Psalms36
Lei kempwakme muiteube ziemne. RAMPAUBE kilabe David gu lei ge.
1Mina kesiame ge pe mlung kecok gade pe kesiadung rang bamla, pe miakngau ga Tinggwang de kerüt kette gah. 2Kedanemene pa pekatei pecu hemak bam kelane, pa cet kela pe maudungde ci gai lak nah ngkau dilak lie lala.3Pe samdung au kemau le pui nah kenret rünne; pa au makecime neu mah nah makeyi teineu ma.4Pa pe zeu ga kebamdau, pa kemau tei kera riem bamla; pa kesia ta tei kera mtei la; pa makesiabe kette gidi lama.5N samkak kelu samsang, RAMPAUBO, tinggimdung ga hangcang bam; n samsang au hemwadung ga hangcang bam.6N masang au Tinggwang gu lamlwadung nzwada; nang ne tiak kegaidung au ma coksüt kecu nzwa. RAMPAUBO, nang minadunge de nah makaunedung de kaipwa bam lula.7N samkakkelu samsang daikenzwa gede pemi whung no, Tinggwang! Minadung n hesiu mie kangga msiu lula.8N kerecaki ga pui nliem kebam gade penui hengyi bam; nang penuide n suikeyi reuki gade peu sakla.9Kedanemene n da teilung bangbe kebamne; n keba gade anui keba ngau zie. 10N samkakkelu samsang de ncu ci kelame de peulo, pe nlung mzui kelame de gum beulo.11Peu ngang kelame de a da gwang nna so Kemaume de peu acu gwagi diso.12Cika kemaume kauzeu dida; penuide dap ngkau dida nah penui au cuh gailak eh bam dida.Bridge Connectivity Solutions Pvt. Ltd.