निर्गमोअ पुस्तक निर्गमोअ पुस्तक18
1जेहेलाम मोशेए होवरुह्हू मिद्यानोवालू पुंजारु यित्रो ओ उनाअयू के देवो मोशे आन तियाआ माअहें इस्राएलोअ काजे कि कि कोअयोहो, मोन्जे ओं के केहें कोइत इस्राएलोहो मिसर मेहें रोत काडीत लेतायुहू,2ताहां मोशेए होवरुह्हू यित्रो मोशेए लाडी सिप्पोराहा, जियीही पेल तियीइ डायाअहीं मोकली देदीते,3आन तियाआ बेनू पोर्याहा बी लेत आयू; तियाम रोत एकाआ नाव मोशे ओं कोत कोइत गेर्शोम मिक्योतो: “आंय बिहीरा देसोम पारकू ओतू.”4आन बिहीरा पोऱ्याआ नाव तिये ओं कोत एलीएजेर मेक्यो: “माआं बाह्हाआ देवे माहूं मदत कोइत माहूं फारोअ तारवाइप रोत वासाड़्यू.”5मोशेए लाडी आन मोशेए पोर्याहा, तियाआ होवरुह्हू यित्रो आरी लेत कोइत मोशेए जागे जंगलोअ तियी जागेहे आयू, जिहीं देवोअ डोगोअ जागे तियाआ पोड़ावू रोतुतो.6आन आवीत कोइत तिये मोशेए जागे ओं कोत मोकल्यो, “आंय ताआ होवरुह्हू यित्रो होय, आन बेनू पोर्याहा आरी लेत कोइत ताआ लाडीही ताआ जागे लेतायुहू,”7ताहां मोशे तियाआ होवराह्हा मिलीइलोअ काजे आयू, आन तियाह नमस्कार कोइत गुउं देदू; आन ते खुसीइ गोठ कोइत तियाआ पोड़ावाआ जागे आवीत लागे.8तिहीं मोशे तियाआ होवराह्हा कोत आप्यो के यहोवा इस्राएलोअ काजे फारो आन मिसरोअरी कि कि कोअल्यो, आन इस्राएलो वाटे कि कि तारास कोअयू, फाशोअ यहोवा तियांहां केहें केहें कोइत सोड़वीत लेतायुहू.9ताहां यित्रो तियी आखी हाजी गोठी जे यहोवा इस्राएलोअ आरी कोअयीते, तियांहां मिसरोअ आथोम रोत सोड़व्येते, खुस ओत कोइत कोयो,10यित्रो तियाहा कोयो, “प्रभु यहोवा हाजू होय, जिये तुमुहूं फारो आन मिसरोअ आथोम रोत सोड़व्ये, जो तुमुहूं मिसरोअ आथम रोत सोडव्येहे.11ओमे आंय जाईंत लेदोहो के यहोवा आखा देवोम रोत वोडू होय; काहाके तिये ए गोठी तियां इस्राएलवालाअरी कोअयीते.”12ताहां मोशेए होवरुह्हू यित्रो देवोअ काजे गाराहा आन आगीपोअ गाराहा आप्यो, शांतीइ गाराहा आप्यो. आन आरोन इस्राएलोअ आखा डायहांअरी मोशेए होवरुह्हू यित्रो देवोअ आगाड़ी रोटू खाअलाआ काजे आया.13बिहीरे दिही मोशे माअहुंउं न्याय कोउ बोठू, ताहां वेगीइ ते हांस्तीइ वेले जाआं माअहें मोशेए आसे पासे उबे ओते.14जाहां मोशेए होवरुह्हू ओं पालित कोइत मोशेए माहुंउं काजे कि कि कोअहे, तियाआ होवराह्हा कोयो, “ओं कि काम होय जो तु माहुंउं काजे कोअहे? कि कारण होय के तु एखलुज बोहीत रोहे, आन माअहें वेगीइ ते हांस्तीइ वेले जाआं ताआ आसेपासे उबे रोतेहे?”15मोशे तियाआ होवराह्हा कोयो, “माअहें माआ जागे देवोअ इश्शा फुसीइलोअ काजे आवतेहे.16जाहां जाहां तियांआं भान्गडी ओवतिही ताहां ताहां तें माआं जागे आवतेहे, आन आंय तियांआं विसमेहें न्याय कोअहो, आन देवोअ विधी आन नियम तियांहां समजाड़ोहो.”17मोशेए होवरुह्हू तियाहा कोयो, “जो काम तु कोअहे, तो बोराबर कायनाहां.18यावाअहीं तु कि, पोन एं माहें बी जे ताअरी होय एं बी थाकीत जाय. काहाके ओं काम ताआ काजे जास्ती कठीण होय; तु याहा एखलुज नाहां कोइ सेकतू.19ओमे तुमू माआ गोठ उनाआ जे आंय तुमुहूं कोत आपोहो, आन देव तुमाअरी रोय! तुमू यां माअहोंअ कोअते देवोअ जागे जाया कोआ, आन तियांआं भान्गडीही तु देवोअ जागे पोताड़तु रोजी.20याहां आदेश आन नियमोओं शिक्शण आपित कोइत जियी वाटे पोअ तियांहां सालीइलो होय, आन जों जों काम तियांहां कोइलाआ होय, तो तियांहां कोत देखाड़जी.21पोन तु आखा इस्राएलवालां माहूंम रोत एहेलाहा माटी निवड़ीत ले, जे हाजा ओय, आन देवोह बित सालनारा, विश्वासी, आन लासेए लाभ्या ने ओय; आन तियांहां हाजार हाजार, एक एक होव, पोन्नास पोन्नास, आन दोह दोह माअहूं पोअ आधिकार्योंअ निवड़ कोइ दे.22आन ते आखी वेले यां माहुंउं न्याय कोअया कोए; आन आखा वोडी वोडी भान्गड़ ते ताआ जागे लेतावया कोए, आन हानी हानी केसेए न्याय तुज कोअया कोअजी; ताहां ताआ वोजू ओलवू ओवे, काहाके या वोजाहा ते बी ताअरी आखलीत लागे.23जर तु एहें कोअही, आन देव ताहूं एहेलुहू आदेश आपे, ताहां तु उबू रोत सेकीही, आन एं आखे माअहें तियांआं जागा पोअ खुसी वाअहीं पोतीत सेके.”24तियाआ होवराह्हाआ ए गोठ मानित कोइत मोशे तियाआ आखी गोठीइ पुरमाणे कोअयो.25आन तिये आखा इस्राएलवाला माअहूंमेहें रोत हाजा माट्योहों निवड़ीत तियांहां हाजार हाजार, होव होव, पोन्नास पोन्नास, दोह दोह माअहूं पोअ मुख्या कोत ठरव्या.26आन ते आखा माहुंउं न्याय कोआ वोल्या; जे मुद्दा कठीण रोताते तियांहां ते मोशेए जागे लेत आवताते. आन आखा हाना हानी केसेए न्याय ते सोताहाज कोअताते.27ताहां मोशे तियाआ होवराह्हा वाटे लागाड़्यू, आन तिये तियाआ देसोअ वाट तोअयी.
The Word for the World International