1 तिमथ्या4

1पोन आत्मा वारुहूंज कोहे के आवनारी वेलेमेहें केतेहे तेबी माअहें विश्वास सोड़ी देत कोइत, ठोगरी आन पुतोअ आत्माआं शिक्शणोअहें मोन लागाडे.2ओं तियां ठोगनाराआं लबाड़ीइ वाखरी ओवे, जियांआं मोन तोपीवल्या वारांगा वाअहीं डाजवीइल्याअ होस होय,3तें एहेलोह सिकाड़े के, वेहवाल कोइलो सुकीइ होये, आन अमुक-ढमुक वस्तु ने खाअहूं जोवे,पोन ए वस्तु देवे याअ काजे बोणावयी के विश्वासी आन सत्याहा ओलखीइनारे माहें तियींहीं आभार मानित खाअहूं जोवे.4काहाके देवोअ बोणावल्यी आखी वस्तु हाजी होय, आन कोड्लीज वस्तु नाकारे एहेलिही कायने; पोन ओंज के आभार मानित कोइत खाअहूं जोवे.5काहाके देवोअ वसन आन प्रार्थना वाअहीं सोकी ओत जाहे.
6जर तू विश्वासी माअहोंहों यीं गोठीहीं ओर कोइत आपतू लेही, ताहां ख्रिस्त ईसुउ हाजू सेवक बोणही; आन विश्वास, तियी हाजी शिक्शणोअ गोठी वाअहीं, जे तु मानतु आयुहू, ताआ पालन पोशण ओवतो रोये.7पोन सोगद्यीइलीही आन डुकर्‍याआं काईंहीं मा उनाअही; आन हाजी भक्तीवाला जिवनोअ सवाय लागाड़.8काहाके डिलोअ वायाम कोइलो वाअहीं फायदू कमी ओवेहे, पोन भक्तीइ वायाम कोइला वाईं आखा कामोम लाभ होय, काहाके यी वेलेए आन आवनारा जिवनोअ बी आथवसन याआज काजे होय.9ए गोठ खोरी आन हुदाअलीज मानुहूं जोगीही होय.10काहाके आमू मेहेंनत आन कोशित याआज काजे कोअताहा के आमाअ आशा तिया जिवता देवो पोअ होय, जो आखा माअहुंउं आन खास कोइत विश्वासी माअहोंअ तारनारु होय.
11यीं गोठीइ सुसना आप आन सिकाडतु रो.12कोडो ताआ जुवान वयोहो कमी ने समजुहूं जोवे; पोन वसन, सोभाव, मेर, विश्वास आन पवित्रता मेहें विश्वाश्याआं काजे नमुनू बोणीत जा.13जाअहूं जाआं आंय ने आवो, ताअहूं जाआं देवोअ वसन वासीइलो, ओकल देअलो आन सिकाड़ीइलोमेहें लागीत रो.14तिया वरदानोअ बाप्तिमेहें जो तामेहें होय,आन भविश्यवाणी वाअहीं मंडड़ीइ डायहांअ आथ मेकतामेहें जोड़्योतो, तियाहा टालही मा.15यीं गोठीइ विसार कोअतू रो आन यींज गोठी मेहें ताआ ध्यान लागाड़ीत मिक. याअ काजे के ताआ कामाय आखाहा देखाअहूं जोवे.16ताआ आन तुमे आपल्या शिक्शणोअ ओर मिक. यीं गोठी पोअ वातड़ू रो, जर एहें कोअतू रोही, ताहां तु बी वासाअही आन ताआ होंबलीत सालनाराहां बी वासाड़ही.

The Word for the World International

https://app.library.bible/content/6cbf4027f9a13b9c