Psalms78
Asaph gu maschil ge.
1A keledeu kingnei lu, a minadung, Ih kerang samdung kingnei lu.2Ih maregwa gade marang zie; Ih leitei zie ndaa kebai pwa kebam samdung dele. 3Sam aidungde anui siu nah ci kelube, anui paume anui dage rangkebeu samdung.4Anui penuide kebainzeu dilak penui name dade. Anui pecai lungh keleume de ranglia zie RAMPAUBE twalu kebui ta teikegai ha de, pe kengkieng, nah miswakegahdung pa teikegai de. 5Pa Jacob dage samkak kelu hezaidung tei gaibeu nah Israel dage hezai kaibeu. Pa anui paumedung de aja kaibeu iciu eh penui namedung dage pezaidung ledeu beulo.6Pa aja aide kaibeu iciu eh lungh keleume pe zai de cilu kera ziemne, hename mna mene kebamme, nah penui namedung de caune rang nswa beulai.7Iciu eh penui kenlum Tinggwang da bamlu kerane nah pa tei kegai dung nsung tadi lak dede pe ajadung nsung bamlu kerane.8Iciu lude penui penui paumedung nzwa dilak, penui au renia nah samzai teikemak ceheu ge, nah penui kecet dung petau kemak ceheu ge, nah penui rabe teilungh lam sap ntip ma nah Tinggwang dade masang ma. 9Ephraimme lakpi reunet telei lu dede penui pak caili di hereu ketei benai.10Penui Tinggwang de samkak kelu de luulu tadi nah pe zai mzai meidi.11Penui Peta tei kegai dung nsung tadi, Pa miswakegah tadung penui dage tei kelia de.12Penui Pa miswakegah tadung penui paume miakngau tei eh Egypt deudi, Zoan namdi langkie gade tei kegaidung de nsungtadi.13Pa Jaaidi de mzi di nah penui de peu kahlu; Pa dui depeu tangdeudung nzwa sapbam kera teigai. 14Pa tingna penuide hemwa le gumteu nzang nah tingmui pelane mi kebaale.15Pa tsura hetaideu gade teipang gai nah pa penuide dui teumai kesia kiee swade kiee eh peugai, Jaaidi singdung teipuilu kebui. 16Pa tsura gade reuna dui lwa kepet teibeu nah kereukidung nzwa duilwa kepet teigai.17Dede penui pe dage kemau tei jüja ladi, Hutube Tinggwang de ngngwa hetaideu gade renia ladi.18Penui lung gade Tinggwang de kedei di penui ketyeipok tyei keneube tyei mnunglu kera kie kegai ziemne.19Penui Tinggwang de kemmau sam rangdi; penui rang eh cu, “Tinggwang hetaideu gade anui ziemne ketyeipok teleibeu kesang beu lubui ni?20Pielo, pa tsura kedeu kegai dau, duilwa pet nah reuna reuki dung lwapui di. Dede pa tangku de peulu bui ni? Pa pe mina dung de heteih peulu bui ni?”21Rampaube aide siu kegaidau, pa pe rata di; cine pe mi le Jacob de mcau eh rudi, nah pe rata Israel dage kai gaidi,22Kedanemene penui Tinggwang de nlum ta kedine nah pe kelikelu de nlumta kedine.23Iciu de pa ting kehu de aja kai gai nah tinggim kikam dung de ngkei gailo eh.24Pa manna penuide peu tyei kera ziemne rui nhung gai beu, nah tinggim gade mei penuide peugai. 25Minadung tinggimgwame taktyei tyeilu. Pa penuide pui kenlim ketyeipok langgai beu.26Pa naimiak kepetle tingkai de peu tingkam gade gui gai, nah pe kengkieng le pa tingbangle gu tingkai mapie beu.27Pa penui dage heteih rui nhung gai beu rebui katung kecu nzwa eh, nruine peikap gaikelak Jaaidikung ga heciangdung kieege.28Cidung de penui ramzeuki sumga cakmie, penui paiki taidung leuga.29Cine penui tyei nah nggei lu. Pa penuide tyei keneu be peu gai.30Dede penui mnung tyei canglu ma; penui ketyeipok tyei eh bam.31Cine Tinggwang rata penui dage kaigai nah penui ngkingtume de teitsetdi. Pa Israel ga kedetkelu rehangme de teingkau di. 32Aiciu bam de, penui kemau tei bam di nah miswakegah batadung pa teikegai dungde nlumlu tadi.33Cine Tinggwang penui tingbadung tei ndui di; penui teilungdung ketsai kengi le puih di.34Tinggwang penuide teiherei kegai dau ne penui pecu peei mdeu zie, nah penui nreu gwang nah sünne eh pecu peei lu zie.35Penui helung nreulu delwe Tinggwang au penui tsura nah hutube Tinggwang penuide rikelube lie eh kecu nsunglu zie.36Dede penui pe dage kenret samdung rang zie nah sam kette lungsang ma.37Kedanemene penui lung pedage sap ntip lu kemakne, nah penui pecu samkak kelude samsang lu kemakne. 38Iciude Tinggwang, ngaugia le pui kebamne, penui mau gibeu nah penuide teingkap dima. Yeo, pia kekiee ge pa pe rata kezeudi nah pe lunghop de kezeu di.39Pa penuide teikelu pumteihbe lie kecu nsunglu, tingkai guitet dila, nah cailila kemak nzwa.40Penui daikenzwa gede hetaideu gade pecu mlaidi dino delwe hepui deudung gade pecu pelung tei msia dino!41Penui Tinggwang de kedei daidai nah Israel kemci Tinggwang rata teidi.42Penui pe kengkieng tadung cet luma, dainzwa penui ngauraume dade pa kelibeu bi kecu.43Pa pe rata keheu kegai ta Egypt deu gade nah Zoan cuikui gade miswakegah bata tei kegai dau.44Pa Egyptme reukidung de hejai teimie di iciu eh penuide peu penui reuki duidung sakgailak dilu kerane. 45Pa tammainedung penui de teikeherei guide gai kera langgai nah hegaudung ne penui deu kepui teidi. 46Pa penui taluh nah penui meidung peu tangriem de tyei. 47Pa penui kube luhdung tangheu le teimsia di nah caimunbangdung tangheu keisüt gai eh teimsiadi. 48Pa tangheule penui tumdung de teitsetdi nah penui meuründung de hegi keimie teitsetdi.49Perata teu penuide teiherei sütgai. Pa lunghop, rata, nah keherei langgai ketsai sam pau kelame nzwa gwang.50Pa pe rata de kezeu dima; Pa penuide ketsai gade mbai beuma dede penuide rapia le teitsetdi.51Pa Ham paikidung ga kelung penui kengkieng neraime, Egypt pelane ga neraibe de teitset ciakdi. 52Pa pe minadung de meurün haude nzwa ngngwa mpet lu, nah penui maadi puisau tei eh hetaideu kahgwang.53Pa penuide ngngwa kwak gwanglu nah peu ngngidi mene, dede penui ngauraume de jaaidi dui ne hegakdi.54Pecai pa penuide ngngwa Canaan deu kemci kungga gwanglu, pe ba zetle ne gwakelu lamlwa aide ga.55Pa heleuhdung de penui dwa gade gwampet di nah penui kidung pwa pe minadung de peudi. Pa Israel leuhme depeu penui paikidung ga bamlu.56Iciu de penui Hutube Tinggwang de mmaudi nah mcaudi nah pe ajadung de kailu tadi,57Penui lungsang luma nah penui peimedung nzwa mide kecwa ta tei ladi; penui lakpitsi kengkoibe nzwa kedine nlum gailak di.58Kedanemene penui gu heni kehudung dene pe rata teidi nah penui mamiedung pwa pe rata teidi.59Tinggwang aide siu kegaidau, Perata di nah Israelme de püt mcigi di.60Pa Shiloh namdi paiki dega lungh bamla kideu ga, pa mina kakga ngngwa kelunghbe paiki de.61Pa pe samkakbung de peu tuilu kebui peudi nah pe kemdu de ngauraume ba gage kaidi.62Pa pe minadung de kiengtie dwa gage peudi, nah pa pe mapwamedung de pe rata di.63Rehangmedung de mi le rutset ciakdi, nah releimedung meu gaikera gahdi.64Penui cingkume de kingtie le gitsetdi, nah penui hemipuidung depeu haplu tadi. 65Pecai Rampaube mraklu mige kezip gade nrak kelunzwa, reugwame ge zau saklu eh mrung kecu nzwadi.66Pa pe ngauraume maadi de gwa cailidi; Pa penui de kelungta ngngam kera gage kaidi.67Pa Joseph pautsa kiria de pütdi, nah Ephraim leuhme de kedetlu tadi.68Pa Judah leuh de nah pa hung kela Zion Deutu de kedetlu.69Pa pe kerecaki Tinggimdung nzwa teilu, kelungta ziemne pa tei ntip süt lu kideube nzwa.70Pa pe kilabe, David de kedetlu, nah pecu meurün kwakela bam gade ngngwalu.71Pa pecu meurünpui pe na ngngwa keladungde kwa kela gade ngngwalu, nah pecu pa ngngwa gwanglu, pe minadung, Jacob leuhme, Israelme, nah pe magum kerame de kekwabe tei kerane.72David pe lung pelane teu penui mapie, nah pe baciem keyi teu eh penui puisau teibeu.Bridge Connectivity Solutions Pvt. Ltd.