निर्गमोअ पुस्तक निर्गमोअ पुस्तक13
1फाशोअ यहोवा देवे मोशेहे कोयो,2“इस्राएलोमेहें जेत्ते जोएं माहुंउं नेते जनवारोअ जें पेल्लाअठीज उबजीइये ओय, तें नर माआं काजे सोके मानुहूं जोवे.”3फाश्योअ मोशे माअहुंहूं कोयो, “या दिहोहो ओर कोआ, जियामेहें तुमू गुलामोअ कोअमेहें, मोन्जे मिसरोमेहें रोत निहीत आवयेहे; यहोवा तुमुहूं तिहीं रोत तियाआ सेक्ती वाअहीं काडीत लेत आवयुहू; यामेहें खमीरोअ रोटू ने खाअहूं जोवे.4आबिबोअ मोयनामेहें आज्येए दिहे तुमू निहींयेहे.5याअकाजे जेहेलाम यहोवा तुमुहूं कनानी, हित्ती, एमोरी, हिव्वी, आन यबूसी माअहोंअ देसोम पोताड़े, जियाहा आपिलोअ काजे तिये तुमाआ वेगाआ डायहांअरी शप्पत खादीते, आन जियामेहें दुद आन मोदोअ तार वोहेहे; ताहां तुमू याज मोयनामेहें तिवार कोअजा.6हांत दिही जाआं बिगर खमीरोअ रोटू खाया कोअजा, आन सातवे दिहे यहोवा देवोअ काजे तिवार मानजा.7यां हांतू दिहोम तुमू बिगर खमीरवालू रोटू खाजा. तुमाआ देसोअ हांत दिही जाआं खमीर ने देखाअहूं जोवे.8आन ‘ये दिहे देवे आमुहूं मिसर देसोम रोत बारथे काडल्ये, तिहीं वाअहीं आमू ओ तिवार मानत्ले’ एहें कोत तुमू तुमाआ पोऱ्याहा कोत देखाड़ुहूं जोवे.9ओ तिवारोअ दिही मोन्ज्ये तुमाआ काजे एक ओर मिकीइलोअ काजे निशाणी जेहें तुमाआ नजरेए सामने रोअहूं जोवे; जिहीं वाअहीं तुमुहूं देवोअ नियमोअ ओर रोय. काहाके देवे तुमुहूं मिसर देसोम रोत तियाआ आथो वाअहीं बारथे काड्येहे.10तियाहा काजे तुमू या नियमोहो वोर्ह्योंअ डिठ ठरिवल्या दिहोपोअ मानजा.”11“फाशोअ जेहेलाम यहोवा तियी शप्पतेए होस, जो तिये तुमाआ वेगाआ डायहां रोत आन तुमाअरी बी खादीही, तुमुहूं कनानोअ देसोम पोताड़ीत कोइत तियाहा तुमुहूं आपी देय.12ताहां तुमामेहें जेतेहे तुमा तुमाआ याह्हीइ पेल्लाआ पोऱ्या ओय, तियांहां आन तुमाआ जनवारोमेहें रोत जे एहेलेहे ओय, तियांहां बी यहोवा देवोअ काजे गाराहा आपजा; पेहलो उब्जीइल्यो हरेक बाल-बासो यहोवा देवोअ होय.13आन गोदड़ाआ आखा पेहला बासाआ हाटे एक मेडो आपित तियाहा सोड़वीत लेजा, आन जर तुमू तियाहा सोड़वीइलो ने ओय, ताहां तियाआ गोलू तोड़ी देजा. पोन तुमाआ आखाआ पेल्लाआ पोऱ्याहा हाटे आपित कोइत सोड़वीत लेजा.14आन आगाड़ी दिहोमेहें जेहेलाम तुमाआ पोर्ये तुमुहूं फुसे, ‘ओं की होय?’ ताहां तियांहां कोजा, ‘यहोवा आमुहूं गुलामोअ कोअमेहें रोत, मोन्जे मिसर देसोमेहें रोत तियाआ आथोअ सेक्ती वाअहीं काडीत लेतायुहू.15तियी वेले जेहेलाम फारो कठीण ओत कोइत आमुहूं जाअहूं देअलोअ ने कोअयो, ताहां यहोवा मिसर देसोमेहें माअहोंअ जागे रोत ते जनवारोअहीं जाआं पेलठाहा माईंत टाक्ये. तियाहा काजे जनवारोमेहें जेतेहे तियां तियांआं याह्हीइ पेलठे उब्जीइल्ये होय, तियांहां आमू यहोवा देवोअ काजे गाराहा आपतेहे; पोन आमाआ आखा पेल्लाआ पोर्याहां आमू हाटे आपित कोइत सोड़वीत लेत्ले.’16ओं तुमाआ आथोपोर्यीइ एक निशाणी आन नेवणाआ विसमेर्युउ टिलू जेहें रोअहूं जोवे; काहाके यहोवा आपुहूं मिसर देसोम रोत तियाआ सेक्तीवाअहीं काडीत लेतायुहू.”17जेहेलाम फारो माअहुंहूं जाअलोअ आदेश आपी देदू, पोन पलिश्तीइ माअहुंहूं देसोम ओत कोइत जे वाट जातीते ते हानी ओती; तेबी देव ओ विसार कोइत तियांहां तिये वाटे नाहां लेत गोयु के एहलोहो ने ओवुहूं जोवे के जेहेलाम एं माअहें लोड़ाय पाले ताहां फास्ताइत मिसरोमेहें फिरीत कोइत आवे.18याआ कोअते देव तियांहां सोमकीर फेरवी फेरवीइ लाल दोर्याआ जंगलोअ वाटे लेत गोयु. आन इस्राएलवाले मिसर देसोम रोत लड़ायीइ काजे तियार ओत बारथे निहींये.19आन मोशे योसेफोअ आडोहों आरीज लेतुज गोयु; काहाके योसेफे इस्राएलवालाहां एहें कोत कोइत पाक्की शप्पत लेवाड़्यीते के, “जेहेलाम देव तुमुहूं सोड़वे, तेहेलाम तुमू इंहीं रोत माआं आडे आरीज लेतेज जाजा.”20ताहां तियें सुक्कोतोअहीं जागु सोड़ीत कोइत जंगलोअ रानोमेहें एथाम यी जागेहे पोड़ावू टाक्यू.21आन यहोवा तियांहां दिहोअ वाट देखाड़ीलोअ काजे वाद्लाआ खांबू आन राती उजालो आपीइलोअ काजे आगीइ खांबू ओत कोइत तियांआं आगाड़ी आगाड़ी साल्या कोअतुतो, जिहीं वाअहीं तें राती आन दिहे बेनुमेहें सालीत सेके.22तिये ते वाद्लाआ खांबाहा दिहे आन ने आगीइ खांबोहो राती माअहुंउं आगाड़ी रोत सेटे कोअयो.
The Word for the World International