Titus3
1Kenlummedung de penui reu kedime nah kengkieng keteume kangga lungh lulo, nah penui sam mzai lulo, nah heta keyi leune tei kera mtei lulo de eh ranglia daibeu lulo.2Penuide migede de rangmsia helo, nggi helo, nciep lulo, nah mina pelane dage mizai henah lulo beulo.3Kedanemene anui de piage au mie nah Tinggwang samzai tei ma. Mide peu anuide cwadi nah pumteihbe hengindung nah suiyidung ketsamtsam baang tei dida. Anui mide ngaurau nah mide ngau miriak, mi anuide ngkau nah anuide mide ngkau eh lungh gwang dida.4Dede anuide Kelikelube Tinggwang ngaugia nah pe keku lia kegai dau,5pa anuide kelilu, cide anui samsang eh batadung teikelu ziemne ma, dede pe ngaugia ziemne. Pa Kemci Rabe gade anui maudung hui mcibeu, iciu eh anuide mna keheci nah teilung heci pwapeu.6Tinggwang anuide Kelikelube Jisu Khrista dade Kemci Rabe anui reu gage kepui tei ruigai beuda,7iciu eh pe ngaugia gade anuide tei masanglu eh anui regui kela kelungta keringde gumlu kerane.8Sam aide au nlumlukebui ge, nah Ih ncu peu aidungde rang eh bam neu, iciu eh Tinggwang de nlum kelume sünne eh bata keyidung tei bamlu kerane. Ma aidungde au yi nah mileune ziemne pekeyi bam.9Dede marang kerenia kecu kemtabedung, nah paupai hadung, nah kesamlim nah hezai ziemne ngngwa kesiade gade mbai lulo, kedanemene cidungde kemmi gah nah kemta lu.10Mide pungpang kelame de piage mede piana marang lialu. Cipaucai penuide gi dilu,11cikenzwame lampui petaube gade nreu tet kedi, nah pekatei pecu mmau eh la kedi nang ci bamlu.12Ih n dage Artemas mede Tychicus de langgai de, Nicopolis namdi ga ada gwang kera n laikai tei lulo, kedanemene Ih tingtiak ting cika bam kera cet luda.13Hezaikecibe Zenas penai Apollos de penai beuh ga ngha beulu, iciu eh penai magede teumaikesia bam melu kerane.14Nah, maikesiame ziemne peu anui kenlumme de bata keyidung tei relilu maisia, iciu eh penui tsi buitadi melu kerane.15Acu ngngwa kebam pelane ncu kelum gaila. Kenlum gade anuide hung kelame de kelum gailo. Tinggwang ngaugia nnui pelane da peu bam kelube tei lulo.
Bridge Connectivity Solutions Pvt. Ltd.