Psalms27
David gu lei ge.
1RAMPAUBE a kebaa nah acu ri kebeube; Ih cau de hing lai? RAMPAUBE a teilung kensiube; Ih cauge de hing swa lai?2Kemau keteime a teih tyei zie lie a da gwang kecudau, acu renia kelame nah a ngauraume penui pi nsui eh kau di.3Reugwame acu twagwapung bam liede, a nlung hing dilak; a da hereu teicuh di liede, cinzwa liede Ih kuu eh bamzie.4RAMPAUBE dade Ih mage kiela, nah Ih cide peei zie: Ih a teilung pelane RAMPAUBE kiga lunghlu kerane, RAMPAUBE keyi de pie kerane nah pe kerecaki gade Ih macet ncoklu kerane.5Kedanemene keherei tingdau kelu benai pa acu pe ki ga acu kebai luzie; pe paiki gum le pa acu gum luzie. Pa acu tsura reu gage teu ncuh gai beuzie! 6Pecai acu twagwa kebam a ngauraume leune reu ga a peu cuh di, nah pe paiki gade Ih a sui keyi ratakdung peu zie! Ih lei teizie nah RAMPAUBE dage leidung teigai zie! 7Kingneilu, RAMPAUBO, a kwa Ih n da mra kegaidau! Acu ngaunggia gailo, nah a sam keli lo! 8A mlung n ha rangla, “Pe zu peeilu!” Ih n zu peei la, RAMPAUBO!9N zu a dade kebai di helo; n kilabe de n rata le peu nreutetdi helo! Nang acu kenghabe tei beuda; acu gidi so mede pütdi so, acu rikebeube Tinggwang!10A pei nah a pui acu gidi liede, RAMPAUBE acu ngngwa luzie.11N lampui acu ledeu beulo, RAMPAUBO! Acu lampui kemzui gage ngngwa gai beulo a ngauraume ziemne. 12A ngauraume luu keneu gage acu gidi helo, kedanemene kenret zierangdung acu mmau cuh kedine, nah penui rata cui ngngi mpet!13Ring kelame deu gade RAMPAUBE keyi de ngau kera Ih nlumlu meliecai a da daitei dizie bi? 14RAMPAUBE de kwa bamlu; ngkienglu, nah peu n nlung de kuu lu! RAMPAUBE de kwalu!Bridge Connectivity Solutions Pvt. Ltd.