1थेस्सलनी3
1तियाहा काजे जेहेलाम आमुहूं बी धिर ने खेटाअयू, ताहां एथेन्स सेहरो मेहें एखलाज रोत जाअलो हाजो आवे एहेलोह आमुहूं लागो;2आन आमू तिमथ्याहा, जो ख्रिस्ताआ हाजी बातमी मेहें आमाअ पाही आन देवोअ सेवामेहें हाती होय. याहा एताआ कोअते मोकल्यू के तुमुहूं मजबुत कोए आन तुमाअ विश्वासोअ बाप्तिमेहें तुमुहूं उत्साहीत कोए,3काहाके कोडो यां तारासो वाअहीं फासाड़ी ने वोलुहूं जोवे. तुमू सोताहा जांअतेहे के आपू याआज कोअते निवडाअयेहे.4काहाके जेहेलाम आमू तुमाअहीं ओता, तेहेलाम तुमुहूं पेलुज कोया कोअताते के, आपुहूं तारास वेठुहूं पोड़े, आन ओं बोराबर तेहलोज ओवोहो, ओं ते तुमुहूं मुंदूज होय.5तिहीं वाअहीं माहूं बी ने रोवाअयो, ताहरुउ आंय बी तुमाआं विश्वासोअ हालत जाईंत लेअलोअ काजे कोशित कोअयी, केहेंनेत परिक्शा लेनारे तुमाअ परिक्शा लेदी ओय, आन आमाआं मेहेंनत वाया जाती रोयी ओय.6पोन ओमे तिमथ्या, जो तुमाअहीं रोत आमाअ जागेहे आयुहू, तिये तुमाअ विश्वास आन मेरेए हाजी बातमी उनावयी, आन ए गोठ बी कोत आप्यी, के तुमू हादाफल आमाआं बाप्तिम ओर कोअतेहे, आन आमुहूं हेइलोअ आहरु कोअतेहे, जेहें कोइत आमू बी तुमुहूं मिलीइलोअ इश्शा कोअताहा.7याअ कोअते ए पाव्हीइला, आमू आमाआं आखा दुख आन तारासो मेहें तुमाअ विश्वासो वाअहीं आमू तुमाअ बाप्तिमेहें रोढवाइत गोयाहा.8काहाके, ओमे जर तुमू प्रभु मेहें टिकीत रोहा, ताहां आमू जिवता होय.9आन जेहेली खुसी आमुहूं तुमा वाअहीं आपाआ देवोअ आगाड़ी होय, तियाआ बद्दल तुमाअ बाप्तिमेहें केहें कोइत देवोअ आभार मानुहूं जोवे?10आमू रात दिही जाअखीलाहा प्रार्थना कोअता रोताहा के तुमाअ सोब हुंबाहूंब पालित सेको, आन तुमाअ विश्वासोअ कमी पुरी कोइत सेको.11ओमे आपाआ देव आन बाह्हू सोताहा आन आपाआ प्रभु ईसु, तुमाअ जागेहे आविइलाअ काजे आमाआं वाट तियार कोए.12आन जेहें कोइत आमू तुमा पोअ मेर कोअताहा, तेहेलीज मेर तुमा सोतामेहें आन आखा माअहूं मेहें वादे आन वादती जाय एहेलोह प्रभु कोइ देअहूं जोवे.13याअ कोअते के जेहेलाम आपाआ प्रभु ईसु तियाआ आखा सोका माअहोंअरी आवे, ताहां तो आपाअ देव आन बाह्हाआ सामने तुमाअ मोनोहो सोकायी मेहें निर्दुस आन मजबुत कोए.
The Word for the World International