Romans9
1Khrista gade Ih kesangbe rangla. Ih mret lama, nah a lungning Kemci Rabe gade zierang teibam,2a ziemne a mlung ga suisiet kedi ge nah keteei penli kegah de bam.3Kedanemene Ih pumteih ria gade a leuhmedung, a sinamedung ziemne, acu peu reset pung nah Khrista dade teuntsam dineu kebamne.4Penui au Israelme na. Penui au Tinggwang name tei luda, nah kendu, nah samkakdung, nah hezaibe mtamapeu, nah Tinggwang de kereca, nah sampet keludung la.5Penuida kemlang paume dungde, penui dade Khrista de pumteih zai gade lunghgwang, pa maleune reu Tinggwang. Peu pecu kelungta hetwa pung kelube tei lulo. Amen.6Dede cide au Tinggwang sampet kebeude teilu tadi lie kecube ma. Kedanemene Israel dade lungh kegwangme pelane au Israelme kesangme melu. 7Mede Abraham leuhme pelane pe name kesang ma. Dede, “Isaac dade n leuhme de qu luzie.”8Cide cai, pumteihbe namedung au Tinggwang namedung ma. Dede sampetkelu name dungde pwa pe leuhme lie dida.9Kedanemene aide au sampetkelu sam: “Aipau tingdau Ih gwangzie, nah mipeina ge Sarah de peuzie.”10Aide rünne ma, dede cipaucai Rebekah liede, anui pau Isaac dade tetlak lu,11dede hename de mnalu kemakne nah magede keyi mede kesia ge de tei kemakne de, Tinggwang mariem pe suibe gade teilu kerane,12batadung ziemne ma, dede pecu qu kegaibe ziemne, pe dage ranggai, “Hecingbe henabe gwatei zie.”13Cide au rauteu kelanzwa da: “Jacob de Ih ku, dede Esau de Ih ngkau.”14Iciucai anui dai ranglai? Tinggwang da masangkemak bamni? Peu madaude cinzwadi helo.15Kedanemene pa Moses dage ranggai, “Ih ngaunggia kerame dage Ih ngaunggia zie, nah Ih ku kerame dage Ih keku teugai zie.”16Cine, cide mina lungning ziemne ma, mede mina teikela ziemne ma, dede Tinggwang ngaugia keulia kegai gade.17Kedanemene kesanglaisiu ga Tinggwang Pharaoh dage ranggai, “Aipau kiede ziemne Ih ncu teu ncuhlu, iciu eh Ih n dade a kengkieng keulialu kerane, nah iciu eh a zi kideu reu pelane ga rangrwalu kerane.”18Cine, Tinggwang pa ngaunggia keneume de ngaunggia la, dede pa helung teitak keneume lung teitak dila.19Cidau nang a dage rangzie, “Daitei eh pa mi mau peei zeu reuno? Kedanemene caube ne daidau pe lungning renialu dino?”20Ciciu meliene, minabo, Tinggwang sam keli kera nang cauno? Tei kelube tei kegaibe dage, “Daitei eh nang acu ainzwa teigai no?” de eh rang zieni.21Li keteibe lidei ket gade li ge kemlang ta ziemne teukera, nah li kedabe tingnai ramsang teukera ziemne teikera lidei reu pe nzeu bam meni?22Dede magade Tinggwang, pe lunghop liagai neu nah pe kengkieng peu ci neula eh, dede lunghop lidung ngkap kera tei keludung dade pelung tiesüt eh liagai cai?23Pa aide tei kegaide pa pe kendu kedide ngaugia lidung, pe kendu ziemne mrai tei kegaidung dage peu cilu kerane liecai?24Nah pa aide anui ziemne teigai liecai, pa qusi kelume, Jewme kakgade rünne ma, dede Gentileme kakgade de?25Tinggwang Hosea cairasam ga de rangkegai nzwa: “Ih a mina kemakme dungde a mina lie quzie, nah pecu, a kube kemakbe de a kube lie zie.26Nah, ‘Nnui a mina ma,’ de eh penuide rangkegai heni dega, cika penuide Ringkela Tinggwang name lie quzie.”27Dede caihakecibe Isaiah Israel ziemne helungnei eh sahgai, “Israel namedung jaaidi ga heciang nzwa kiee liede, kelilu kera au ketsam nage zie,28kedanemene Rampaube kideu ga pe sambe teigai zie, tei cangsiak zie nah ri dilak.”29Isaiah mrairang kegai nzwa eh, “Reugwame reu Rampaube anuide anui leuhme bangnzeu beu melie cai, anui au Sodom nzwa dizie, nah anui Gomorrah nzwa dizie dege.” 30Iciucai anui dai ranglai? Gentileme makesangbe peei kemakme, makesangbe ngaulu, nah cide kenlum gade masang kelu.31Dede Israelme, hezai makesangbe mzuikela medung, hezai gade cide ngau luma.32Daitie no? Kedanemene cide penui kenlum gade peei kemakne, dede batadung gade. Penui pi kensui tsu reuga nsui eh kau dida,33Kesanglaisiu ga raupwa kelanzwa, “Ainie, Ih au Zion gage kensui tsu ge nah kengkau tsura ge kai gaila. Cide de nlum kelubede peu ngngam dilak.”
Bridge Connectivity Solutions Pvt. Ltd.