निर्गमोअ पुस्तक निर्गमोअ पुस्तक20
1ताहां देवे एं आखे वसने कोये:2“आंय ताआ यहोवा देव होय. तुमू मिसर देसोम वेठाऱ्ये ओते, ताहां आंयुज तुमुहूं तिहीं रोत काडीत लेत आयुहू.3“तु माहूं सोड़ीत बिहीरा कोडाहाज देव कोत मा मानही.4“तु ताआ काजे कोड़ल्यी मुर्ती मा बोणावही; उसे जुगोमेएं नेत निसे धरतीपोअ नेत धरतीइ निसे पाअयोंमेएं, किहाआज मुर्ती मा बोणावही.5तु तियांहां टुंगू पोड़ीत मा वोंदही, आन तियांआं सेवा बी मा कोअही; काहाके आंय ठोटाय कोअनारु देव होय, आन जें माआं सीस कोअतेहे तियांहां डोंड आपत्लू; आंय तियांआं पोऱ्याआ पोर्याहा शार पिड़ी जाआं तियांआं आब्हाआ बोदले डोंड आपत्लू.6पोन जें मापोअ मेर कोअतेहे आन माआं आदेश मानतेहे तियांआं हाजारेन हाजार पिड़ीपोअ आंय दया कोअत्लू.7“तु ताआ यहोवा देवोअ नाव फालतू मा लेही; काहाके जो कोडो तियाआ नाव फालतू लेय, तियाहा तो डोंड आपे.8“आरामोअ दिहोहो ओर कोइत सोकू दिही कोत मानजी.9सोव दिही जाआं तु मेहेंनत कोइत ताआ आखो कामकाज कोअजी;10पोन सांतवू दिही ओ आरामोअ दिही कोत देवोअ काजे होप्युहू, ये दिहे तु, नेत ताआ पोऱ्ये, नेत पावरे, नेत डोगरे, नेत काअलोज पारको माहुंउं जों ताआ देसोम रोहे तों कीज कामकाज ने कोअहूं जोवे;11काहाके साहावा दिहोअ दिही यहोवा जुग, धरती, दोऱ्या, आन जों किबी तियाम होय, तों आखो बोणायो, आन हांतवे दिही आराम कोअयू; तियाहा काजे यहोवा देवे आरामोअ दिहोहो आशिर्वाद आप्यू आन सोकू ठरव्यु.12“तु ताआ आब्हाआ आन ताआ आयहीइ मानपान कोअजी, जिहीं वाअहीं जो देस ताआ देव यहोवा ताहूं आपेहे तियामेहें तू जाअखीलाहा दिही जाआं रोही.”13“तु खुन मा कोअही.14“तु सिनालो मा कोअही.15“तु बांडगाय मा कोअही.16“तु कोडाआ विरुद्दाम ठोगोअ साक्शी मा आपही.”17“तु कोडाआ कोओअ लालस मा कोअही; आन मा कोडाआ बोईंइ लालस कोअही, आन मा कोडा पावरोअ के बोलोद, गोदड़ाआ, के कोडाआ; कोड्लीज वस्तुउ लालस कोअही.”18जाहां आखे माअहें वाद्लो गाजीइलोन विजलीइलो आन तुरीइ आवाज उनाअते जात डोगोपोअ तुमाणू पालते रोये, ताहां बिकेवाअहीं कापते जात सेटे सेटे उबे रोत गोये.19आन तें मोशेहे कोने वोल्ये, “तुज आमाअरी गोठी कोअजी, ताहांज आमू उनाअहूं; पोन देव आमाअरी गोठी ने कोअहूं जोवे, नेत आमू मोईत जाहूं.”20मोशे माअहोंहों कोयो, “बिहा मा; काहाके देव तुमाआ परिक्शा लेअलोअ कोअते आयुहू, मोन्ज्ये तुमू तियाहा बिहा ताहां तुमू पाप ने कोअहा.”21आन ते माअहें सेटेज उबे रोये पोन मोशे तिया जाडा आंदाराम गोयु जिहीं देव ओतू.22ताहां यहोवा मोशेहे कोयो, “तु इस्राएलोहो माआ ए गोठी कोत आप: तुमू माअहें सोताहाज देख्येहे के आंय तुमाअरी जुगोम रोत गोठी कोअयीही.23तुमू माहूं सोड़ीत, मोन्जे तुमाआ कोअते सांदीइ नेत होनाआ देवे मा बोणावहा.24माआ काजे कादवोअ एक देवान्यो बोणावजा, आन तियापोअ आगीइ गाराहा, शांतीबली आपजा, तुमाआ मेडे, डोगरेन बोकड़े गाराहा आपजा. आन जिहीं जिहीं आंय माआ नावोअ ओर कोआड़ीहीं, तिहीं तिहीं आंय आवीत कोइत तुमुहूं आशिर्वाद आपीहीं.25आन जर तुमू माआ काजे डोणोअ देवान्यो बोणावहा, ताहां कोड़ल्या डोणोअ मा बोणावहा; नेते जिहीं तुमू तियापोअ आथ्यार लागाड़हा तिहीं तुमू तियाहा एठो कोई देहा.26आन तुमाआ डिल नागरो देखात पोड़े एहलोहो निहीणावालो देवान्यो माआ कोअते मा बोणावहा.”
The Word for the World International