Read Mer Si Yesuenemén Lukém Yéfarotam 20

Mer Si Yesuenemén Lukém Yéfarotam20

Yesuene si muyé moghmén

¹Ámb efghon yémon njam tawatametau ár wáwefnogh méngo sifayan a táitotau mer si, limánégh ghéngén wárogh ár a nák watamegh ár nafghayénd yémafe ámb sénko árfé, enmormén yáfaf.²Yémofem norayayénd, “Ténmaufro némé muyaye fémon ewafrote yéné ásáfogh. Emon fe yéné muyé némaramai?”

³Yémon ewawangoi, “Yéndon so ndenéyameyo fém témotangén ámogh si. Ta kwaufrongi,⁴'Jonene walitogh yénmormén njafarta o árta?'”

⁵Yémofem táruindawét yéfe kénjúnro a korayawét nde, “Njam yénd korayangém 'Kétándmé njafarta,' fá so kamotangé, 'Némamén yau wét fá efalo yiyátongi?'⁶Wénde njam yénd korayangém, 'Kétándmé árta,' méinyotio árém so yénamndat yénd wíme ménamén fá em mat nde Jon témorwén Ngánjánene mat yátogh ár.”

⁷Féyo yémofem yawangoyénd, “Yénd mafina yéném fá árkémamén yém.”

⁸Yesu norayai, “Yéndon wét yau so tawaufron féfe némé muyaye yéndon ewafrotan yéné ásáfogh.”

Rengerenge si ndau wanjengégh téfnárafenemén

⁹Fá téngmorwén tawawaitotau árét rengerenge si, “Árém yeitam géreif mbwe ménj ndawan, noroi faiofnar ásáfogh árfefaf a nuwanoi teke.¹⁰Wau yuwon yémon yáfaretam faiofnar ásáfogh ár kétán ndau wanjengégh árfefaf ménát yémofem so téramangi yáyot ámb géreif mbwe ménj mbwe yéné ndaumén, wénde wanjengégh árém tésmetawét fá a yátembayénd firo rokarofnar.¹¹Yémon yáfáretam yénamayo faiofnar ásáfogh ár, wénde yéné árém ndenéyameyo tésmetawét, mámé wáiwáiafé yátembayénd firo rokarofnar.¹²Yémon yáfáretam nambiomén a tésmetawét férkafé yitaménd fá.

¹³“Géreif mbwe ménj ndau yuré norayai, 'Yéndon némé so yafrotan? Yéndon so yéngwáfáretan tane ambum efe yéndon yuwetan. Efalo yiyátoi yémofem so yutémndat.'

¹⁴“Wénde njam ndau wanjengégh árém yinjoyénd fá, yémofem korayawét yéfenjo kénjúnro, 'Yéné siyém ndau yurane ambum yém. Wét yésmetam krotio fá, a ndau rokar so kénamndangi téfene.'¹⁵Féyo yémofem yitaménd géreif mbwe ménj ndau kénjúta a yesmayénd krotio fá.
“Némé so yafrote géreif mbwe ménj ndau yuram yéfefaf?¹⁶Fá so yéném a engésmete krotio yéné ár mérén a tawaramangé géreif mbwe ménj ndau ámb árét.”
Njam árém náyárayénd yénémamen, fá norayayénd, “Yénandmé yaufifi so yémǃ”

¹⁷Yesu néngretai yéfefaf mbarkándaye a emotai, “Féyo némé fifi yéné yém árkéméné yéfarotaménd,'Sérasér árké méngo ramégh téfnáram yékenayénd a namndayéng néndkéf sérasér.'

¹⁸Méinyotio ár efe njam nénuitat wíman so karéfkaréf nufrotat, a njam kénuyangé árfefaf fá so tásénangé.”

¹⁹Nák watamegh ár a limánégh ghéngén wárogh ár end táronjawét werghét wékeye, ménamén fá mat náyátoyénd nde fá korayau yéné rengerenge si yéfenemén. Wénde fá férfér tamorwén árfenemén.

Kaisare mani kémégh

²⁰Yémofem ghékéf tafayotawét yáyot, a ewáfáretaménd ufénmanégh téfnár efe mermer kuindawét. Fá yéta kemnawét Yesue werghét ménát ámb si so korayangai, ménát yémofem so tramangayénd gafanafaf.²¹Ufénmanégh téfnáram yémotayénd fá, “Watamegh ár, yénd mat yéném ndené fém noraye a ewatamete némé mbarkánd yém a fém yau namnyote árfene mwighafaf, wénde ewatamete Ngánjánene ende efaloyero.²²Téfeyot mbarkánd yém mani sái ekmetam Kaisare o yau?”

²³Yesum ewawinjoi yéfene unyégh a norayayéng yéfefaf,²⁴“Kwauyafongi yáne mani. Endene ár sáf a yétkwén ekayong?”
Yémofem yawangoyénd, “Kaisarene.”

²⁵Yesum emndai, “Taramangi Kaisare yáne némé yém, a Ngánjáne taramangi némé yém yáne.”

²⁶Fá endofnar namndayénd Yesue werghét némé yaufimén korayau kété árfene sáfrére. Sélngwél emormén yáne uwangoghan, a fá métar namndayénd.

Anogh a awerégh

²⁷Ámb Saduki ár enmormén efe norayayénd ndené kété ámb yau anogh yém. Fá enmormén Yesuefaf moghét.²⁸Fá norayayénd, “Watamegh ár, Mosesém yéfarotam nák téfeyot ndené njam yánngénoene yané kér yém tatembangé amaf wénde ambumofnar, yánngnom fété so kwiré tékayongé a ambum eunjeta yanai.

²⁹Kété tamorwén sefen ghakér ambum. Fronde sénkom nawerai a kér yémormén ambumofnar.³⁰Yénamayom kwiré nawerai, wénde fá ndenéyameyo kér yémormén, yéfrangoyéng ambumofnar.³¹A nambiomén nawerai kwiré, ndenéyamanro sefen kér emormén, yéfrangoyéng ambumofnar.³²Soramayo amaf kér yémormén.³³Anogh efghon endene amaf so yém? Ménamén yéné sefenam té naweretaménd.”

³⁴Yesum ewawangoi yéfe, “Árém amaf so fété naweretat yéné mbandan.³⁵Wénde soramé efghon, fá efe so tawanongé kérta yau so nawerétat.³⁶A fá yau kér so em. Fá so ndené kamndangi njafar si résagh árnit. Fá so em Ngánjánene ambumtértér ménamén Ngánjánam so tawanongé kérta.³⁷Wénde Mosesém njam yufarotaméng kéghat fés awároghan, yémon yuyafoi ndené kér so nanotat ghérsat. Yémon témotau Yuré 'Ebraamene Ngánján, Aisekene Ngánján a Jeikofene Ngánján.'³⁸Fá yau yém kér árfene Ngánján, wénde ghérsé árfene Ngánján, ménamén fá méinyotio ghérsé em yáfaf.”

³⁹Ámb nák watamegh ár namnyoyénd, “Mer norayayénd, watamegh árǃ”⁴⁰A árém yau yémotayénd fá ámb ámogh si kor.

Endene ambum yém Keriso?

⁴¹Yesum emotai fá, “Némamén ndené árém norayat nde Keriso yém Deifidene ambum?⁴²Deifid fáyo safén nakmai Sams bukan a norayai,'Yuré noyarai kétán tane Yurafaf:“Kámnjo yénandmé tane tambén ngángata.⁴³Kétánotio yéndon tákman fene mék téfnárfene kafkaf mbanmbanan.”'

⁴⁴Deifidém tanmotau fá 'Yuré.' Ndernáye fá yáne ambum so yém?”

⁴⁵Njamandio méinyotio árém tiyáretawét, Yesum emndai yánjo waitogh ár,⁴⁶“Kor nawarawenati nák watamegh árfenemén. Fá ménde em tombé sálámefé arengét a sái eutémndat térarégh sifayan, a yéfene mwighé témorwén minde mer sifayan ámnjoghét áumengégh méngo kénjún a yémofem méndefé tafandawét limánégh ámnjogh sifayé témndan.⁴⁷Yémofem unyéghe kwirafene rokar tawarsawét a fá mermer kuindawét tombé sie Ngánjánafé orayégh ár sáfan. Ndené árém tékrát so yérsat minde tukén.”