Mer Si Yesuenemén Lukém Yéfarotam1

Saurégh si

1Fútar Tiafilus:
Tárfár árém mwighé yaitotaménd ménát faroghét némé té kufrotawét téfefaf.2Yémofem yafrotaménd kétamé némé si té yinjoyénd ufroghan a emofem yéfarotaménd.3Yéndon té merkéráye téfandawan méinyotio yam kétándmé ufrogh, mer kéretau tayot faroghét ménát merkéráye ndenéfifi némé té kufrotau. Yéndon yafrotan feyot minde merfifi Tiafilus,4Yéndon yéné yafrotan ménát fém so mat ném efalo si méinyotio árkéméné fém té káyáretau.

Jon walitogh ár yáne áráféghmén si afrogh

5Yéné efghon Erod njam témorwén Judiamén warsagh ár, kété témorwén ghéngén wárogh ár yétkwén Jakaraya efe tafnyangérwén ghéngén wárogh ár Abiane mérén, yáne amaf Elisabet Aron ákimén.6Jakaraya a Elisabet Ngánjánene ghékfan mer ghérsaye tamorarwén, méinyotio Yurane nák tawaitoghét.7Wénde ambumofnar tarwén, ménamén Elisabetéf mwinu tárwén, a fá bulu náyáteyayénd.
8Ámb efghon Jakarayane mérénta ghéngén ásáfogh efogh nawerai, yémon ghéngén wárogh ásáfogh yérnyai Ngánján sáfrére.9Yéfene túmén témndan Ngánjánam taferngai ménát mer wimafé rokar wároghét Ngánján wáwefnogh méngo kénjút.10Njam efogh náwerai mer wimafé rokar wároghét, méinyotio ár náumendaménd wáwefnogh méngo sifayan Ngánjánafé oraighét.
11Féyo Ngánjánene njafar si résagh ár nufaryéng yáfaf, nokayoyéng ghéngén wárogh séki tambénta.12Njam Jakarayam yinjoyéng, fá sélngwél yémormén a férféram yifoyéng.13Wénde njafar si résagh árom yémndayéng, “Yau férfér ném, Jakaraya, fene Ngánjánafé orayégh si té náyárang. Fene amaf Elisabet so nésle ghakér ambum, fémon táf yétkwén taram Jon.14Fá so yém áuwégh a remngogh feyot, a tárfár so náuwetat ménamén yáne éslaghmén.15Fá ndimbal so yém Ngánjánene ghékfan, wéri nénefnar a ámb táikér nu, a fá so yém Ngánján Mbérmbér wafoghkaf kétándmayo éslagh.16Tárfár ár Israilmén yémon so ewangote kétán Yuré yéfenjo Ngánjánefaf.17A fá so yéngém Yurane frondeta, mbérmbéran a waftayan ndenanit Elaija kés témorwén, ménát afafene tikéf wangoghét kétán yéfenjo ambumafefaf, a ayáréghofnaye ghérsata wangoghét kétán káfeté; efalo ghérsat táfrendau Yurai.”
18Jakarayam yémotai njafar si résagh ár, “Ndernáye wét yénd mat so kamndan yénémamén? Yénd swém bulu wém a tane amaf siyém ndenéyameyo ausé.”
19Njafar si résagh árom yawangoi, “Yénd wém Geibrél. Yénd Ngánjáne kaka wakai a yénd kwénmáfárete siafé sái kémaufron yéné mer si.20A sénonjo fém kékmbo métar a yau noraya kétánotio yéné ufroghene efogh kawerangé ménamén fémo efalo yau tane si so táyáto. Árkéméné so efalo kénamndangi yánjo efghon.”
21Yéné tekan árém Jakaraya njam tanjetawét a mwighé uwérsoghan tamorwén ménamén tekfifi télawangérwén wáwefnogh méngo kénjún.22Njam fá nétoryéng, fá yau korayau yéfefaf. Yémofem yáyámngoyénd ménamén yémon ghékéf waingégh Ngánján yinjoi wáwefnogh méngo kénjún, fá siofnar namndai yéfeyot ngángayero tawaweindau.23Njam yáne wáwefnogh efogh nefoyénd, fá néngangoi méngot.24Soramé yáne amaf Elisabet namndai suafé a 5 ghérare méngo kénjúnro témorangérwén yau kétonau.25Elisabet norayai, “Yuram yéné tafrote tayot, yéné efghon Ngánjánam yauyafoi yáne ménde a yitérmboi tane wáiwáiafé yam árfe tambén.”

Yesuene áráféghmén si afrogh

26Táf Elisabetene 6 ghérareyan, Ngánjánam yáfáretam njafar si résagh ár Geibrél Najaret Galili yuwot,27yéné méinyo mérésoefaf efe yéreindaménd awerghét Josefefaf, Deifidene mérén kénjút, yáne yétkwén témorwén Meri.28Njafar si résagh ár yéngmormén Meri yémndai, “Mer frengégh siafé! Yuré siyém fefaf yém.”29Meri ndimbal sélngwél yémorméng yáne sian a mwighé uwérsoghét yéméindai ndernáye yéné áuwéghfifi so yém.30Wénde njafar si résagh árom yémndai, “Yau férfér ném, Meri, fémon Ngánjánene ménde té yinjo.31Fém so ném ambumafé a fém so nésle ghakér ambum, a yétkwén táf taram Yesu.32Fá so yém ndimbal a so yémndetat Minde tukén Ambum. Yuré Ngánjánam so tiyátongé warsagh ár ndenáye fété yáne áki Deifid kés témorwén.33A fá so yém Israil limánégh ár tuotot. Yáne méngotu yau so yiyato!”
34Merim yémotai njafar si résagh ár, “Ndernáye so yéné yém, ménamén yénd swém méinyo mérés?”
35Njafar si résagh árom yawangoi, “Efalo, Ngánján Mbérmbér fefaf so yéném, a Minde Tukén waftayam fém so kémafarngé. Yéné téfnan njúnnjúnofnar ambum so yémndetat Ngánjánene Ambum.36Elisabet fene mérénmén ambumafé so yém ausayan a efe témndetawét ndené mwiné téfnár yém, sénonjo suafé yém 6 ghérare kénjún.37Yénémamén Ngánjáneyot yau táikér yém.”
38Merim yawangoi, “Yénd wém Yurane faiofnar ásáfogh ár. Féyotaro so nufrote némé té wémndé.” Si soramé njafar si résagh árom yéfrangoi.

Merim yiyafoi Elisabet

39Yéné efghon Meri wékeye álighét náfrendam tesenot Judia tunakéf yuwot.40Fá nélawai Jakarayane méngot a frengégh si yaramai Elisabete.41Njam Elisabet náyárai Meriene frengégh si, ambum táf nalinai fút kénjún, a táf Elisabet témorwén Ngánján Mbérmbér wafoghkaf.42Fá tuk kéme norayai, “Frengéghkaf ném méinyotio amaf kénjún, a frengéghafé ambum fémon so yéráfteǃ43Némamén yénd méndefé wém, tane Yurane amé sái yéném tafaf?44Njam fene frengégh si náyárai, táf ambum tane fút kénjún notanai áuwéghafé.45Nderé áuwéghafé yém yáyot si némé té norayai Ngánjánene efalo si sái nufrota yáfaf.”

Meriene wagh

46Meri norayai,“Tane tikfam Yuré yuwete47a tane mbérmbér áuwéghan yém Ngánján tane Wanjarégh ár kénjún,48ménamén yémon yénd wafarotam yuwan ghérsafé yáne ásáfogh mérés!Yénandmé sénonjo méinyotio árém so wémndetat yénd ndené frengéghmén ném,49ménamén Minde tukén waftafé sélngwélafé yam tayot yafrotam.Yáne yétkwén yém njúnnjúnofnar.50Yáne ghérghérsisé so néngusamngote yéfeyot emofem férférafé yéfandat fákétándmé ámb ár saté kétánotio ámb ár saté.51Yémon té yuyafotam muyé yánjo ngángaye,yémon té ewafarnai fá efe tuktuk mwighé emarghan tamorwén.52Yémon té eweworyéng yuwot limánégh ár yéfenjo limánégh ámnjogh sifayata,wénde euyoyéng tukét métar ár.53Yémon té eremngoi siogh ár tárfár rokarewénde engwatembayéng wemár ár sotro.54Yémon té yáutánam yánjo faiofnar ásáfogh ár Israilyafarotai ghérghérsisaye.55Ebraamefaf a yánjo mérénfaf tuot,ndernáye té nénorayayéng téfene afafefaf.”
56Merif emorarmén Elisabetfé nambio ghérare soramé Meri néngangoi méngotuot.

Jon walitogh ár yáne áráféghmén si

57Elisabetene efogh njam nawerai yáne ambummén, fá náráftam ghakér.58Yáne kaka ár a fútaréf náyárayénd ndené Yuram ndimbal ghérghérsisé yuyafoi a fá káuwétawét yémafé.
598 efogh nawerayéng fá engmormén ghéngan néfghét a yémofem yétkwén yéramayénd yárefé Jakaraya soramé,60wénde yátmé norayai, “Yau! Yáne yétkwén so yém Jon.”
61Yémofem yémndayénd, “Ámb yéné yétkwén yau yém féfene mérnan.”
62Yémofem ngángaye yéngwaghnyayénd yárefai ménát ambumoe yétkwén ramghét.63Fá namotayéng farogh fefat ngángé awaunyéghe, méinyotio ár sélngwél emorméng yémon yéfarotam, “Yáne yétkwén siyém Jon.”64Táf fété Jakaraya si néngufngoi a tuwetau Ngánján.65Ár fútar Ngánján férféram ewifoi, Judia yu árém taruindawét yéné yammén.66Méinyotio ár efe náyárayénd mwighé uwérsoghan tamorwén, a namotayénd, “Efe yéné ambum so yém?” Ménamén Yurane ngángé kété témorwén.

Jakarayane wagh

67Yárefé Jakaraya Ngánján Mbérmbéram yafoi si nufngoi,68“Áuwégh yém Yurai, Israilmén Ngánján!Fá té téném yánjo ár wanjarghét.69Fá yénmáfáretam téfe wanjarégh áryáne faiofnar ásáfogh ár Deifid yáne mérénmén.70Némé fá norayai yáne Ngánjánene mat yátogh ár kénjúmé tándái,71Wanjarégh yém kétándmé téfene mék téfnárafene ngángataemofem méndméndat yénfandat yénd.72Ghérghérsisé yuyafoi téfene afafefafa ewafarotai yánjo njúnnjúnofnar árnyégh.73Wengéghofnar si norayai téfene afé Ebraamefaf.74Yénd yénmutoryéng kétándmé mék téfnárfene ngángataa yénméindai yénd yáyot férférofnar yam wafarerghét:75njúnnjúnofnar a mbarkánd kér ro Ngánjáne sáfan méinyotio téfene efghon.76Fém, tane ambum, so ném Minde Tuk Ngánjánene mat yátogh ár,so ném Yurane sáfréréend frengéghét yáyot,77yánjo árét so ewaramete wanjarégh matyéfene yaufi wányányégh kénjúmé.78Ménamén téfene Ngánjánene ghérghérsisénjafar tambén árnyégh efogh so yéném téfefaf.79So télálángé fá efe kwéfkwéfan ema kér mbanmbanan efe emso engwambete téfene kafkaf krufrát endmé.”
80Ambum nanotam a muyafé namndai mbérmbéran, a fá tékmangérwén fanfne yuwon kétánotio marataye nufaryéng Israilét.
expand_more
chevron_rightNext Chapter