Zechariah8
1Reugwame reu RAMPAUBE sam a da gwang, rang eh,2“Reugwame reu RAMPAUBE aide rangla: Ih Zion minadung de hungla; Ih penuide hung süt nah penui ngauraume de Ih a rata süt bam!3Reugwame reu RAMPAUBE aide rangla: Ih Zion ga cailigwang zie nah Jerusalem kakga lungh zie, Jerusalem de Kesang Namdi be de eh qu zie nah Reugwame reu RAMPAUBE lamlwatu de Kemci Lamlwatu de eh qu zie!4Reugwame reu RAMPAUBE aide rangla: Kecingpei nah kecingpuidung Jerusalem lampuidung ga tet dai zie, nah mileune de pe ba ga hetuitie pwa dai zie kedanemene penui cing zu kedine.5Namdi be lampuidung ga mipeina nah mipuinadung nggwa eh pui dai luzie.6Reugwame reu RAMPAUBE aide rangla: Magade cipau tingbadung ga mina bangkelume miakngau gade teigaikelak ge nzwa dicai, cide a miakngau gade teigai kelak ge nzwa dizie ni?, aide RAMPAUBE ne ndugai.7Reugwame reu RAMPAUBE aide rangla: Ainie, Ih a minadung de naimiak kepetle nah naimiak kenlütle deu gade kelibeu lai eh bam!8Ih penuide naimiak kepetle gade kenlütle gage ngngwa gai zie, nah penui Jerusalem kakga lungh zie, iciu eh penui a mina tei dai dizie, nah kesang nah kesamsang gade Ih penui Tinggwang tei luzie!9Reugwame reu RAMPAUBE aide rangla: Nnui cu samdung aide siu bam kelame caihakecime mui gade gwang kela de a ki bang dwabeu kecu dau, a ki aide, Reugwame reu RAMPAUBE: Nnui ba tei ngkinglu iciu eh kerecaki teilu kerane.10Kedanemene cipau tingdau dwa migede hegurie nia hekwa ma, mina nah makaune ziemne pemmi kette gah, nah kemie kegwang leune da ngauraume ziemne lungciep kette gah. Ih hangge ge kecude pe kidame kerai peu ngngwa sia di.11Dede cu au tei gwang kedi tingdau nzwa lakta, bangkelume aidungde da Ih la zie, aide reugwame reu RAMPAUBE ne ndugai.12Lungciep leuhbe linggai zie; kubebang petsi buibeu zie nah kideube petsi buibeu zie; tinggimdung pe hezin keigai beuzie, kedanemene Ih mina bangkelume aidungde de peu ai pelane gumlu zie.13Nnui au heleuh kedadung ziemne keulia kegai reset ge, Judah nah Israel leuhme. Cine Ih nnuide kelibeu zie nah nnui au samlam ge zie. Ngngi so; nnui ba de peu ngkinglu!14Kedanemene reugwame reu RAMPAUBE aide rangla: Nnui paumedung a rata tei kegai ziemne Ih nnuide tei keherei kera riem kegai nzwa, reugwame reu RAMPAUBE ne ranggai, nah Ih cide tei tadi ma,15cinzwa eh cudau de Ih ma keyi Jerusalem nah Judahme da teigai kera riem gai dai zie! Ngngi so!16Aidungde nnui tei maisia bi kerabedung: Kesangbe ranglu, hangge gede pe kidabe dage. Kesangbe, kemzuibe, nah nnui heriekidung ga lungciep bam eh tiaklu.17Nnui mlung gade hangge ge dage makesia tei gai kera riem so, nah kenret sampetdung de nnui sui so, kedanemene aidungde Ih a sui ma!, aide RAMPAUBE ne ndugai.”18Pecai reugwame reu RAMPAUBE sam a da gwang eh, ranggai,19“Reugwame reu RAMPAUBE aide rangla: Kei mdai bekei, kei mengei bekei, kei hena bekei, nah kei kerei bekei kemmwang mnei keladung de Judahme ziemne suiyi ting ge, misui keyi, nah suiyi hengyidung ge zie! Ciziemne kesangbe nah lungciep de kulu!20Reugwame reu RAMPAUBE aide rangla: Minadung gwang dai zie, namdidung ketsamtsam ga lungh kela leune de.21Namdi ge ga lungh kelame namdi kedage ga mie rang zie, ‘RAMPAUBE dwaga kelwa mie eh anui nggia kie go nah reugwame reu RAMPAUBE de peei go! Anuide mie lau.’22Mina kekiee ge nah heleuh kengkingdung Jerusalem ga reugwame reu RAMPAUBE de peei gwang zie nah RAMPAUBE ngaugia kie zie!23Reugwame reu RAMPAUBE aide rangla: Cipau tingdau helet nah heleuh leune gade mina hang kerei ge n pai ri nzap lwe rang zie, ‘Anuide peu ncu nzang lo, kedanemene n da Tinggwang la lie kecu anui siu delu!’”
Bridge Connectivity Solutions Pvt. Ltd.