Romans6
1Iciucai anui dai ranglai? Anui kemau tei jüja bam zieni iciude ngaugia kieesi lu kerane?2Peu madaude cinzwadi helo. Anui kemau gage tsai kedime, dainzwa cika anui lungh bamsi lulai?3Mede nnui kekiee ge Khrista Jisu gade duipum tei kelume pe tsit gage duipum tei kelu nnui ci meni?4Cine, anuide au duipum teikelu gade pecu ngngwa pe tsit gage kung dida. Aide teikedi au Peibe Tinggwang kendu gade Khrista de ketsai gade kwakcuh kelunzwa, anuide peu teilung kehecibe ga lunghlu kerane.5Kedanemene magade anui pecu ngngwancüt lucai pa ketsai nzwa tsai eh, pa ringcuh kecuga anuide ngngwancüt luzie.6Aide anui cibam, anui teilung kehegwabe de pecu ngngwa gwakdi kecu, iciu eh kemau pumteih de ngkapdi kerane. Aide teikedi au anuide peu kemau baang teisi tadi kerane.7Kedanemene tsai kedibe de au kemau gahda de eh ndulia dida.8Dede anui Khrista de ngngwa tsai dicai, anuide pecu ngngwa lunghdi kera anui nlum bam.9Anui cibam Khrista de ketsai gade kwakcuh kelune pa tsai dailak da; ketsai pereu kengkieng bamsi meda.10Kedanemene Khrista tsit de au, pa piage gage pelane ziemne kemau gage tsaigai. Ciuliede, pa lungh kela teilung de, pa Tinggwang ziemne lungh bam.11Cinzwa eh, nnui nnuide kemau ga tsai gaidi delie de, Khrista Jisu gade Tinggwang da ringla dida lie eh cetlu maisia.12Ciziemne kemau depeu nnui rimdi kela pum reu diso iciu eh nnui pumteih hengin dungde mzai melu kerane.13Nnui pum mzidung de kemau gage kaiso, masang kemakbe netdung teidi kerane. Dede Tinggwang de nnui teilung peulu, ketsai gade kering gage ngngwagai kelumedung nzwa, nah nnui pum mzidung de Tinggwang de peulu kesamsang netdung teilu kerane.14Cine kemau depeu nnui reu diso. Kedanemene nnui hezaibe kangga bam ma, dede ngaugia kangga.15Iciucai dainzwalai? Anui hezaibe kangga mene, ngaugia kangga la kedine kemau teizie ni? Peu madaude cinzwadi helo.16Nnui kilame ge tei eh mige samzai tei zielie eh nuikatei nnuide kekaibe, nnui pe sam mzai kelabe kilame lie kecu ci meni? Aide au kesang nnui ketsai gage kaidi kela kemau kilame mi, mi makesang gage kailu kela samzai kilame bi.17Dede Tinggwang de twa! Kedanemene nnui kemau baang teigwang, dede nnui lung gade nnuide peu kebeu keledeusam mzai luda.18Dede kemau gade nnuide teumpet luda, nah nnuide makesangbe kilame tei dida.19Ih mina ria gade ma rangla kedanemene nnui pumteihbe kemnei dene. Kedanemene nnui pumbe keu nnui mci kemakdung kilabaang tei eh nah hezai teikemak gage kai kedi, cide nzwa cu, nnui pumbe de makesangbe da kilabaang tei eh pwa peulu tei mcilu kera ziemne.20Kedanemene nnui kemau kilabaang tei keladau, makesangbe nnuida lama.21Cipau tingdau, nnui daipai kemmi ge ngaulu dino cu nnui ngngam bam keladung gade? Kedanemene cidungde caineu au ketsai.22Dede cu au nnuide kemau gade teumpet luda nah Tinggwang gu kilabaangme ge dida, nnuide tei mcilu kera nnui petsi bam dida. Cide gu caineu au kelungta kering.23Kedanemene kemau ziehidung au ketsai, dede Tinggwang mta mapeu au anui Rampaube Khrista Jisu gade kelungta kering.
Bridge Connectivity Solutions Pvt. Ltd.