उपदेशक4
1ताहां आंय पाल्यो के धरतीपोअ केतुहू अन्याय ओवेहे. जियांपोअ अन्याय ओवेहे, तें डोआम रोत रोज्ये काडतेहे, पोन तियांआं रोज्ये पुसनारो कोडो कायनाहां. अन्याय कोअनारापोअ सेक्ती ओती, पोन रोड़नाराआ जागे तियांहां ठावको कोअनारो कोडो ने ओतो.2तियाहा कोत जें ओमे जाआं जिवते होय तियां रोत जी, जें मोइत गोयेहे तियांआं जाअखो हाजो होय एहलोहो आंय कोहो.3पोन मोल्या माहुंउं आन जिवता माहुंउं रोत तियाआ दशा हाजी होय जियाआ जल्म नाहां ओवो, आन धरतीपोअ ओवनारे खाराब कामे नाहां पाल्ये.4ताहां आंय आखी मेहेंनती वाले कामे आन हाजा कामोहों पाल्ये जें माअहें तियांआं जागेवालाआ वस्तु देखीत ओड़खू कालीत लेतेहे. ओं बी वायाज आन वाराहा तोअत्लाआ होस होय.5फोगो आथ बांदीत कोइत रोहे, आन तियाआ सोताआज नुकसान कोइत लेहे.6तारास कोइत आन विणकामोअ बेन मुठी रोत जी, एक मुठेन मोनोम होक ओय तोज पुरड़्यो.7फाशोअ आंय धरतीपोअ ए बिगरकामोअ गोठ बी देख्यी.8एखो एखलोज रोहे आन तियाआ कोडोज कायनाहां; नाहां तियाआ पोऱ्यु, नाहां पाही; तेबी तियाआ मेहेंनत नाहां सेलाअती; तियाआ डोआ मालधनो वाअहीं बी नाहां ताराअता; आन तों नाहां कोतो, आंय कोडाआ कोअते मेहेंनत कोओ आन माआ जिवनोहों काहा दुखी मिको? ओं बी वायाज होय आन तारासोवालोज काम होय.9एका रोत बेन हाजे होय, काहाके तियांआं मेहेनतीइ हाजो फल जोड़ेहे.10आन तियांमेहें रोत एक पोड़्यो ताहां बिहीरो तियाहा उठाड़ीत सेकेहे. पोन जों एखलोज ओय तियाहा कोडो उठाड़नारो ने रोयो, ताहां ते केतीही दुखोअ गोठ होय.11फाशोअ जर बेन जोएं हुवे ताहां ते उफाले रोय, पोन एखलो माहुंउं केहें कोइत उफालो ओत सेकेहे?12एक जोओं एखलाहा गाठाड़ीत सेकेहे, पोन बेन जोओं तियाहा हारवीत सेकताहा; जों दोअड़ो तिन फेली वाअहीं बोण्योहों तो वेगो नाहां टुटीत सेकतो.13सल्लु ने माननारा तियां डाया आन फोगा राजा रोत जी समजदार गरीब जुवान जाआं हाजु.14ओत सेकेहे राजा तियाआ देसोमेहें गरब्योअहीं जल्म लेत राजा बोण्युय, नेत जेलेमेहें रोत निहींत कोइत राजा ओवू ओय.15पोन धरतीपोअ जिवनारे आखे माअहें तिया समजदार जुवानोअ वोल ओते तों मी देख्यो.16जाअखीलेहे माअहें तिया जुवानोअ फासोअ जाय; पोन सेलवाआ तियां माअहोंहों तो ने गोमे. हुदाअलीज ए गोठ बी वायाज आन बिगर कामोअ होय.
The Word for the World International