Zephaniah1
1Cushi napei Zephaniah Gedaliah napei Amariah napei Hezekiah napei, Judah gwangpei Amon napei Josiah tingdau RAMPAUBE sam aide gwang.2“Kideu reu kebam maleune Ih tei ngkap dizie, RAMPAUBE ne aide ndu kegai.3Ih mina nah makaune de ngkap dizie; Ih tinggim nruine nah jaaidi hekadung de ngkap dizie, Ih kenlienme de tei ngkau dizie da. Kedanemene Ih kideu peureu mina de ngkap zing dizie, RAMPAUBE ne aide ndu kegai.4Ih Jerusalem ga minadung nah Judah ga saja peu zie. Ih heni aide gade Baal bang kebamdung nah cingkume kakga mamie kerecame zidung keugi dizie.5Kireu ga hang tingnaimiak, hekei, hegidung de reca kelame, nah RAMPAUBE de reca nah sampet tei gai kelame dede pe hegwangpei dage de sampet tei kelame.6Caugamme RAMPAUBE caisui tei kela gade nreu tet dibi, caugamme RAMPAUBE de peei la mebi mede pe puisau de peei la mebi cipaume de gi dizie.”7RAMPAUBE dwaga mlei mene bam lu! Kedanemene RAMPAUBE tutiak tingba mna dida; RAMPAUBE ratak de mtei luda nah pe qu kegaimedung de teu ncam luzie.8“RAMPAUBE ratak ketei benai ma aidungde gwang zie, Ih hegwangme napui nah pe hegwang napeimedung de saja peu zie, nah sangme niadung kekai pelane. 9Cipau nai kimui ga nsau kebamme, pe mpaube kiga kehebwak nah kecwa teugwang kegaime dage Ih keherei teugwang beuzie.10Cine cipaunai de zie, RAMPAUBE ne aide ndu kegai, ciu eh Jerusalem Heka Rieki ga kehap kwa gwang zie, deuzi pekenabe ga dekehap bam dizie, nah kideutu gade kau kemie kwa cisüt kecu.11Haplu deuzi helila bam ga kelungmedung, kedanemene helila keteime leune kap dizie; rangkanggeu mdet eh zwa kela leu de ngkap dizie.12Cipau tingdau Ih Jerusalem ga mitaubung pwalu eh mipeimedung de teikeherei kerane penuide peei zie caugamme zausak mie eh nah penui mlung gade ainzwa rang kebamme, ‘RAMPAUBE au magede anui reu gage tei gai lak, ma keyi ge mede kesia ge liede.’13Penui maheidung süt teu dizie, nah penui kidung au sia di eh gi dizie! Penui kidung tei lu ciu liede cidung ga lung luma, nah kube ling lu ciu liede penui zau sak luma.14RAMPAUBE gu tutiak tingba kedi de mna bam dida, mna nah mzet sütla! RAMPAUBE tingba benai sah kegai kwa au kengking reugwame hap sah nrung kegai nzwa zie.15Cipaunai rata tingba ge zie, keherei nah lungrei tingba ge, rahang nah kengkap tingba ge, kemui nah suisiet tingba ge, hemwa nah muiting kecu tingba ge zie.16Renia kwakelu namdi de renia eh hereu telui kwadung nah tsukwa kehudung nah hereu reudi kepui tingba ge zie. 17Ih lungrei mina leune da teugwang beu zie, ciciu eh penui miakcietme ge nzwa dizie penui RAMPAUBE dage kemau tei kedine. Penui jaidung rebui nzwa lwa pet zie, nah penui lungniadung ne mateu ge nzwa dizie.18Penui gu rangkanggeu mede kecakdung ne RAMPAUBE rata kedi benai penuide keli gailak. Pe rata mi ne kideu pelane de ngkap dizie, kedanemene pa penli teigai zie, kehing penli be kideu ga lungh kela leune dage kaizie.”
Bridge Connectivity Solutions Pvt. Ltd.