Song of Solomon8
1Ih peu ncu a sinabe lie neu lie, a pui tung gade tung kelube. Iciu eh Ih hegwale ncu redau kecudau de, Ih ncu kemam lubuilu, nah migede acu pelung sia dilak lu.2Ih n puisau tei pwa ncu a pui kiga ngngwa gwang zie, pa acu ledeu kebeube. Ih ncu masala zau peu sak kera ha zie nah a kuraletsi le tei pwa kebam petsi dui peu sak zie.3Pe ba hile a peu kangga bam, nah pe ba zetle le acu kemui bam.4Ih nnuide peu sampet gai neubam, Jerusalem napuimedung, nnui kemrai tei kebwak mede tei mrak lak lie kecu pa neu kemaktane.5Hetaideu gade nghang kela aide cau no, pe kubepei de ngngei kebambe de? Mipui be mipei dage rang kebam Ih ncu tampaktsi bang kang gade tei mraklu; cikade n pui ncu tetlak lu; cikade ncu mnalu.6Acu n mlung gage baang lu, n ba gage tuipwa kelu nzwa, kedanemene keku au ketsai nzwa ngking. Mrai kemcui au pe keku gah Sheol nzwa; pe miheudung heupetla; cide au mi heusüt kecu ge, miheu kedadung swa lum gwa kecu ge.7Dui kekiee le keku cide peu gailak, duinai le cide pung tetti gailak. Mipei ge pe ki mabam pelane keku ziemne peu cai, cide de au mlai dizie.8Anui tipuina ge bam, nah pe tung de ceu zeu reu. Mige gwang hemeu ziemne pecu kie kecu benai anui tipuina ziemne anui dai ge tei lu lai no?9Pa tangdeu ge cai, anui pereu gage rangkanggeu hapia ge teigai zie. Pa kikam ge cai anui cedar kwakdung le pecu mtei gai zie.10Ih kirie ge bamla, dede cu au a tung kuda hapiadung nzwa dida; cine Ih au pe miak dwa gade lungciep teugwang beu kela ge dida.11Baal Hamon ga Solomon gu kubeluh ge bam. Pa kubeluh cide lamlui lu kebuime de ha beu. Hangge ge kecu petsi ziemne rangkanggeu shekel cangge ge keugwang beu kerabe.12A kubeluh, agu rünne, cide a dwa ga bam; shekel cangge de n ziemne da, Solomon, nah shekel haina de petsi pie rengei kebeume ziemne.13Nang heguriedung ga lungh kebamme, a zangmedung n kwa kingnei eh bam; acu peu kingnei gailo.14Kelwalu, a kubepei, nah pak keci helung mede hetiseuna ge nzwalu mosala lamlwatudung ga.
Bridge Connectivity Solutions Pvt. Ltd.