिपे मेकीत कावलो बोणावजा; जेहेलोहो तो या डोगोपोअ ताहूं देखाड़्योहो तेहेलोज बोणावजा.”9“फाश्योअ रोअलाअ खोली बोणावजा. तियाआ देहामाआ भागोअ काजे पात्ला हुतो बोणल्यो साअकाआ पोड़दू जोवे, तियाआ नांबी होव आथोअ जोवे; एके मेरे एतोज जोवे.10आन तियाआ काजे विही खांब बोणे, आन तियांआं काजे इसत्लेए विही कप्पा बोणे, आन खांबोअ कुंडे आन तियांआं पोट्टी सांदीइ जोवे.11आन एहें कोइत खोलीइ पालामाआ वोल लांबीमेहें बी होव आथ नांबी पोड़दा जोवे, आन तियांआं काजे बी विही खांबे आन तियांआं काजे तांबाअ विही कप्पा जोवे; आन तियाआ खांबोअ कुंडे आन पोट्टी सांदीइ जोवे.12फाश्योअ पोली खोलीइ काजे बुड्तामाआ वोलेहे बावीस मीटर नांबा पोड़दा जोवे, तियांआं काजे दोहो खांबे आन कप्पा बी दोहो जोवे.13उगता वोल खोली पोली पोन्नास आथोअ जोवे.14खोलीइ बाअणाअ वोल पोनर आथोअ पोड़दा जोवे, आन तियांआं काजे खांब तिन आन कप्पा तिन जोवे;15आन बिहीरी वोल बी पोनर आथोअ पोड़दा जोवे, तियांआं काजे बी खांबे तिन आन कप्पा तिन जोवे.16खोलीइ बाअणाआ काजे एक पोड़दू बोणावजा, जो निलू, जामण्यु आन रात्ला रंगोअ पात्ला हुतोअ साअकाआ बोणल्यू पोड़दू विही आथोअ जोवे, तियाआ काजे खांबे शार आन कप्पा बी शार जोवे.17खोलीइ शारु वोल आखे खांबे सांदीइ पोट्टीही जोड़ात रोल्ये जोवे, तियांआं आकड़ा सांदीइ आन कप्पा तांबाआ जोवे.18खोली होव आथ नांबी पोन्नास आथ पोली, आन तियाआ पोड़दू पास आथ उसू जोवे, आन तो पोड़दू पात्ला हुतोअ बोणल्यू जोवे, खांबोअ कुर्सी तांबाआ जोवे.19रोअलो जागाअ कोअते राज्या राज्यामेहें बासने आन आखो सामान आन तियाआ आखा खुटा आन खोलीइ बी आखा खुटा तांबाआज जोवे.”20“फाश्योअ तु इस्राएलोहो आदेश आपजी, के माआ जागे दिवाआ काजे कुटीत कोइत काडल्यो जेयतुनोअ हाजो तेल लेत आवजा, जिया वाअहीं दिवू हादाफल पेटाअतु रोय.21देवोअ हजरीइ तोंबामेहें, तिया विसमेऱ्याआ पोड़दा वाअहीं बाअथे जो साक्शीपत्राअ आगाड़ी ओय, आरोन आन तियाआ पोऱ्ये दिवू हांजेए वेले रोत ते वेगीइ जाआं यहोवा देवोअ आगाड़ी होबाड़ीत मिके. ए विधी इस्राएलोअ काजे हादाजलमीइ बोणित रोय.”
The Word for the World International