Psalms22
Lei kempwak muiteube ziemne; “Heti lei,” gage teigai kelu. David gu lei ge.
1A Tinggwang, a Tinggwang, acu daitei gidi no? Nang daitei acu kelibeu kera nah a kemra kwa gade dei ham ladi no?2A Tinggwang, Ih tingkebaa dau qu gai, dede nang a sam kelibeu ma, nah tingmui dau Ih zing de bam ma!3Dede nang au mci; Israelme hetwa ngau eh nang hegwangme kengkieng bam.4Anui paume ncu nlum eh gwang; penui ncu nlum, nah nang penuide kelibeu.5Penui ncu qugai nah nang penuide kesiabe gade kelibeu. Penui ncu nlumlu nah penuide peu ngngamdi ma.6Dede Ih au tangseu ge nah mina ma, mina leuh dade hengam ge nah mina acu mneu la.7Acu kengaume leuh acu rangmsia la; penui acu nuila; penui acu penui peungum gaila. 8Penui rangla, “Pa RAMPAUBE de nlumla; peu RAMPAUBE de pecu kelibeu. Pecu peu pecu keli beulu, kedanemene pa pecu pesui lu.” 9Nang acu a pui puk gade ngngwa lu; Ih tung kebam dau gade nang acu peu ncu nlumlu.10Acu mna kelu gade ncu peu dida; Ih a pui puk ga kebam dau gade nang a Tinggwang da!11A dade mdei ladi helo, keherei a da nna la kedine; migede acu ngha kera gah.12Hetumseudung kekiee ge acu twagwa la; Bashan gu hetumseu kengkiengdung acu twagwapung bam.13Penui penui mui ngkei pwa acu kwabam Hingho pe taktyei teurak tyei kela nzwa.14Dui ruigi kegai nzwa acu de rui mpet bam, nah a radung pebam gade mpet kwa dida. A mlung maca nzwa da; cide a lung gade lwatet dila.15Lidei le tei kelu ge cangh kedi nzwa a kengkieng cangh dida; nah a mleu a ngngak ga koppwa bam dida. Nang acu ketsai rebui gage kaigai dida. 16Heteudung ne acu twagwapung bam dida; makesia ketei maa acu twagwa luda; penui a ba nah a pi kui dida. 17Ih a radung peei ciak lubui da. Penui acu pie nah pieling eh bam.18Penui a painidung penui kakgade nzi luda, penui a painidung ziemne dacak tei. 19Mdei la di helo, RAMPAUBO; acu ngha kera nzet gailo, a kengkieng!20A rabe de kiengtie gade keli beulo, a teilung ket rünne kecu heteu aidungde dade keli beulo.21Acu hingho mui gade keli beulo; pezai kesia hetumseu kiidung dade acu keli beulo.22Ih a sinamedung de n zi ndu lia zie, hemaabe kakga de Ih ncu twa zie. 23RAMPAUBE de rüt kelane, pecu twalu! Pecu rütlu, nnui Jacob leuhme pelane! Pecu herüt peulu, nnui Israelme leuhme pelane! 24Kedanemene pa keherei kelame de mlaidi lama mede malie tadi ma; RAMPAUBE pe dade pe zu kebai di ma; keherei kelame pecu qugai kecu dau, pa kingnei lula.25Hemaa madi gade Ih ncu twa zie; Ih a sampet de pecu hing kelame dage teicang luzie.26Keherei kelame matyei zie nah nggei luzie; RAMPAUBE de peei kelame pecu twa zie. Peu nnui mlungdung kelungta lungh lalo.27Kideu ga mina pelane RAMPAUBE de nsung zie nah pe da nreu gwang luzie; heleuh leune kibaumedung n dwa ga keukei mie zie.28RAMPAUBE au hegwang; pa au heleuhdung reu kedibe. 29Kideu ga lungh keyime leune taktyei ngyi hengyi zie nah RAMPAUBE de reca zie; rebui ga nghungdi lai eh kebamme leune pe dwaga keumie zie, penuikatei penui teilung tei ntiegai kelakme.30Gwang kezeu heleuh ge pe ta tei kegaide; penui Rampaube ha penui cai gwang kezeu heleuhdung dage ranglia zie.31Penui gwang eh pe kesamsang ha ranglia zie; penui gwang dai kera ceheu dage pe ta ranglia zie!Bridge Connectivity Solutions Pvt. Ltd.