निर्गमोअ पुस्तक निर्गमोअ पुस्तक25
1यहोवा मोशेहे कोयो,2“इस्राएलोहो ओ कोजा के माआ काजे भेट लेतावे; जेतेहे तियांआं इश्शा वाअहीं आपिइलोअ कोए तियां आखा पोअ रोत माआ भेट लेजा.3आन जियी वस्तुउ भेट तियांपोअ रोत लेअलोअ होय ते ए होय; मोन्जे होनो, सांदी, तांबो,4निलो, जामण्यो, आन रात्ला रंगोअ कापड़, पात्ला हुतोअ कापड़, बोकड़ाआ सिंग्ये,5रात्ला रंगोवाअहीं रंगल्यो, जाट्याल मेडाआ सांबड़ो, सुस नावोअ वोडा मासाआ, बाबल्योअ साड़,6दिवाआ काजे तेल, अभिशेकोअ तेल आन हाजो गोंदाय तेहें गोंदाण्यो तेल,7एपोदोमेहें आन सातीइ पोट्टामेहें लागाड़ीलोअ काजे सुलेमानी डोणोअ मोंड्ये.8तें माआ वोतीइ एक सोकु मंडप बांदे ताहां तियामेहें आय रोहीं.9जो किबी आंय ताहूं देखाड़ोहो, मोन्जे रोअलोअ जागू आन तियाआ आखा सामानोअ नमुनू, तियाआ होस तुमू माअहें तियाहा बोणावजा.”10“बाबल्याआ साड़ोअ एक वायदाआ पेटी बोणावजा; ते आड़ीस आथ नांबी आन पोली डेड़ आथ आन उसी डेड़ आथ जोवे.11आन तियीही सोका होना वाअहीं मायतेन बाअथे मोडाड़जा, आन पेटीइ उपोअ शारु वोलेहे होनाआ कोर बोणावजा.12तिहीं रोत तियां शारु गुडापोअ, होनाआ शार कोड़ी टाकाड़ीत कोइत एकी वोलेहे बेन आन एकी वोलेहे लागाड़ी देजा.13फाशाआ बाबल्योअ लाकड़ाआ डेंगारा बोणावीत लेजा, आन तियांहां बी होना वाअहीं मोडाड़जा.14आन डेंगाराहा पेटीइ बेनी वोलेहे कोड़ीमेहें टाकीत लेजा. जिया वाअहीं तियाआ वजन उसलीइता आवे.15ते डेंगारा पेटीइ कोड़ीमेहें रोअहूं देजा; आन तियाहा अलग मा कोअहा.16आन आंय जो ताहूं साक्शीपत्र आपिहीं तियाहा तियी पेटीमेहें मिकजी.”17“फाशोअ सोका होनाआ एक टापणो बोणावजा; तों आड़ीस आथ नांबो जोवे, आन पोलो डेड़ आथोअ जोवे.18आन होनो टाकीत कोइत बेन फाकावाला देवदूत बोणावीत कोइत दयासनोअ टापणाआं बेनू वोल मिकाड़जी.19एक करुब एकी मेरे आन बिहीरु करुब एकी मेरेपोअ मिकाड़जी; आन देवदूतोहो आन दयासनोअ टापणाहा नेहें एकाज तुकाड़ा वाअहीं बोणावीत कोइत तियाआ बेनू वोल पोअ मिकाड़जी.20तियां करुबोअ फाके उपोअ रोत एहेलेहे पोलावीत रोल्ये जेहें बोणावजा के दयासनोअ टापणो तियांआं वाअहीं टापाअलो रोअहूं जोवे, आन तियांआं सोब हुंबरा हुंबर आन दयासनोअ टापणाआ वोगेहे रोअहूं जोवे.21आन तिया टापणाहा पेटीपोअ लागाड़जा; आन जों साक्शीपत्र आंय ताहूं आपीहीं तियाहा तु पेटीइ मायते मिकजी.22आंय तियाआ उपोअ रोत कोइत ताहूं मिल्या कोअहीं; आन इस्राएलवालाआ काजे जेताहा कायदा माहूं ताहूं आपीइलोअ ओय, तियां आखाअ बाप्तिमेहें दयासनोअ टापणापोअ रोत तियां देवदूतोअ विसमेहें रोत, जों साक्शी पत्राआ पेटीपोअ ओय, ताअरी गोठी कोअया कोअहीं.”23“फाशोअ बाबल्योअ लाकड़ाआ एक पवित्र टेबल बोणावजा; तियाहा बेन आथ नांबू, एक आथ सोवड़ू, आन डेड़ आथोअ उसू रोअहूं जोवे.24तियाहा सोका होना वाअहीं मोडाड़जी, आन तियाआ शारु वोलेहे होनाआ वाड़ बोणावजी.25आन तियाआ शारु वोगेहे शार आंगली सोवड़ी एक कोर बोणावजी, आन तियी कोरीइ शारु वोगेहे होनाआ एक वाड़ बोणावजा.26आन होनाआ शार कोड़ी बोणावीत कोइत टेबलोअ तिया शारु खुणाआ वोल बोहाड़ुहूं लागाड़जा जे तियाआ शारु पायामेहें रोय.27ते कोड़ी कोरीइ जागेज जोवे, ताहां डेंगारा वाअहीं टेबलोअ वोजू वोहीइलोअ काजे तियीं कोड़ीमेहें वातडू बोहुंहूं जोवे.28बाबल्योअ लाकड़ाआ डांडू बोणावीत कोइत होना वाअहीं मोडाड़जी, आन टेबल तियाज वाअहीं आखलुहूं जोवे.29आन तियाआ पारात, तुमाणाआ सादन, जेग आन वाटका, आखो सोका होनाआ बोणावजी.30आन टेबलोपोअ माआ आगाड़ी भेटेए रोटा कायम मिकजा.”31“फाशुउ सोका होनाआ एक खांबू बोणावाड़जी. होनो टाकाड़ीत कोइत तिया खांबाआ थुड़ो डांडाअरीज बोणावहूं लागाड़जी; तियाआ फुलोअ गुंबरु, आन पेर आन फुल, आखो एकाज तुकड़ा वाअहीं बोणुहूं जोवे;32आन तिया मेरे रोत सोव डाली निहे, तिन डाली ते खांबाआ एकी वोल आन तिन डाली तियी बिहीरी वोल निहील्यी जोवे;33एकेकी डालीमेहें बादामोअ फुलोअ होस तिन तिन फुलोअ डुड्ड्याआ एक गाठ, आन एक एक फुल जोवे; दिवू मिकीइलोअ खांबाम रोत निहील्यी सोव डालीइ ओ आकार रुप जोवे;34आन दिवाआ खांबामेहें बादामोअ फुलोअ होस शार फुलोअ पेर जोवे आन ते पेर फुलोअ होस जोवे;35आन दिवाम रोत निहील्यी सोव डाली जोवे. तियीम रोत बेन बेन डालीइ निसे एक एक खांद जोवे, तों दिवाआ खांबाअरी एकुज तुकड़ाआ बोणल्यो जोवे.36तियांआं पेर आन डाली, आखे दिवाअरीज एकाज तुकाड़ाआ जोवे, सोको होनो टाकाड़ीत कोइत आखु दिवू एकाज तुकाड़ाआ बोणावाड़जा.37आन हांत दिवा बोणावाड़जा; आन दिवा पेटाड़जा के ते दिवाआ आगाड़ीइ भागोम उजालो आपे.38ईंगाआ विसीइलोअ सिपटू आन ठाली एं बी सोका होनाआ जोवे.39तों आखो सामान लगभग शोवतीस किलो सोका होनाआ बोणावुहूं जोवे.40आन वारुहूं मोन लागाड़ीत यी आखी वोस्तुहू तियाआ नमुनाआ होस बोणावाड़जा. जो ताहूं डोगोपोअ देखाड़्युहू.”
The Word for the World International