Psalms80
Lei kempwakme muiteube ziemne, Shoshannim Eduth dage kerautie telei kegai. Asaph reca lei ge.
1Anui kekie kingnei gailo, O Israel de kekwabo, nang ne Joseph de kekwabe meurünhau de kekwa nzwa; nang cherubim reuga bam kelabe, kebaa anuida tau gailo!2Ephraim, Benjamin, nah Manasseh leuhdung miakngau tei eh, n kengkieng ta teilia lo; gwang eh anuide kelibeu lo.3Tinggwang, anuide tei mcang dailu; Nzu kebaade anui reu gage kai gailo, iciude anuide kelilu zie.4Rampaube reugwame reu Tinggwang, daitie ge nang n minadung kie kegaidau n rata bamlai?5Nang penui helung kesia tyei kera peuda nah mimiakdui piak kedige sak kera peuda.6Nang anuida mage teigai anui namdame de ngngwa regeu kerane, nah anui ngauraume penui kakgade anuide nui bam dida.7O reugwame reu Tinggwang, anuide kelibeu dailo; N ngaugai anuide pwalia lo iciude anuide kelilu zie8Nang Egypt deudi gade kubebang keugwang luda; nang heleuhdung de gwa mpetdi nah cikage sum luda.9Nang cide ziemne hangdeu teimci luda; cide pe mah himlu nah deudi pelane gum puilu.10Lamlwadung pemie le sunglu, Tinggwang gu cedardung de pe kiak le lungh gumlu.11Cide pe kiakdung Mediterranean Jaaidi kemdei ga miecang nah pe mah him mie eh pe pwakdung pwakcuh Ephrateme Reuki kecang.12Daitei nang rie twagwa kenzeude dap pop dino iciu eh lampui tetkah kegwang leu depeu pecu raityei kerane ni?13Renaam nkiadung ne gwang tei msiadi nah makaunedung cide tyei.14Nreugwang dailo, reugwame reu Tinggwang; tinggim gade pie nghung gailo nah mcet gailo delwe nah kubeluh aide pie rengei beulo.15Aide nang ne n ba zetle le ling kegai mah de da, peu pwakcuh kera nang tei kegaide.16Cide bikau nah ru dida; penui gah dida nrata ziemne.17Peu n ba zetle ba de mina be reu ga bam kelube tei lo, n ziemne nang tei ngking kelu mina nabe reu gage.18Iciu de anui n dade nreutet dilak; anuide peu ringlu, ciciude anui nzi qu di zie.19Maleune peu kelabe RAMPAUBE Tinggwang, anuide retak dai lu; nzu kebaade anui reu gage baa gai lo, iciu de anui kelilu zie.Bridge Connectivity Solutions Pvt. Ltd.