इफिस3
1यीज गोठी वाअहीं आंय पौलुस जो तुमा बिगर यहुदीइ काजेहे ख्रिस्त ईसुउ काजे बांदाअलू होये.2जर तुमू देवोअ तियी मेरवानीइ योजनाआं खबर उनायेय, जे तुमाआं काजेहे माहूं जोड़्यीही;3मोन्ज्ये ओं के ते गुप्त्यी योजना माहूं देखाड्यी, आन आंय पेल बी थोड़ाक शब्दाम लेख्यीही;4जियाहा तुमू वासीत कोइत जाईंत सेकतेहे के, आंय ख्रिस्ताआ ते गुप्त्यी गोठ समजाड़ोहो.5ते गोठी जेहेंकोइत आत्माआं वाअहीं ओंमे तियाआ पवित्र प्रेशितों आन भविश्यवक्तांपोअ देखाड़ी देदीही तेहेंकोइत जुना वाडोमेऱ्यीइ पिढ़ीही नाहां देखाड़्यी.6मोन्ज्ये एहलोहो के ख्रिस्त ईसुमेहें हाजी बातमी वाअहीं बिगर यहुदी मांअहें वारसामेहें भागीदार, आन एक्कुज शरीरोअ भाग आन शप्पतोअ भागिदार होय.7देवोअ मेरवानीइ तियी भेटेए इसाबोवाअहीं जे तियाआ ताकतोअ इसाबो वाअहीं माहूं आप्यीही, तियी हाजी बातमीइं आंय सेवक बोण्यु.8आंय जो आखा सोका माअहूंमेहें रोत हानाम रोत हानू होय, देवे तियाआ मेरवानी माहूं आप्यी, काहाके आंय बिगर यहुदी ख्रिस्ताआ गोणाय ने एताहा धनोअ हाजी बातमी कोत सेको,9आन जो आखाआ बोणावनारु होय तिये देवे कोलीइ सुरुवातिही रोत गुप्त्यी मिक्यीते, ते गोठ्यी आखाहा उगाड़ीत देखाड़ीत सेको.10याअकाजे के ओंमे मंडड़ीवाअहीं, देवोअ बातीवानीइ बुद्दी, तियां मुख्याहां आन आधिकार्योंहों जे होरगाआ जागाम होय, तियांहां ए गोठी मुंदू जाअहूं जोवे.11देव तियाआ हादाफल्याआ उद्देशोअ कोअता एहलोहो कोअयो, जो तिये आपाआ प्रभु ईसु ख्रिस्ताआ वाअहीं पुरु कोअयू.12जियामेहें आपुहूं तियापोअ विश्वास कोअल्या वाअहीं हिम्मत आन भरीवसाअरी देवोअ हजरीमेहें आविइलोअ आधिकार जोड़्युहू.13तियाहा काजे आंय तुमुहूं रावणी कोअहो, के आंय तुमाआं काजे जों दुख वेठोहो, तिहीं वाईं तुमू नाराज मा ओवहा. काहाके ओं आखो तुमाआं हाजाआ काजेज होय.14याआ वाखरी आंय देव आब्हाआ सामने मांड्या पोड़ीत वोंदोहो.15इंहीं वाअहीं होरगामेहें आन धरतीपोअ आखा परिवारोहो बोणावीत नाव मिक्योहो.16काहाके तो तियाआ महिमाआ धनो वाअहीं तुमुहूं ओं दान आपे आन तुमू तियाआ आत्मा वाअहीं आपाआ मायवाला जिवोमेहें मजबुत बोणित सेके.17आन आंय प्रार्थना कोअहो के विश्वासो वाअहीं ख्रिस्त तुमाआं मोनोमेहें तियाआ कोअ बोणावीत रोअहूं जोवे, आन तुमू मेरेमेहें उंडे रोत मजबुत पायू बांदल्याआ होस रोअहूं जोवे.18याआकाजे के, तुमू आखे देवोअ मांअहें, ख्रिस्ताआ मेर केतीही पोली, नांबी, उसी, आन केतीही उंडे रोत होय तों ओलखुंहूं जोवे.19काहाके ख्रिस्ताआ वोडी मेर तुमू समजीत सेकहा जे आपाआ ओकलेए बाहर होय, मोन्ज्ये तुमू देवोअ एतेहे हारेपुरे ओत जाअहूं जोवे.20ओंमे जो एतुहू सेक्तीवालू देव होय के आपाआ विनंती आन ओकलेए बाहर तियी सेक्तीवाअहीं तो आपामेहें काम कोअहे.21देवोअ महिमा मंडड़ीमेहें आन ख्रिस्त ईसुमेहें कायम आन पिढ़ीन पिढ़ी रोअहूं जोवे! आमेन.
The Word for the World International