Keuliakegai1
1Aide Jisu Khrista dade kegwang keuliakegai, tei nzet gwang keradung pe kilame dage keulia kerane Tinggwang ne pecu kepeu de. Pa pe tinggimgwabe dage pe kilabe John dage langgai eh peu cigai.2John pa kengaube pelane, Tinggwang sam nah Jisu Khrista ha, zierang teigai.3Caihakeci samdung aide pei kelame nah kingnei kelame nah raupwa keladung mzai kelame samlam pungtu lie, kedanemene ma aidungde tei gwang kera peting nna bamdi delu.4John ne Asia ga kebam ngqwadung hena dage kekai: Cude kelabe, ndaa de kelabe, nah gwangdai kerabe dade, nah rabedung hena pe hegwangbam dwaga kebam dade,5nah Jisu Khrista, kesamsang zierang keteibe, ketsai gade ringdai kelu raitube, nah kideube ga hegwangmedung reu kengkiengbe dade nnui da ngaugia nah lungciep bam kelube tei lulo. Anuide hung kelabe nah pe jai le anui mau gade anuide keli kebeube,6pa anuide hegwangram ge nah Tinggwang nah Peibe ziemne cingkume ge teibeu da—peu pecu kelungta ndu nah ngkieng kelube tei lulo. Amen.7Ainie, Khrista hemwa gade gwangzeu;mina leune pecu ngau zie,pecu reu kegaime de si eh.Kideu ga heleuh pelane pe ziemne hap dizie.Peu ciciu kelube tei lulo, Amen.8Rampaube Tinggwang ranggai “Ih au alpha nah omega, cu kelabe, nah ndaa de kelabe, nah gwangdai kerabe, Ngkiengtube.”9Ih John, nnui sinabe, Jisu gade keherei kecu ga nah hegwangram nah sünne eh lia kecu gade nnuide ngngwa kencütbe, Jisu ha zierang nah Tinggwang sam ziemne duigwadeu Patmos lie qukela de ga la.10Rampaube tingba benai Tinggwang Rabe acu kezeu teudi, nah a caile biede telui kwa kenzwa ge sahbak kegai Ih siu.11Cide ranggai, “Nang kengaubedung laisiukwak gage raulu, delwe ngqwa henadung dage cide langgai lulo—Ephesus namdi, Smyrna namdi, Pergamum namdi, Thyatira namdi, Sardis namdi, Philadelphia namdi, nah Laodicea namdi dage.”12Ih a dage marang kebam kwa de pie zielie nreugwang, nah Ih nreugwang ge Ih kecak mitaubungbam hena ngau.13Mitaubungbam sum ga Mina Nabe kenzwa ge, cwatie ge pepi ga hung cang cuge ncwabam, nah kecak kiakangria ge pe hekarak kang pung bam.14Pe peu nah petam au mamai nzwa ha—buising nzwa hareidi—nah pemiak au miheu nzwa.15Pe pi au hetageu neundui pwa kebambe nzwa, hetageu mi gage ru mci kelube nzwa, nah pe kwa au dui kekiee lwa kemie kwa nzwa.16Pa pe ba zetle hegi hena pwa bam, nah pe mui gade kingtie pemui keyi lule ailam kebam ge pet bam. Pe zu au naimiak tingna tingding dau kebaa nzwa baa.17Ih pecu kengau dau, Ih ketsaime nzwa pe pi ga keumie di. Pa pe ba zetle areu gage kai eh ranggai, “Ngngi so, Ih au Raitube nah Kamtube,18nah ringla kelabe. Ih tsai di, dede ainie, Ih ringlamui dida! Ih Ketsai nah Hades cabi teula.19Ciziemne nang kengaubedung rau lulo, cu tei kebambe, nah aipaucai tei gwang kerabedung.20Nang a ba zetle hegi hena kengau de nah kecak le ketei mitaubungbam hena kebam kengkim kie de ainzwa: Hegi hena de cai ngqwa henadung tinggimgwame, nah mitaubamdung henadung de cai ngqwa henadung deda.”
Bridge Connectivity Solutions Pvt. Ltd.